ޖުމްހޫރީ ދުވަހާ ގުޅިގެން ރައީސް ޞާލިހް ދެއްވި ޚިޠާބުން ކުރިއަށް އޮތް އަހަރުގެ މިސްރާބު ސާފުވެ، ރައްޔިތުންގެ އުއްމީދު އާވާނެ ކަމަށް ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވެއްޖެވެ.
ރައީސް ނަޝީދު މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ކުރެއްވި ތަހްނިޔާގެ ޓްވީޓްގައެވެ. އަދި ރަނުން ރަނަށް ވަޢުދުތައް ފުއްދޭނެކަމަށް ވެސް ރައީސް ނަޝީދު ކުރެއްވި ޓްވީޓްގައި ވިދާޅުވިއެވެ.
"މާތްﷲ ގެ އިރާދަ ފުޅުން ރަނުން ރަނަށް ވަޢުދުތައް ފުއްދޭނެ. " ރައީސް ޞާލިޙަށް ޝުކުރު އަދާކުރައްވަމުން މަޖިލީހުގެ ރައީސް ވިދާޅުވިއެވެ.
ރައީސުލް ޖުމްހޫރިއްޔާ މިއަދު ޤައުމާ މުޚާތަބުކުރައްވައި ދެއްކެވި ވާހަކަފުޅުގައި ވިދާޅުވީ، އިޤްތިޞާދީ ގޮތުން، ވަރަށް ބޮޑެތި ގޮންޖެހުންތަކެއް ހުރިނަމަވެސް ވެރިކަމުގެ ތިންވަނަ އަހަރަކާ ކުރިމަތިލަނީ، ރައްޔިތުންގެ އުންމީދުތަކާ ގުޅިފައިވާ، ވަރަށް މުހިންމު ރޭވުންތަކަކާއެކުގައި ކަމަށެވެ. ޤައުމީ ތަރައްޤީއާ ގުޅޭ ހުރިހާ ދާއިރާތަކުން، ތަރައްޤީގެ މަޝްރޫޢުތައް ހިންގުމަށް، އަންނަ އަހަރުގެ ބަޖެޓުގައި ހިމަނާފައިވާނެކަން ފާހަގަ ކުރެއްވިއެވެ. ޞިއްޙީ ދާއިރާ ލާމަރުކަޒު ކުރުމުގެ 56 މަޝްރޫޢެއް، އަންނަ އަހަރުގެ ތެރޭގައި، ރާއްޖޭގެ އެކި އަތޮޅުތަކުގައި ކުރިއަށް ގެންދެވޭނެ ކަމަށް ވިދާޅުވިއެވެ. އޭގެ ތެރޭގައި ފަސް ޓާޝަރީ ހޮސްޕިޓަލް ތަރައްޤީ ކުރުމުގެ މަސައްކަތް ކުރިއަށްދާނެކަން ފާހަގަ ކުރެއްވިއެވެ.
"އިރާދަކުރެއްވިއްޔާ އަންނަ އަހަރުގެ ތެރޭގައި މި ހޮސްޕިޓަލްތަކުގެ ފައިދާ ރައްޔިތުންނަށް ލިބެން ފަށާނެ" ރައީސް ޞާލިޙް ވިދާޅުވިއެވެ.
އިޤްތިޞާދު ސިންދަފާތު ކުރުމުގެ ގޮތުން، މަސްވެރިކަމާއި ދަނޑުވެރިކަން ތަރައްޤީކުރުމަށް، އަންނަ އަހަރުގެ ތެރޭގައި، ޚާއްޞަ މަސައްކަތްތަކެއް ކުރެވޭނެކަމަށް ވެސް ރައީސް ޞާލިޙް ވިދާޅުވިއެވެ. މަސްވެރިކަމުގެ ދާއިރާއިން، ކޫއްޑޫއާއި ފެލިވަރު އަދި ކަނޑުއޮތްގިރީގެ ވަސީލަތްތައް ތަރައްޤީ ކުރުމަށް އަންނަ އަހަރު ބޮޑެތި އިންވެސްޓްމަންޓްތަކެއް ކުރެވޭނެކަމަށް ވިދާޅުވިއެވެ. އަދި ދަނޑުވެރިކަން ފުޅާކުރުމަށް މަގުފަހިކުރުމުގެ ގޮތުން، ކުރިއަށް އޮތް ތިން އަހަރަށް އެއްވެސް ކުއްޔެއް ނުނަގާގޮތަށް، ރަށްރަށުން މިހާރުވާނީ ދަނޑުބިން ދޫކުރަން ފަށާފައިކަމަށް ވިދާޅުވިއެވެ. އަދި ދަނޑުވެރިންނަށް މާލީ އެހީތެރިކަން ފޯރުކޮށްދިނުމުގެ މަޝްރޫޢުތައްވެސް ކުރިއަށްދާނެކަމަށް ވިދާޅުވިއެވެ.
ބޯފެނާއި ނަރުދަމާ ޤާއިމުކުރުމުގެ މަސައްކަތް، މިހާތަނަށް ނުފެށި ހުރި ރަށްރަށުގައި، މި އަންނަ އަހަރު ޢަމަލީ މަސައްކަތް ފަށްޓަވަން ސަރުކާރުން އަމާޒު ހިފައިފައިވާކަމަށްވެސް ވިދާޅުވިއެވެ.
ނަފްސާނީ ދުޅަހެޔޮކަމަށް، ޤައުމީ ފެންވަރުގައި ޚާއްޞަ ސަމާލުކަމެއް ދީގެން މަސައްކަތް ކުރަން ފެށިފައިވަނީ، މިދިޔަ އަހަރުގެ ތެރޭގައި ކަން ފާހަގަ ކުރައްވައި އެ މަސައްކަތް އިތުރަށް ފުޅާކޮށް، ނަފްސާނީ ބަލިތަކަށް ފަރުވާދިނުމުގެ ޚިދުމަތް،އަންނަ އަހަރުގެ ތެރޭގައި، އަތޮޅުތަކުގައި ފެށޭނެކަމަށްވެސް ވިދާޅުވިއެވެ.
