ރާއްޖޭގެ ފޮރިން އެކްސް ޗޭންޖް ރިޒާވަށް އެއްވެސް ލޮޅުމެއް ނާރާނެ ކަމުގެ ޔަޤީންކަމާއި ދިވެހި ފައިސާގެ އަގު ހިފެހެއްޓޭނެ ކަމުގެ ފުރިހަމަ ޔަޤީންކަން މަޖިލިސް މެމްބަރުންނަށް ފިނޭންސް މިނިސްޓަރ އިބްރާހީމް އަމީރު ދެއްވައިފިއެވެ.
ރިޒާވް ބޭންކް އޮފް އިންޑިޔާ (އާރްބީއައި) އިން ހަމަޖެހިފައިވާ 400 މިލިއަން ޑޮލަރުގެ ކަރެންސީ ސްވޮޕްއާ އެކު ރިޒާވަށް އެއްވެސް ލޮޅުމެއް ނާރާނެ ކަމަށް މިނިސްޓަ ފާޙަގަ ކުރެއްވިއެވެ. ހިލޭ އެހީގެ ގޮތުގައި އިންޑިއާ ސަރުކާރުގެ އެސްބީއައި ކްރެޑިޓް ފެސިލިޓީސްގެ ގޮތުގައި 25 މިލިއަން ޑޮލަރު ލިބިފައި ވާކަމަށް ވެސް މިނިސްޓަރ ފާހަގަކުރެއްވިއެވެ. ސައުދީ ފަންޑުން 40 މިލިއަން ޑޮލަރާއި އިންޑިއާ ސަރުކާރުން ދެއްވި 100 މިލިއަން ޑޮލަރަކީ އަހަރު ބެޖެޓްގައި ފޯކަސް ކުރައްވައިފައި އެއްޗަކަށް ނުވާއިރު އެފައިސާ، ބަޖެޓަށް އިތުރުކުރުމަށް ހުށަހެޅި ފައިސާގެ ތެރޭގައި ހިމަނައިފައިވަނީ މަޖިލީހުން ފާސްކުރައްވައިގެން ޚަރަދު ކުރުމުގެ އުޞޫލު ހިފެހެއްޓުމަށްޓަކައި ކަމަށް މިނިސްޓަރ އަމީރު ފާހަގަ ކުރެއްވިއެވެ
ޓީބިލް ވިއްކަން ފެށުމުން މަނީ ސަފްލައި އިތުރުވެ ފައިސާގެ އަގު ވެއްޓިގެން ހިނގައިދާނެ ކަމުގެ ކަންބޮޑުވުން ފާހަގަކުރައްވައި މަރަދޫ ދާއިރާގެ މެމަބަރ އިބާރާޙިމް ޝަރީފު ފާޅުކުރެއްވި ޚިޔާލު ފުޅުތަކާ ގުޅިގެން، ފިނޭންސް މިނިސްޓަރ އަމީރު ވިދާޅުވީ، އެކި ބޭންކްތަކުން އެކްޓިވްކޮށް ޓްރެޒަރީ މާކެޓްގައި ބައިވެރިވާކަމުގައެވެ. އެހެންކަމުން، ޑޮމެސްޓިކްމާރކެޓަށް ޓްރެޒަރީ ބިލް ވިއްކުމުގައި ދާން ނުޖެހޭކަން ފާހަގަ ކުރެއްވިއެވެ. 506 މިލިއަން ރުފިޔާ ޓްރެޒަރީ ބިލް ވިއްކުމަށް ވަނީ ހަމަޖައްސަވައިފައެވެ.
" އަޅުގަނޑުމެންގެ ޓްރެޒަރީ މާރކެޓް، ސަބްސްކްރައިބް ކުރަން ބޭނުންވާ ވަރަށް ވުރެ އިތުރަށް އޯވަރ ސަބްސްކްރައިބް އެބަކުރޭ، އެހެންވީމާ އެސަބްކްރިބްޝަން ނުނަގާ މަޑުޖައްސާލާކަށް އަޅުގަނޑުމެނެއް ބޭނުމެއ ނުވޭ. އެގޮތަށް އަޅުގަނޑުމެންނަށް ލިބިފައިހުރި ޓްރެޒަރީ ބިލްވިއްކިފައި ހުރިކަން ފާހަގަ ކުރަން" މިނިސްޓަރ އަމީރު ވިދާޅުވިއެވެ.
އެސްއެމްއީ ބޭންކަށް ކަނޑައެޅިފައިވާ 350 މިލިއަން ރުފިޔާ އަކީ ވެސް، އެސްބީ އައި ކްރެޑިޓް ލައިންގެ ތެރެއިން ލިބިފައި ފައިސާއެއްކަން ފިނެންސް މިނިސްޓަރ ފާހަގަ ކުރެއްވިއެވެ.
506 މިލިއަން ރުފިޔާގެ ޓީބިލް ވިއްކަން ހަމަ ޖައްސަވައިފައި ވަނީ ޑެފިސިޓްގެ ގޮތުގައި ކަނޑައެޅިފައިވާ 986 މިލިއަން ރުފިޔާ ކުޑަކުރުމަށެވެ.
ބަޖެޓަށް ފައިސާ އިތުރުކުރުމަށް މަޖިލީހުގެ ރުހުން ހޯދުމަށް ހުށަހެޅިފައިވާ މައްސަލައިގައި ބައެއް މެމްބަރުން ވަނީ ބަޖެޓަށް ފައިސާ އިތުރުކުރުމުން ދިމާވެދާނެ ބައެއް މައްސަލަތަކާ ބެހޭގޮތުން ސުވާލުތައް ކުރިމަތި ކުރައްވައިފައެވެ.
މިދިޔަ އަހަރު ބަޖެޓް އެކުލަވާލެއްވި އިރުވެސް އެމަޝްވަރާ ތަކުގައި ބައިވެރިވަޑިގެންނެވުމުގެ ފުރިޞަތު ލިބިވަޑައިގެންނެވި ކަމަށާއި އެބަޖެޓްގައި އާސަރުކާރުގެ ސިޔާސަތުތަކާއި ވަޢުދުތަކަށް ފުރިހަމައަށް އަލިއަޅުވާލެވިފައި ނުވާކަށް އޭރުވެސް ފާހަގަ ކުރެއްވިކަމަށް ފިނޭންސް މިނިސްޓަރ ވިދާޅުވިއެވެ. އަދި މިއަހަރު ތެރޭގައި އާ ސަޕަލިމެންޓްރީ ބަޖެޓެއް ނުވަތަ ބަޖެޓަށް ފައިސާ އިތުރުކުރަން މަޖިލީހަށް ހުށަހަޅަން ޖެހިދާނެކަމަށް ކުރީ މަޖިލީހުން ބަޖެޓް އެކުލަވާލެއްވި އިރުވެސް ދަންނަވައިފައިވާނެކަމުގައެވެ.
މައިގަނޑު ތިން ކަމަށް ފައިސާ ހޯދަން ޖެހެނީ މިއަހަރު އާމްދަނީން ކުރަން ބޭނުންވާ ކަރަދުތައް ބަޖެޓްގައި ހިމެނުމަށާއި އާސަރުކާރުހެ ވަޢުދުތައް ފުރިހަމައށް ތަންފީޒު ކުރުމަށްޓަކައި މަޖިލީހުން ފާސްކޮށްގެން ޚަރަދު ކުރުމުގެ އުޞޫލު ހިފެހެއްޓުމަށްޓަކައި ކަމަށް މިނިސްޓަރ ފާހަގަ ކުރެއްވިއވެ
