ޖުޑީޝަލް ސާވިސް ކޮމިޝަން (ޖޭއެސްސީ) ގެ ޤާނޫނަށް ގެނައި އިސްލާހަށް އަމަލު ނުކުރުމަށް ނުވަތަ ޤާނޫނުގެ ބާރު ކެނޑޭ ފަދަ އެއްވެސް ނިންމުމެއް ޖުޑީޝަލް ކައުންސިލުން ނިންމައިފިނަމަ، އެކަމުގައި ބައިވެރިވާ ފަނޑިޔާރުންގެ ސުލޫކީ މައްސަލަ ބަލާނެ ކަމުގެ އިންޒާރު ޖޭއެސްސީން ދީފިއެވެ. މިފަދަ އިންޒާރެއް ދިނުމަށް ނިންމީ މިރޭ ބޭއްވި ޖޭއެސްސީގެ ކުއްލި ބަދަލުވުމަކަށްފަހުއެވެ.
ޖޭއެސްސީ އިން ނެރުނު ނޫސްބަޔާނުގައި ވަނީ މިރޭ ބޭއްވި ކުއްލި ބައްދަލުވުމުގައި މެމްބަރުން ކަންބޮޑުވުން ފާޅުކުރައްވައިފައިވާ ކަންކަމުގެ ތެރޭގައި ޝަރުޢީ ނިޒާމު އިޞްލާޙުކުރުމަށް މިހާރު ކުރަމުންދާ މަސައްކަތާއި އަދި ގެންނަމުންދާ ބަދަލުތައް ބަލައި ނުގަތުމަށް ސްޕްރީމްކޯޓުން ޢަމަލުކުރަމުންދާ ގޮތް ހިމެނޭކަމަށެވެ. އަދި ޖޭއެސްސީގެ ޤާނޫނީ ޒިންމާ އަދާކުރުމަށް އެއްބާރުލުން ނުދޭކަމަށްވެސް ވަނީ ފާހަގަކުރައްވައިފައެވެ. ހަފްތާބަންދުގައި ކުއްލި ގޮތަކަށް ހުކުރު ދުވަހެއްގެ ރޭގަނޑު ސްޕްރީމް ކައުންސިލްގެ ބައްދަލުވުމެއް ބޭއްވުމަށް ސްޕްރީމްކޯޓުން ނިންމައި އެގޮތަށް އެކަން ކުރުމަށް ހަމަޖެއްސުމުން މެމްބަރުން ކަންބޮޑުވުން ފާޅުކޮށްފައިވާކަމަށް ބަޔާނުގައިވެއެވެ.
ޤާނޫނަށް ގެނެވުނު އިސްލާހަށް އަމަލު ނުކުރުމަށް ނުވަތަ އެ އިސްލާހުގެ ބާރު ކެނޑޭ ގޮތަށް ނުވަތަ ބަލައި ނުގަތުމަށް ޖުޑީޝަލް ކައުންސިލްގެ ބައްދަލުވުމުން ނިންމައިފިނަމަ، އެކަމުގައި ބައިވެރިވި ފަނޑިޔާރުންގެ ސުލޫކީ މައްސަލަ ބަލާނެ ކަމަށް ނިންމެވީ މެމްބަރުންގެ ކަންބޮޑުވުންތަކާ ގުޅިގެންކަމަށް ޖޭއެސްސީގެ ބަޔާނުގައި ވެއެވެ.
ޖުޑިޝަލް ކައުންސިލްގެ ބައްދަލުވުމެއްވެސް މިރޭ ވަނީ ބާއްވައިފައެވެ. ޖުޑިޝަލް ކައުންސިލުން ބާތިލް ކުރުމަށް މަޝްވަރާ ކުރާ އިސްލާހުތަކުގެ ތެރޭގައި އެ ޑީޖޭއޭ، ޖޭއެސްސީގެ ދަށަށް ގެންދިޔުމާއި ފަނޑިޔާރުންނަށް ފިޔަވަޅު އެޅޭނެ ގޮތްތައް ހިމެނޭކަމަށް ބައެއް މީޑިއާ ތަކުން ވަނީ ހާމަކޮށްފައެވެ.
