އިންޑިއާ ސަރުކާރުން އަނެއްކާވެސް ރާއްޖެއަށް ކޮވިޝީލްޑް ވެކްސިންގެ އިތުރު 100،000 ޑޯޒް ހަދިޔާކޮށްފިއެވެ.
އިންޑިއާއިން މި ވެކްސިން ޑޯޒްތައް ހަދިޔާކުރެއްވީ މިހާރު ރާއްޖެވަޑައިގެން އުޅުއްވާ އިންޑިއާގެ އެކްސްޓާނަލް އެފެއާޒް މިނިސްޓަރ ޑރ.ސުބްރަބާނިއަމް ޖައިޝަންކަރެވެ. ރާއްޖޭގެ ފޮރިން މިނިސްޓްރީގައި ބޭއްވި ރަސްމިއްޔާތެއްގައި މިވެކްސިން ޑޯޒްތަކާ ރަމްޒީގޮތުން ޙަވާލުވެވަޑައިގަތީ ރާއްޖޭގެ ހެލްތު މިނިސްޓަރ އަޙްމަދު ނަސީމެވެ.
މީގެކުރިންވެސް އިންޑިއާއިން ވަނީ ރާއްޖެއަށް ކޮވިޝީލްޑްގެ އެއްލައްކަ ޑޯޒް ހަދިޔާކޮށްފައެވެ. އެވެކްސިން ރާއްޖެ ގެނެސްފައިވަނީ މިދިޔަ މަހުގެ 20ވަނަ ދުވަހުއެވެ. އިންޑިއާއިން ރާއްޖެއަށް ހަދިޔާކުރި "ކޮވިޝީލްޑް" ވެކްސިން ޖެހުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދީފައިވަނީ މިދިޔަ މަހުގެ 26ވަނަ ދުވަހުހަމަށެވެ.
ރާއްޖޭގައި މިވެކްސިން ޖަހަން ފަށާފައިވަނީ މިމަހުގެ ފުރަތަމަދުވަހުން ފެށިގެންނެވެ. މިހާތަނަށް ރާއްޖެއިން ކޮވިޑް ވެކްސިން ޖެހި މީހުންގެ ޖުމްލަ ޢަދަދު ވަނީ 64,048އަށް އަރާފައެވެ. މިހާތަނަށް ވެކްސިން ޖެހި ޖުމުލަ ޢަދަދުގެތެރެއިން މާލެ ސަރަޙައްދުން 49,836 މީހުންނަސް ވަނީ ވެކްސިން ޖަހާފައެވެ. އަދި އަތޮޅުތަކުން 14,212 މީހުންނަށް ވަނީ ވެކްސިން ޖަހާފައެވެ.
