ހައިކޯޓާއި ކްރިމިނަލް ކޯޓަށް އިސްފަޑީޔާރުން ކަނޑައޅައި އިތުރު ހަތް ކޯޓަކަށް ޖޫޑިޝަލް ސާރވިސް ކޮމިޝަން (ޖޭއެސްސީ) އިން ފަނޑިޔާރުން އައްޔަންކުރައްވައި، އެފަނޑިޔާރުންނަށް މަޤާމާއި ފަތްކޮޅު އަރުވައިފިއެވެ. މި ހުރިހާ ފަނޑިޠާރުންނަށް ވެސް މަޤާމާއި ފަތްކޮޅު އެރުވީ ޖޭއެސްސީގެ ރައީސް ޙިސާން ޙުޞައިންނެވެ.
ވަކިވަކިން މިއަދު ބޭއްވި ރަސްމިއްޔާތުތަކެއްގައި އެންމެ ފުރަތަމަ މަޤާމާއި ފަތްކޮޅު އެރުވީ ހައިކޯޓްގެ އިސްފަނޑިޔާރަކަށް އައްޔަންކުރެއްވީ ގ. ޑޭޒީ ފެހި ޙާތިފް ޙިލްމީއާއި ކްރިމިނަލް ކޯޓްގެ އިސްޤާޒީކަމަށް އައްޔަންކުރެއްވި އއ. ފެރިދޫ ޝިޔާމާ މަންޒިލް އަޙްމަދު ޝަކީލަށެވެ.
ހައިކޯޓްގެ އިސްފާނޑިޔާރަކަށް އައްޔަންކުރެއްވި ހާޠިފް ޙިލްމީ އަކީ އިނގިރޭސިވިލާތުގެ އޮކްސްފޯރޑް ބްރޫކްސް ޔުނިވަރސިޓީން ޤާނޫނީ ދާއިރާއިން ފުރަތަމަ ޑިގްރީ ޙާޞިލްކުރައްވައި ފަނޑިޔާރުކަމުގެ ތަޖުރިބާ، ސިވިލް ކޯޓްގައި 10 އަހަރު އަދި ހައިކޯޓްގައި އެއް އަހަރު ހޯދަވައިފައިވާ ބޭފުޅެކެވެ.
ކްރިމިނަލް ކޯޓްގެ އިސްގާޒީ ކަމަށް އައްޔަންކުރެއްވި ޝަކީލަކީ ޝަރީޢާއިން ފުރަތަމަ ޑިގްރީއާއި މާސްޓަރސް ޙާޞިލްކޮށް 17 އަހަރުގެ ތަޖްރިބާ ލިބިވަޑައިގެން ހުންނެވި ބޭފުޅެވެ. ޖުވައިނައިލް ކޯޓާއި ފެމެލީ ކޯޓާއި ސިވިލް ކޯޓާއި ކްރިމިނަލް ކޯޓްގައި ޝަލީކް ވަނީ މަސައްކަތް ކުރައްވައިފައެވެ.
މިއަދު ފަނޑިޔާރު ކަމަށް އައްޔަންކުރެއްވި ބޭފުޅުންގެތޭރޭގައި ޖުވެނައިލް ކޯޓްގެ ފަނޑިޔާރުކަމަށް އައްޔަންކުރެއްވީ ހދ. ކުޅުދުއްފުށީ ޓޯޓަލް މަރްޔަމް ޠާއިފާއެވެ. ކްރިމިނަލް ކޯޓްގެ ފަނޑިޔާރުކަމަށް އައްޔަންކުރެއްވީ ގދ. މަޑަވެލީ ރީގަލް ޞަފްޢަތުއެވެ.
މިއަދު ޖޭއެސްސީން ވަނީ ހަމެޖިސްޓްރޭޓްކޯޓަށް ވެސް ފަނޑިޔާރުން އައްޔަން ކޮށްފައެވެ. ހދ. ކުޅުއްދުފުށީ މެޖިސްޓްރޭޓް ކޯޓްގެ މެޖިސްޓްރޭޓްކަމަށް އައްޔަންކުރެއްވީ ހދ. ކުޅުދުއްފުށީނޫރަންގޭ މުޙައްމަދު އިސްމާޢީލެވެ. ށ. ފުނަދޫ މެޖިސްޓްރޭޓް ކޯޓްގެ މެޖިސްޓްރޭޓްކަމަށް އައްޔައްޔަންކުރެއްވީ ގ. ނޫމަރާވިލާ، ޝީރީން ނާހިދާ ލަތީފެވެ. ނ. މަނަދޫ މެޖިސްޓްރޭޓް ކޯޓްގެ މެޖިސްޓްރޭޓްކަމަށް އައްޔަންކުރެއްވީ ށ. މަގޫދޫ ހަވީނާޒު އާދަމް ސަލީމެވެ. ގދ. ތިނަދޫ މެޖިސްޓްރޭޓް ކޯޓްގެ މެޖިސްޓްރޭޓްކަމަށް އައްޔަންކުރެއްވީ ގއ. ގެމަނަފުށީ އެތުމާގޭ އަޙްމަދު އާދަމެވެ. ރ.މަޑުއްވަރީ މެޖިސްޓްރޭޓް ކޯޓްގެ އިސް މެޖިސްޓްރޭޓްކަމަށް އައްޔަންކުރެއްވީ ތ. މަޑިފުށީ ސިގްނަލްގެ އަކްރަމް ރަފީޢުއެވެ. ސ. ފޭދޫ މެޖިސްޓްރޭޓް ކޯޓްގެ އިސް މެޖިސްޓްރޭޓްކަމަށް އައްޔަންކުރެއްވީ ސ. މަރަދޫފޭދޫ މެރީވިލާ މުޙައްމަދު އަފީފެވެ.
