ލީބިޔާގެ ދާޚިލީ ހަނގުރާމައިގައި މިސްރުން ތާއީދުކުރާ ހަނގުރާވެރި ލީޑަރު ފީލްޑް މާޝަލް (ރިޓާޔަޑް) ޚަލީފާ ހަފްތަރުގެ ހަނގުރާމަވެރިންނަށް އެހީވުމަށް މިސްރު ސިފައިން ލީބިޔާއަށް ފޮނުވުމަށް ރައީސު ޢަބްދުލްފައްތާޙު ސީސީ ނިންމެވި ނިންމެވުމަށް އެ ގައުމުގެ ގާނޫނުހަދާ މަޖިލީހުން ތާއީދުކޮށްފިއެވެ.
ލީބިޔާގައި ގާއިމުކޮށްފައިވާ އެއްބައިވަންތަކަމުގެ ސަރުކާރު، ގަވަމެންޓް އޮފް ނޭޝަނަލް އެކޯޑް (ޖީއެންއޭ) ސިފައިން ފަހަކަށް އައިސް ހޯދަމުންދާ ކާމިޔާބީތަކާއެކު ހަނގުރާވެރި ލީޑަރު ފީލްޑް މާޝަލް (ރިޓާޔަޑް) ޚަލީފާ ހަފްތަރުގެ ސިފައިންގެ އަތްދަށުން ހުޅަނގު ލީބިޔާގެ ބޮޑު ބައެެއް ވަނީ ގެއްލިގެން ގޮސްފައެވެ. ޖީއެންއޭއަކީ ލީބިޔާގެ ގާނޫނީ ސަރުކާރުގެ ގޮތުގައި އދ.ން ބަލައިގަންނަ ސަރުކާރެވެ.
"މުޖުރިމުންނާއި، ހަތިޔާރުއެޅި ހަނގުރާމަވެރިންނާއި، ބޭރު ގައުމުތަކުގެ ޓެރަރިސްޓުންގެ ނުލައްކަލުން މިސްރުގެ ގައުމީ ސަލާމަތްތެރިކަން ދިފާއުކުރުމަށްޓަކައި، ބޭރު ގައުމެއްގައި ހަނގުރާމަވެރި ހަރަކާތެއްގައި މިސްރުގެ ހަތިޔާރުއެޅި ބާރުތަކުގެ މީހުން ބައިވެރިވުމަށް" ތާއީދުކުރާ ގަރާރު ގާނޫނުހަދާ މަޖިލީހުން ފާސްކުރީ ހާޒިރުވެ ތިިއްބެވި މެންބަރުންގެ އިއްތިފާގުންނެވެ. ސިފައިން ފޮނުވަން ނިންމާފައި ވަނީ "ހުޅަނގު ފަރާތުގެ ސަރަހައްދަކަ"ށެވެ. މިސްރުގެ ހުޅަނގު ފަރާތު ސަރަހައްދީ ރޮނގު ގުޅެނީ ލީބިޔާއާއެވެ.
މިސްރުގެ މި ނިންމުމުގެ ސަބަބުން މެދުއިރުމަތީގެ އެންމެ ވާދަވެރި ދެ ގައުުުމު ކަމުގައިވާ މިސްރާއި ލީބިޔާއާ ދެމެދު ސީދާ ކުރިމަތިލުމެއް ހިނގުމަކީ އެކަށީގެންވާ ކަމެކެވެ.
ޓްރިޕޮލީ (ޠަރާބުލުސް) ގައި ގާއިމުވެފައި އޮތް ޖީއެންއޭ ސަރުކާރަށް އެންމެ ބޮޑު އެހީތެރިކަމެއް ދެނީ ތުރުކީންނެވެ. ޖީއެންެއޭގެ ސިފައިން މިފަހަކަށް އައިސް ހޯދަމުންދާ އަސްކަރީ ކާމިޔާބީތަކުގައި ތުރުކީގެ ޑްރޯންތަކުގެ ދައުރު ވަަރަށް ބޮޑެެވެ.
ޚަލީފާ ހަފްތަރުގެ ހަނގުރާމަވެރިންގެ ބާރުގެ ދަށުގައި އޮތް ސިރްތަކީ ލީބިޔާއިން ތެޔޮ ބޭރުުކުރުމުގެ މަރްކަޒެވެ. ޖީއެންއޭގެ ސިފައިން މިިހާރު ދަނީ އެރަށް ހިފަން ބޮޑު ހަމަލާއަކަށް ތައްޔާރުވަމުންނެވެ. މިސްރު ސިފައިން ލީބިޔާއަށް ފޮނުވަން ސީސީ ނިންމެވީ ސިރްތު ދިފާއުކުުރުމުގައި ޙަފްތަރަށް އެހީވުމަށް ކަމަށް ބެލެވެއެވެ.
ސިރްތުގެ ހަނގުރާމަ ބޯމަތިވަމުން އަންނައިރު، ލީބިޔާގައި ހަރަކާތްތެރިވާ އދ.ގެ ސަޕޯޓް މިޝަންގެ ޑެޕިއުޓީ ހެޑް، ސްޓެފަނީ ވިލިއަމްސް ވަނީ، ހަނގުރާމައިގެ އަސަރު ސީދާކޮށް ކުރާގޮތަށް ތިބި 1 ލައްކަ 25 ހާސް މީހުންގެ ފުރާނަ ސަލާމަތްކުރުމަށްޓަކައި ސުލްހަ ގާއިމުކޮށް ހަނގުރާމަ ހުއްޓައިލުމަށް ގޮވާލައްވާފައެވެ.
