ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ވެބްސައިޓު ހެކުކުރުމަކީ ނާތަހުޒީބު އަމަލެއް ކަމަށް މިނިސްޓަރ އޮފް ކޮމިއުނިކޭޝަން، ސައެންސް އެންޑް ޓެކްނޯލޮޖީ މުޙައްމަދު މަލީޙް ޖަމާލް ވިދާޅުވެއްޖެއެވެ. މިނިސްޓަރ މިހެން ވިދާޅުވީ މިރޭ ކުރެއްވި ޓުވީޓެއްގައެވެ.
"މި ނާޒުކު ދަނޑިވަޅުގައި އެޗްޕިއޭގެ ވެބްސައިޓު ހެކު ކުރުމަކީ ނާތަހުޒީބު ފިނޑި އަމަލެއް" މިނިސްޓަރ ވިދާޅުވިއެވެ. އަދި އެ އަމަލު އެންމެ ހަރުކަށީ އިބާރާތުން ކުށްވެރިކުރާކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ތަހުގީގީ އިދާރާތަކާ ގުޅިގެން މިކަން ތަހުގީގުކުރައްވާނެ ކަމަށެވެ. މިހާރު ތަހުގީގު ފެށިގެން ކުރިއަށްދާ ކަމަަަށް ވެސް ވިދާޅުވިއެވެ.
އެޗްޕީއޭގެ ވެބްސައިޓު ހެކުކޮށްފައިވަނީ މިއަދުއެވެ. ވެބްސައިޓު ހެކުކޮށް ކޯވިޑާ ދެކޮޅަށް ސަރުކާރުން ކުރަމުންދާ މަސައްކަތާ ގުޅިގެން ސަރުކާރަށް ބޮޑެތި ތުހުމަތުތަކެއް ކޮށް، ސަރުކާރަށް އިންޒާރުދީ ވެބްސައިޓުގައި މެސެޖު ޝާއިއުކޮށްފައިވެއެވެ. މިހާރު ވެބްސައިޓުވަނީ ޑައުންކޮށްފައެވެ.
