ކޯވިޑް19ގެ ސަބަބުން ދިމާވި ދަތިތަކުން އަރައިގަތުމަށް ސަރުކާރުން ކުރާ މަސައްކަތަށް ބޭރުގެ މާލީ އިދާރާތަކުން މިހާތަނަށް 61.9 މިލިއަން އެމރިކާ ޑޮލަރު ލިބިފައިވާ ކަމަށް ފައިނޭންސް މިނިސްޓަރ އިބްރާހީމް އަމީރް ވިދާޅުވެއްޖެެއެވެ. އެންއީއޯސީގައި މިހާރު ކުރިއަަށްދާ ނޫސްވެރިންގެ ބައްދަލުވުމުގައި މިނިސްޓަރ އަމީރް ވިދާޅުވީ ވޯލްޑް ބޭންކާއި، އޭޝިއަން ޑިވެލޮޕްމަންޓު ބޭންކް (އޭޑީބީ) އާއި، އިސްލާމިކް ޑިވެލޮޕްމަންޓް ބޭންކް (އައިޑީބީ) އާއި އިންޓަރނޭޝަނަލް މަނިޓަރީ ފަންޑުން އެހީ ދީފައިވާ ކަމަށެވެ.
އެހީގެ ގޮތުގައި ވޯލްޑް ބޭންކުން ދީފަިއވަނީ 17.3 މިލިއަން ޑޮލރެވެ. މި ފައިސާގެ ތެރެއިން ފަންސާސް އިންސައްތަ ދީފައިވަނީ ގްރާންޓުގެ ގޮތުގައި ކަމަށާއި އަނެއް ފަންސާސް އިންސައްތައަކީ ލޯނުގެ ގޮތުގައި ދީފަިއވާ އެހީކަމަށް މިނިސްޓަރ އަމީރް ވިދާޅުވިއެވެ. މީގެ ތެރެއިން ދިހަ މިލިއަން ހޭދަކުރާނީ ބަޖެޓުގެ ސަޕޯޓުގެ ގޮތުގައެވެ. އަނެއް 7.3 މިލިއަން ޑޮލަރު ހޭދަކުރާނީ ކޯވިޑް-19ގެ ސަބަބުން މެދުވެރިވި އިމަޖެންސީއަށް ތައްޔާރުވުމަށެވެ.
އޭޝިއަން ޑިވެލޮޕްމަންޓު ބޭންކު، އޭޑީބީގެ އޭޝިއާ ޕެސިފިކް ޑިޒާސްޓަރ ރެސްޕޯންސް ފަންޑުން އެހީގެ ގޮތުގައި 500،000 ޑޮލަރު ދީފައިވެއެވެ. މީގެ އިތުރުން ޓެކްނިކަލް އެހީގެ ގޮތުގައި 100،000 ޑޮލަރު ދީފައިވެއެވެ. މި ފައިސާ ބޭނުންކުރާނީ ކޯވިޑް ގެ ޚަަރަދުތަކަށެވެ.
އިސްލާމިކް ޑީވެލޮޕްމަންޓު ބޭންކުން ގްރާންޓާއި ލޯނުގެ ގޮތުގައި 15.05 މިލިއަން ޑޮލަރުގެ އެހީ ދީފައިވެއެވެ، މީގެ ތެރެއިން 15 މިލިއަން ދީފައިވަނީ ލޯނުގެ ގޮތުގައެވެ، އަދި 0.05 މިލިއަން ޑޮލަރަކީ ބޭހާއި ކާބޯތެކެއްޗާއި މެޑިކަލް ސާމާނު ގަތުމަށް ގްރާންޓުގެ ގޮތުގައި އެސްޓީއޯ އަށް ދީފައިވާ އެހީއެވެ.
އިންޓަނޭޝަނަލް މަނިޓަރީ ފަންޑުން ވަނީ އިންޓަރެސްޓް ފްރީ ލޯނުގެ ގޮތުގައި 28.9 މިލިއަން ޑޮލަރުގެ އެހީފޯރުކޮށްދީފައެވެ. މިއީ ބެލެންސް އޮފް ޕޭމަންޓު ދެމެހެއްޓުމަށް ދީފައިވާ ފައިސާއެވެ.
