ހުޅަނގު މޫސުމުގެ ގަދަ ވިއްސާރައިގެ ސަބަބުން ފަތްކެޔޮ ދަނޑުތައް ހަލާކުވެ ނަރުދުއަށް ފޫނުބެއްދޭވަރުގެ ބޮޑު ގެއްލުމެއް ވެއްޖެއެވެ. ފުޅާ ދާއިރާއެއްގައި ފަތް ކޭލުގެ ދަނޑުވެރިކަން ކުރާ ނަރުދޫގެ ހުރިހާ ފަތްކޮޔިދަނޑުތަކެއް މިފަހަރުގެ ހުޅަނގު މޫސުމުގެ ވިއްސާރައިގައި ވަނީ ހަލާކުވެގެން ގޮސްފައެވެ.
ނަރުދޫގައި ފަތްކޭލުގެ ދަނޑުވެރިކަންކުރާ އެރަށު ކައުސިލްގެ މެމްބަރެއްކަމަށްވާ މުޙައްމަދު ނިޒާރު އާފަތިސް އޮންލައިންނާ ވާހަކަ ދައްކަމުން ވިދާޅުވީ އެރަށުގެ ހުރިހާ ފަތްކެޔޮ ދަނޑުތަކެއް ހަލާކުވެފައިވާ ކަމަށެވެ. ފަތް ކެޔޮދަނޑުތަކަށް ލިބުނު ގެއްލުން ކުރިއަށް އޮތް އަށް މަސް ދުވަހަށް ދެމިގެންދާނެކަމަށެވެ. ފަތްކޭލުގެ ދަނޑުވެރިކަމުގެ ތަޖްރިބާވެސް ލިބިވަޑައިގެން ހުންނެވި ނިޒާރު ވިދާޅުވީ އަލުން ކެޔޮ ހައްދައިގެން ފޯދޭން ހައެއްކަ މަސް ނަގާނެ ކަމަށެވެ. އެހެން އަހަރުތަކުގައި ވެސް ހުޅަނގު މޫސުމުގެ ވިއްސާރައިގައި ފަތްކޮޔޮދަނޑުތަކަށް ގެއްލުންވާކަމަށް ނިޒާރު ވިދާޅުވިއެވެ. ނަމަވެސް މިފަހަރުގެ ވިއްސާރައަކީ އާދަޔާ ޚިޔާލާފަށް ވައިގަދަވެ ކުރި ވިއްސާރައަކަށް ވުމުން ރަށުގެ ހުރިހާ ފަތްކެޔޮ ދަނޑުތައް ހަލާކުވެފައިވާކަމަށް އޭނާ ވިދާޅުވިއެވެ.
"ފަތްކެޔޮތައް އެބަހުރި މުލުން ލުހެގެންގޮސް ވެއްޓިފައި. ރުއްތައްވެސް ވެއްޓުފައި އެބަހުރި" އާފަތިހާ ވާހަކަ ދައްކަމުން ނިޒާރު ވިދާޅުވިއެވެ.
އޭނާ ވިދާޅުވީ ވިއްސާރައިގެ ސަބަބުން ދަނޑުތަކަށް ލިބުނު ގެއްލުންތައް ބަލައިދިރާސާކޮށް ގެއްލުމާ ބެހޭ ރިޕޯރޓެއް އެކުލަވާލެއްވުމުގެ މަސައްކަތް ކުރައްވަމުންދާކަމަށެވެ. ރިޕޯރޓް އެކުލަވާލެއްވުމަށް ފަހު ދަނޑުވެރިކަމާ ބެހޭ ވުޒާރާއަށް ހުށަހެޅުއްވާނެކަމަށެވެ.
ނަރުދޫގައި 200 އަކަފޫޓާއި 500 އަކަފޫޓްގެ 50 އާއި 60 އާ ދެމެދުގެ ޢަދަދަކަށް ފަތްކެޔޮ ދަނޑު އޮންނާނެކަށް ނިޒާރު ވިދާޅުވިއެވެ. އެރަށުގެ ފަތްކެޔޮ އާންމުކޮށް ވިއްކަނީ މާލެއާއި ރިސޯރޓްތަކަށެވެ. ނަމަވެސް ފުރަބަންދުގެ ސަބަބުން ރޯދައަށް ހެއްދި ދަނޑުވެރިކަމުގެ ބާވަތްތައް ވެސް ހަލާކުވެ ބޮޑު ގެއްލުމެއް އެރަށުގައި ރޯދައަށް ކާބޯތަކެތި ހެއްދި ދަނޑުވެރިންނަށް ވެސް ލިބުނެވެ. އެހެންކަމުން ފުރަބަންދާ ގުޅިގެން ލިބުނު ގެއްލުމުން އަރައި ނުގަނެވި އުޅެނިކޮށް ވިއްސާރައިގައި ރަށުގެ ފަތްކެޔޮދަނޑުތައް ހަލާކުވުމުން އެރަށަށް މިވަނީ ފޫނުބެއްދޭ ވަރު ބޮޑު ގެއްލުމެއް ވެފައެވެ. ކައުންސިލް މެމްބަރ ނިޒާރު ވިދާޅުވީ ހަމަ އެކަނި ކަރަޔަށް ބެލި ކަމުގައި ވިއަސް 8 ޓަނު ހަލާކުވެގެން އުކާލަން ޖެހުނު ކަމަށެވެ.
ނަރުދޫއަކީ ރޯދައަށް ޚާއްޞަ ބާވަތްތައްވެސް ހައްދާ ރަށެކެވެ. އެގޮތުން ހައްދާ ބާވަތްތަކުގެ ތެރޭގައި ކަރަޔާ ތޮރަޔާ ކިއުކަމްބާ އާއި ފަތްޕިލާ ވެއްޔާއި މިރުސްފަދަ އާއްމުކޮށް ރޯދަމަހު އެންމެ ގިނައިން ބޭނުންކުރާ ބާވަތަތައް ހިމެނެއެވެ.
ނަރުދޫގައި ރޯދައަށް ދަނޑު ހައްދާ މީހަކު ކިޔައި ދިން ގޮތުގައި މިފަހަރު ރޯދަ އަށް ހެއްދި ތަކެތީގެ ތެރެއިން 3 ބައިކުޅަ ދެބައި ވަނީ ހަލާކުވެގެން އުކާލަން ޖެހިފައެވެ. ނަރުދުއަކީ މާލެ ދަތުރުކުރާ ބޯޓެއް އޮންނަ ރަށަކަށް ވުމުން ރޯދައަށް ހައްދާ ތަކެތިވެސް އާއްމުގޮތެއްގައި ވިއްކަނީ މާލެއަށެވެ. ނަމަވެސް ލޮކްޑައުންގެ ސަބަބުން އުފެއްދި ތަކެތި ރަށުން ބޭރު ކުރެވޭނެ ގޮތެއްނެތި ހުރެ ހަލާކުވީއެވެ.
ރޯދައަށް އެކަނި ރަނގަޅަށް ދަނޑު ހައްދާ މީހުންވެސް އެހެން އަހަރު ތަކުގައި 25 ހާހާއި 30 ހާހާ ދެމެދުގެ އާމްދަނީ އެއް ހޯދާ ކަމަށް އެރަށުން ރޯދައަށް ދަނޑު ހެއްދި މީހަކު ކިޔައި ދިނެވެ.
"ލިބޭ އާމްދަނީ ބިނާ ވާނީ އެކި މީހުން ދަނޑު ހައްދާ ފުޅާ މިނާ. ހަތަރު ހާސް އަކަފޫޓްގައި ދަނޑުހައްދާ މީހުންނާއި ހަތަރު ހާސް އަކަފޫޓްގައި ހައްދާ މީހުންނަށް ވެސް އާންމު ދަނީ ލިބޭމިންވަރު ތަފާތުވާނެ. ރަނގަޅަށް ހައްދާ މީހަކަށް އެހެން އަހަރުތަކުގައި ލިބޭ 25 ހާހުން 30 ހާހުން" ނަރުދޫގައި ރޯދައަށް ދަނޑު ހެއްދި މީހަކު ކިޔައި ދިނެވެ.
އާބާދީގައި 642 މީހުން އުޅޭ ނަރުދުއަކީ ފީވައް ފިޔައި ށ އަތޮޅުގައި އެންމެ ފޫޅާކޮށް ދަނޑުވެރިކަން ކުރާ ރަށެވެ. އެރަށުގައި ހައްދާ ތަކެތީގެ ތެރޭގައި އަނބާއި ބަނަބުކޭލާއި ޖައުފާން ރުއްވެސް ހިމެނެއެވެ.
ނަރުދުއަކީ މާލެ ފިޔަވައި އެންމެ ގިނަ ބަޔަކު ކޮވިޑަށް ޕޮޒިޓިވްވި ރަށެވެ. އެރަށު 11 މީކުވަނީ ކޮވިޑަށް ޕޮޒިޓިވް ވުމުން އެކަހެރިކޮށްފައެވެ. އެރަށް ފުރަބަނދުގައި އޮންނަތާ މަސް ދުވަހަށް ވުރެ ގިނަ ދުވަސް ވަނީ ވެފައެވެ.
