ލީބިޔާގައި ސަރުކާރާ ދެކޮޅުގެ ހަނގުރާމަވެރިންނާއެކު ހަނގުރާމަކުރަމުން ދިޔަ ރަޝިޔާގެ ކުލީ ސިފައިން އެ ގައުމު ދޫކޮށް ފުރަން ފަށައިފިއެވެ. ސަރުކާރުން މިކަން ހާމަކޮށްފައިވާއިރު، މިކަމަށް ހެކިދޭ ވީޑިއޯތަކެއްވެސް ވަނީ އާއްމުކޮށްފައެވެ.
ވެރިރަށް ޓްރިޕޮލީ (ޠަރާބުލުސް) ގައި އުފެދިފައި އޮތް ގާނޫނީ، އަދި އދ.ން ގަބޫލުކުރާ ސަރުކާރު، ގަވަމެންޓް އޮފް ނޭޝަނަލް އެކޯޑް (ޖީއެެންއޭ) ގެ ސިފައިން ދަނީ ގިނަ ސަރަހައްދުތަކެއްގައި ހަނގުރާމަވެރި ލީޑަރު ޚަލީފާ ހަފްތަރުގެ ހަނގުރާމަވެރިން ފަހަތަށް ޖައްސައި ބޮޑެތި ކުރިއެރުންތަކެއް ހޯދަމުންނެވެ.
ފާއިތުވި ދެތިން ދުވަހުގެ ތެރޭގައި ސަރުކާރު ސިފައިން ވަނީ ޓްރިޕޮލީ ގެ ދެކުނުގައި އޮންނަ އަސްކަރީ ތިން މަރުކަޒެއް ކަމުގައިވާ އައްޞަވާރީޚު، އަލްޔަރްމޫކު އަދި ޙަމްޒާ ހިފައި އެެތަންތަނުގައި ތިބި ހަފްތަރުގެ ހަނގުރާމަވެރިން ފަހަތަށް ޖައްސާފައެވެ.
މިއާއެކު ރަޝިޔާގެ ކުލީ ސިފައިން ވަނީ އެމީހުން ބަރު ހަތިޔާރު ހިފައިގެން ލީބިޔާއިން ފުރަން ފަށާފައެވެ. ޓްރިޕޮލީގެ އިރު ދެކުނުން 180 ކިލޯމީޓަރު ދުރުގައި އޮންނަ ބަނީވަލީދުގެ މޭޔަރު ސާލިމް ނުވައިރް ވިދާޅުވިގޮތުގައި ކުލީ ސިފައިން ފުރަނީ އެރަށުގެ އެއާޕޯޓުންނެވެ. އެއް ބަޔަކު 3 މަތިންދާބޯޓެއްގައި ފުރާފައި ވާއިރު އަނެއް ބަޔަކު ވަނީ އެއްގަމު މަގުން ލީބިޔާގެ މެދުތެރޭގައި އޮންނަ އަލްޖަފްރާ އަސްކަރީ މަރުކަޒާ ދިމާއަށް ދަތުރުފަށާފައެވެ.
މޭޔަރު ވިިދާޅުވި ގޮތުގައި ރަޝިޔާގެ ކުލީ ސިފައިން ގެންދިޔަ ބަރު ހަތިޔާރުގެ ތެރޭގައި 3 އެއާ ޑިފެންސް ސިސްޓަމްވެސް ހިމެނެެއެވެ.
އޭނާ އިތުރަށް ހާމަކުރެއްވި ގޮތުގަައި އެއާޕޯޓުގައި މިހާރުވެސް ރަޝިޔާއާއި ސީރިޔާ (ސޫރިޔާ) ގެ ކުލީ ސިފައިން ފުރުމުގެ އިންތިޒާރުގައި އެބަތިއްބެވެ. އޭނާ ލަފާކުރައްވާ ގޮތުގައި 1500 އާއި 1600 އާއި ދެމެދުގެ އަދަދެއްގެ ކުލީ ސިފައިން އެރަށުގެ އެއާޕޯޓުން ފުރަންވެެގެން އައެވެ.
ފާއިތުވި ހަފުތާގައި ލީބިޔާގެ އެންމެ މުހިއްމު އެއް އަސްކަރީ މަރުކަޒު އަލްވަޠިޔާ ޙަފްތަރުގެ ހަނގުރާމަވެރިންގެ އަތް ދަށުން ދިއުމާއެކު، އޭނާއަށް ދަނީ ބޮޑެތި އަސްކަރީ ނާކާމިޔާބީތަކެއް ކުރިމަތިވަމުންނެވެ.
ޓްރިޕޮލީގައި ގާއިމުވެފައި އޮތް ގާނޫނީ ސަރުކާރު ވައްޓާލައި ލީބިޔާގެ ވެރިކަން އަތުުލުމަށް ޚަލީފާ ޙަފްތަރު ފާއިތުވި އަހަރުގެ އެޕްރީލް މަަހު ވެރިރަށް ޓްރިޕޮލީއަށް ދޭން ފެށި ހަމަލާގައި ޔުނައިޓެޑް އަރަބް އެމިރޭޓްސް (ޔޫއޭއީ) އާއި، މިސްރުން ފާޅުގައި އެހީވަމުން ދާއިރު، ސައޫދީ އަރަބިއްޔާއިން ވެސް ދަނީ ފަރުދާގެ ފުރަގަހުން އޭނާއަށް އެހީވަމުންނެވެ.
