މާލެއިން ދާ މީހުން ރަށްރަށުގައި ކަރަންޓީން ނުކުރަން ނިންމައިފައިވާ ކަމަށް ނެޝަނަލް އިމަރޖެންސީ އޮޕަރޭޝަންނުން ވިދާޅުވެއްޖެއެވެ.
އެންއީއޯސީގެ ތަރުޖަމާނު މަބްރޫކް ޢަބްދުލްޢަޒީޒު ވިދާޅުވީ ރަށްރަށަށް ދާމީހުން ކަރަންޓީނު ކުރެވެނީ މިހާރު އެކަމަށް ކަނޑައަޅައިފައިވާ އައިސޮލޭޝަން ފެސިލިޓީތަކުގައި ކަމަށެވެ. ކަރަންޓީނު ކުރެވިފައިވާ މީހުން ރަށަށް ދިއުމުގެ ހުއްދަ ދެވޭނީ 14 ދުވަސް ވުމުން ކޮވިޑަށް ޓެސްޓް ކުރުމަށް ފަހު ނެގެޓިވް ވުމުންކަމަށް މަބްރޫކް ވިދާޅުވިއެވެ. މިގޮތަށް ޢަމަލު ކުރައްވަމުން ދަނީ ރަށްރަށުގައި އިތުރަށް ބަލި ފެތުރުނަ ނުދެއްވުމުގެ ގޮތުންކަމަށް ވެސް މަބްރޫކް ވިދާޅުވިއެވެ. ޚާއްޞަ ހުއްދައެއް ހޯދައިގެން ނޫނީ މާލެއިން ރަށްރަށަށް އުޅަނދު ފަހަރަށް ނުދެވޭ ގޮތަށް ހަދައިފައި ވަނީ ވެސް ރަށަރަށް ބަލި ފެތުރުނަ ނުދެއްވުމަށްކަމަށް ފާހަގަ ކުރެއްވިއެވެ.
ބޭސްފަރުވާ އަށާއި އެހެނިހެން ބޭނުމަށް ކުރުމުއްދަތަށް މާލެއައިސް ތިބި މީީހުންގެ ތެރެއިން އެނބުރި ރަށްރަށަށް ދާން ބޭނުންވާ 272 މީހަކު މިހާރު ތިބީ ކަރަންޓީންގައެވެ.
ރާއްޖޭގެ ބައެއް ރަށްރަށުން މިހާރު ވެސް ވަނީ ކޮވިޑަށް ޕޮޒިޓިވް މީހުން ފެނިފައެވެ. އައްޑޫއިން އަލަށް ވަނީ ކޮވިޑަށް މީހަކު ޕޮޒިޓިވް ވެފައެވެ. އައްޑޫ ޕޮޒިޓިވް ކޭސްއާ ގުޅިގެން މުޅި އައްޑޫސިޓީ ވަނީ ލޮކްޑައުންގައެވެ.
