ރައްޔިތުންގެ މަޖިލީހުގެ، ރައީސް ކުރީގެ ރައީސް މުޙައްމަދު ނަޝީދަށް ހުކުމް އިއްވި ކްރިމިނަލް ކޯޓުގެ ކުރީގެ ގާޒީ ޢަބްދުލްބާރީ ޔޫސުފް ފަނޑިޔާރުކަމުގެ މަޤާމުން ވަކިކުރުމުގެ މައްސަލަ ދިރާސާކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމެޓީއަށް ފޮނުއްވައިފިއެވެ.
ގާޒީ ބާރީ މަޤާމުން ވަކިކުރުމަށް ނިންމައި އެމައްސަލަ ޖޭއެސްސީން މަޖިލީހަށް ހުށައަޅާފައިވާއިރު އޭނާ ހުރީ ސަސްޕެންޑްކޮށްފައެވެ. ޖޭއެސްސީން ވިދާޅުވި ގޮތުގައި އޭނާ ސަސްޕެންޑް ކޮށްފައިވަނީ އެމްއެމްޕީއާރުސީ ޚިޔާނާތުގެ ފައިސާއިން މަންފާ ހޯދި ކަމުގެ ތުހުމަތުގައި ފުލުހުން ތަހުގީގު ކުރަމުންދާ މައްސަލައިގައެވެ.
ކްރިމިނަލް ކޯޓުގެ ކުރީގެ ގާޒީ ޢަބްދުލްބާރީ ޔޫސުފް ފަނޑިޔާރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހެޅުމަށް ޖުޑިޝަލް ސާވިސް ކޮމިޝަނުން ނިންމައިފައި ވަނީ ވަރަށް ބޮޑެތި ތުހުމަތުތަކާ އެކުއެވެ.
ކުރީގެ ރައީސް މުޙައްމަދު ނަޝީދަށް ޓެރެރިޒަމް ކުށުގެ ދައުވާގައި ހުކުމްކުރުމުގެ ކުރިން އެ މައްސަލައިގެ ހުކުމުގެ ކޮޕީއެއް، އޭރުގެ ނައިބު ރައީސް އަޙްމަދު އަދީބު ޢަބްދުލްޣަފޫރަށް، ގާޒީ ބާރީ ފޮނުއްވި ކަމަށް ވެސް ޖޭއެސްސީގެ ތުހުމަތުތަކުގައި ބުނެއެވެ. އަދި ގާޒީ ބާރީއާއި އަދީބާ ދެމެދު ގާތްގުޅުމެއް އޮތްކަމަށް ވެސް ވަނީ ތުހުމަތު ކޮށްފައެވެ.
އޭރުގެ ސަރުކާރުން ބޭނުންވިގޮތަށް ބޮޑެތި ޝަރީއަތް ނިންމާދިން ފަނޑިޔާރުންނަށް އިނާޔަތްތައް ދިންއިރު، ގާޒީ ބާރީއަށް ފްލެޓެއް ބޭނުންވުމުން، ބާރީގެ އަނބިކަނބަލުންގެ ނަމުގައި ފްލެޓެއް ހަމަޖައްސައިދިނުމަށް ނިންމިކަމަށްވެސް ބުނެއެވެ. އަދި ހަމަ އެ ދުވަސްވަރު ކުރީގެ ނައިބު ރައީސް އަޙްމަދު އަދީބުގެ ފަރާތުން ފަސް ލައްކަ ރުފިޔާ ގާޒީ ޢަބްދުލްބާރީ ޔޫސުފަށް ދީފައިވާކަމަށް ހެކިންގެ ހެކިބަހުން ސާބިތު ވާކަމަށްވެސް ޖޭއެސްސީން ބުނެފައި ވެއެވެ. ފްލެޓް ގަތުމަށް އެޑްވާންސަށް ހަ ލައްކަ ރުފިޔާ ގާޒީ ޢަބްދުލްބާރީ ޔޫސުފް ދައްކާފައިވާއިރު، އެފައިސާއަކީ ޢަބްދުލްބާރީ ޔޫސުފް އާމްދަނީ ހޯދައިގެން، ހޯދި ފައިސާކަން ސާބިތުކޮށްދެވިފައި ނުވާކަމަށްވެސް ބުނެފައި ވެއެވެ. އެހެންކަމުން އެ ފައިސާއަކީ ގޮތް ނޭނގޭ ނާޖާއިޒު ގޮތުގައި ހޯދައިފައިވާ ފައިސާކަންވެސް ތަހުގީގަށް ސާބިތުވެފައިވާކަމަށް ވެސް ޖޭއެސްސީން ވިދާޅުވިއެވެ.
ޖޭއެސްސީން ކުރާ ތުހުމަތުތަކުގެ ތެރޭގައި ގާޒީ ބާރީ އަމަލީގޮތުން ވިޔަފާރީގެ ތެރޭގައި ހަރަކާތްތެރިވިކަމާއި، އަދި މި ވިޔަފާރިން ލިބުނު އާމްދަނީ މާލީ ބަޔާނުގައި ހާމަކޮށްފައިނުވުން ވެސް ހިމެނެއެވެ.
ގާޒީ ބާރީގެ މައްސަލައިގެ އިތުރުން ދ. ޖުޑިޝަރީ ދާއިރާގެ އިސް މެޖިސްޓްރޭޓް ޢަބްދުއްރައްޒާޤު މުޙައްމަދާ ގުޅޭ ސުލޫކީ މައްސަލައެއްގައި އޭނާވެސް މަގާމުން ވަކިކުރުމަށް ޖޭއެސްސީން ނިންމުމާމެދު މަޖިލީހުން ގޮތެއް ނިންމައި ދިނުމަށް އެދި ހުށަހެޅި މައްސަލަވެސް ވަނީ ޖުޑިޝަރީ ކޮމެޓީއަށް ދިރާސާ ކުރުމަށް ފޮނުވައިފައެވެ. ޖޭއެސްސީން މިމައްސަލަ ނިންމިއިރު އޭނާވެސް ހުންނެވީ ސަސްޕެންޑް ކޮށްފައެވެ. އޭނާ ސަސްޕެންޑް ކޮށްފައި ހުރީ ފުލުހުން ތަހުގީގު ކުރަމުންދާ ޖިނާއީ މައްސަލައެއްގައެވެ.
