ފަސް ދުވަހުގެ ތެރޭގައި އިތުރު 26 ފުލުހަކު ކޯވިޑަށް ޕޮޒިޓިވްވެ ބަލިޖެހުނު ފުލުހުން ޢަދަދު 93 އަށް އަރައިފިއެވެ.
ކޮމިޝަނަރ އޮފް ޕޮލިސް މުޙައްމަދު ޙަމީދު މިއަދު ކުރެއްވި ޓްވީޓެއްްގައި ވިދާޅުވީ މިހާތަނަށް 93 ފުލުހުން ކޯވިޑަށް ޕޮޒިޓިވް ވެފައިވާކަމަށެވެވެ. މިވަގުތު ބަލި ޖެހިފައިވާ ފުލުހުންގެ ޢަދަދަކީ 56 އެވެ. އޭގެތެރޭގައި ފުލުސް އޮފިސަރުންވެސް ހިމެނެއެވެ.
މިމަހުގެ ފުރަތަމަ ދުވަހު ހެލްތު އިމަޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީޤް ވިދާޅުވީ ފުލުހުންގެ ތެރެއިން ކޯވިޑަށް ޕޮޒިޓިވް ޢަދަދު 67 އަށް އަރައިފައިވާކަމަށެވެ. އެ ދުވަހު އެކަނިވެސް ހަ ފުލުހަކު ބައްޔަށް ޕޮޒިޓިވް ވެފައިވެއެވެ. އަދި މިދިޔަ މަހުވެސް 21 ފުލުހަކު ބައްޔަށް ޕޮޒިޓިވް ވެފައިވެއެވެ.
މިހާރަކަށް އައިސް ކޮވީޑާ ދެކޮޅަށް އިސްސަފުގައި މަސައްކަތް ކުރާ މަސައްކަތްތެރިން ބައްޔަށް ޕޮޒިޓިވްވާ ޢަދަދު ވަނީ އިތުރު ވެފައެވެ. ނުރަސްމީކޮށް މަޢުލޫމާތު ލިބިފައިވާ ގޮތުގައި ސިފައިންގެ ތެރެއިން ވެސް ގިނަ ބަޔަކު މިދިޔަ މަހުގެ ތެރޭގައި ވަނީ ކޯވިޑަށް ޕޮޒިޓިވް ވެފައެވެ. ނަމަވެސް ކޯވިޑަށް ޕޮޒިޓިވް ވެފައިވާ ސިފައިންގެ ޢަދަދުތައް ރަސްމީކޮށް ހާމަކޮށްފައެއް ނުވެއެވެ.
މާލެ ސަރަޙައްދުގައި ކޯވިޑަށް ޕޮޒިޓިވްވާ މީހުންގެ ޢަދަދު އިތުރުވަމުން ދިއުމާއެކު ބަލި ކޮންޓްރޯލް ކުރުމަށް އަޅާ ޚާއްޞަ ފިޔަވަޅެއްގެ ގޮތުން ރޭގަނޑު 10 އިން ފަތިހު ފަހެއް ޖެހުމާހަމަށް ބޭރަށް ނުކުމެ އުޅުމާއި އެއްޗެހި ދުއްވުން ވަނީ މަނާކޮށްފައެވެ. އަދި މާލެ ސަރަޙައްދާއި ބަލި މީހުން ތިބި ރަށްރަށުގެ އާންމު ތަންތަނުގައި މާސްކު އެޅުން ވަނީ މަޖުބޫރު ކޮށްފައެވެ. މާލެ ސަރަޙައްދުގައި މިއަމުރާ ޚިލާފުވާ މީހުން ދަނީ 1000 ރުފިޔާ އިން ޖުރިމަނާ ކުރަމުންނެވެ. އިއްޔެގެ ނިޔަލަށް 151 މީހަކު ވަނީ މާލެސަރަޙައްދުގައި މާސްކް އެޅުމުގެ އަމުރާ ޚިލާފުވެގެން ޖުރިމަނާ ކޮށްފައެވެ.
