ގިނަ މީހުންނަށް ލަތީފާ ޤާސިމް ނުވަތަ ލަތީ އެނގިފައިވަނީ ދޫފަސޭހަ ވާހަކަ ދެއްކުންތެރިއެއްގެ ގޮތުގައެވެ. ކުޅަދާނަ ލޯޔަރެއްގެ ގޮތުގައެވެ. ހުނަރުވެރި ހުށަހެޅުން ތެރިއެއްގެ ގޮތުގައެވެ. މޮޅު ލިޔުންތެރިއެއްގެ ގޮތުގައެވެ.
ލަތީ އަރަބިއްޔާ ނިންމާލެއްވީ ހުރިހާ ގޮތަކުން ވެސް އެންމެ މޮޅު ދަރިވަރުގެ ގޮތުގައެވެ. އެތައް ބައިވަރު އަދީބުން އުފެއްދި މައުހަދު ނިންމާލީ އަދަބީ ގޮތުން އެންމެ މޮޅު ދެވަނަ ދަރިވަރުގެ ގޮތުގައި ޖެހިޖެހިގެން ދެއަހަރު އުޅުއްވުމަށްފަހުގައެވެ. ޤައުމީ ފެންވަރުގެ އަދަބީ މުބާރާތްތަކުން ލަތީ ހޯއްދެވި ރަންވަނަ ތަކުން މައުހަދުގެ ނަން އަދަބީ ޖައްވުގައި ވިދާ ބަބުޅާލި އެވެ. ވާހަކަ ދެއްކުމާއި ބަހުސް މުބާރާތްތަކުންނެވެ. ޅެން ހެދުމާއި މަޒުމޫނު ލިޔުމުގެ މުބާރާތްތަކުންނެވެ.
ދޫފަސޭހަ ވާހަކަ ދެއްކުން ތެރިޔާއަކީ ވާހަކަ ދެއްކުމުގެ ޤައުމީ މުބާރާތުގެ ފަނޑިޔާރެކެވެ. ދީނީ ގޮތުން ހޭލުންތެރިކަން އިތުރުކުރުމަށް ނެރެމުންދިޔަ "ދަރުމަ" މަޖައްލާ އުވިދިއުމާ ހަމައަށް ވެސް މޮޅު ގިނަ ލިޔުންތަކެއް ލިޔުއްވައިފައިވާ އެމައްޖައްލާގެ އެސިސްޓެންޓް އެޑިޓަރ ވެސް މެއެވެ. ޓީވީ ޕްރޮގްރާމް އުފައްދައި ހުށަހެޅުއްވުމަކީ އަދަބީ ދާއިރާއިން ލިބިވަޑައިގެންފައިވާ ތަޖްރިބާތަކުން ލަތީއަށް މާދަނގޫ ކަމަކަމަށް ވެވަޑައެއް ނުގެންނެވިއެވެ. 2011 ވަނަ އަހަރުގެ ޓީވީއެމްގެ އުފެއްދުމެއްކަމަށްވާ "ފަސްފިޔަ" އުފައްދައި ހުށަހެޅުއްވީ ލަތީއެވެ. ހަމައެއާއެކު ޖުޑިޝަރީއަށް ހޭލުންތެރި ކުރުމަށް "މީޒާން" ގެ ނަމުގައި 70 އަށް ވުރެ ގިނަ ޕްރޮގާރާމް އުފައްދަވައި ހުށަހެޅުއްވިއެވެ.
ޤާނޫނީ ވަކީލުކަމަކީ އެދާއިރާއަކަށް ޚާއްޞަވެ ދިރިއުޅުއްވުމަށް ލަތީ ކުރައްވަމުން ގެންދަވާ މަސައްކަތެވެ. ލަތީ ވަނީ ޤާނޫނީ ދާއިރާއިން މާސްޓަރސް ހައްދަވައިފައެވެ. ޖުޑިޝަރީގެ ސްޕޯރކްސްޕާސަން ނުވަތަ ތަރުޖަމާނުކަމާއި ޤާނޫނީ ދާއިރާއިން ތަފާތު ކޮމެޓީތަކުގެ މެމްބަރުކަން ކުރެއްވިއެވެ. ޖޭއެސްސީގައި ޤާނޫނީ ވަކީލުން ތަމްޞީލް ކުރާ މެމްބަރުކަން ވެސް ލަތީ ވަނީ 2014 ން 2019 އަށް ކުރައްވައިފައެވެ. ނަވާރަ ވަނަ ރައްޔިތުންގެ މަޖިލީހުން ޖޭއެސްސީއާއެކު ބޭއްވި ފުރަތަމަ ބައްދަލު ވުމުގައި ލަތީ ވަނީ ވަރަށް ތަފްޞީލްކޮށް ޝަރުޢީ ދާއިރާއަށް ހުރި ގޮންޖެހުންތައް ފާހަގަކުރައްވައިފައެވެ. އެގޮތުން ލަތީ ފާހަގަކުރެއްވި އެންމެ މުހިންމު ކަމަކީ ޖޭއެސްސީ ސީޔާސީ ނުފޫޒުން އެއްކިބާކުރުމަށް ޖޭއެސްސީގެ ކޮމްޕޮޒިޝަން ނުވަތަ ޖޭއެސްސީ އުފެދިފައިވާ ގޮތް ބަދަލު ކުރުމެވެ. ނަމަވެސް އެއަޑު އެހި މެމްބަރަކު ހުރި ހެނެއް ހިއެއް ނުވެއެވެ.
ލަތީ މިހާރު މަސައްކަތް ކުރައްވަނީ "ލަފާ ޗެމްބާރސް" ގެ މެނޭޖިން ޕާޓްނަރެއްގެ ގޮތުގައި ކޯޓްތަކުގައި ވަކާލާތު ކުރެއްވުމުގައެވެ. މީގެ އިތުރުން ވިލާ ކޮލެޖްގެ ޝަރިޢާ އެންޑް ލޯ ފެކަލްޓީގެ ޕާރޓްޓައިމް ލެކްޗަރާއެއްގެ ގޮތުގައި ވެސް މަސައްކަތް ކުރައްވައެވެ.
ކުޅާދާނަ ޤާނޫނީ ވަކީލްގެ މީނޫންވެސް ކިތަންމެ ވާހަކައެއް އެބަހުއްޓެވެ. ކަންކަމުގައި ގެންގުޅުއްވާ އުފެއްދުންތެރި ޔުނީކް ނުވަތަ ތަފާތު ގޮތްތަކެވެ. ކެއްކުމުގެ ހުނަރެވެ. ލަތީގެ ޚާއްޞަ އެއްޗަކީ ޑެވިލްޑް ޗިކަން އާއި ތަފާތު ވައްތަރުގެ ސެލަޑް ނުވަތަ ސަޓަންޏެވެ. އާއިލީ ކެއުންތަކުން މިތަކެތީގެ ރަހަ ބާލާލަން ލިބުނު ގާތްތިމާގެ މީހުންނާއި ރައްޓެހިންގެ ހިތްވަނީ މިތަކެއްޗަށް އަތުލައިފައެވެ.
"ރަހަބަލާފަ ބުނާނެ ކިހިނެއްތޯ ތައްޔާރުކުރީ، ރެސިޕީ ހޯދަންވެސް ގުޅާނެ." ލަތީގެ ކެއްކުން ތަކާ ގުޅޭ ގޮތުން ވިދާޅުވިއެވެ.
ކެއްކުމުގައި ވެސް އާރަހަތައްޓެސްޓްކޮށް ތަޖުރިބާ ކުރައްވަން ލަތީ ބޭނުންވެ ވަޑައިގަންނަވައެވެ. ކެއްކުމުގެ ޝައުޤުވެރިކަން ހުރުމުގެ ސަބަބުނު ފޮތް މަޢުރަޒުތަކުން ކުރިން އެންމެ ގިނައިން ލަތީ ބައްލަވައިގަނެފައިވާ ފޮތްތަކުގެ ތެރޭގައި ރެސިޕީ ފޮތްތައް ހިމެނެއެވެ. ނަމަވެސް ކެއްކުމުގެ އެންމެ ފަހުގެ މަޢުލޫމާތު މިހާރު ހޯއްދަވަނީ އިންޓަރނެޓްގެ ޒަރީއާއިންނެވެ. އެގޮތުން އެންމެ ގިނައިން ތައްޔާރު ކުރެވޭ އެކައްޗަކީ ތާފަތު ވައްތަރުގެ ސަޓަންޏެވެ. މާލޭގެ ރެސްޓޯރެންޓްތަކުން "ޝެފް ސެލަޑް" ލިބެން ފެށުމުގެ މާކުރިން ލަތީގެ ބަދިގޭގައި އެ ސަޓަނި ތައްޔާރުކޮށް ބޭނުން ކުރެއެވެ. ފޮނިކާތަކެއްޗަކަށް ލަތީ ޝައުޤުވެރިވެ ވަޑައެއް ނުގަންނަވައެވެ. މިއީ ފުރިހަމަ ޞިއްހަތެއްގައި ލޫޅާފަތިކޮށް ހުންނެވުމަށް ލެއްވި ނަޞީބެއް ކަމަށް އޭނާ ދެކެވަޑައި ގަންނަވައެވެ.
"ރިލެކްސް" ވެލަން އެކި މީހުން ކޮށްލާ ތަފާތު ކަންކަން ހުރެއެވެ. ލަތީއަށް އެންމެ ބޮޑަށް ރިލެކްސް ވެލެވޭ ކަމަށް ވަނީ ބޭނުންވާ ރަހައެއްގެ ސައެއް ހިއްޕެވުމުންނެވެ. ލަތީގެ ބަދިގެއިން ތަފާތު އެކި ރަހަތަކުގެ ސައި ލިބެން އެބަހުއްޓެވެ. އެންމެ ގިނައިން ހިއްޕެވޭ ސައިގެ ތެރޭގައި ފޮނިތޮށީގެ ރަހަތަކާއި ލުނބޯގެ ރަހަތައް ހިމެނެއެވެ. ސައި ބުއިމަށް ތައަޔާރުކޮށްފައި ހުންނަ ތަފާތު ރީތި ތަށިތަށީގައި ބޭނުންވާ ރަހައެއްގެ ސައެއް ހިއްޕެވުމުން ލިބި ވަޑައިގަންނަވާ ހިތްހަމަ ޖެހުން އިތުރުވާކަމަށް ވެސް ލަތީ ވިދާޅުވިއެވެ. އެހެންކަމުން ރާއްޖެއިން ބޭރަށް ވަޑައިގެން އުޅުއްވާއިރު އެންމެ ބޮޑަށް ހޯއްދަވަން ބެނުންފުޅުވަނީ ސައިބޯ ރީތީ ޖޯޑެވެ. ތިމާގެ މީހުންނާއި ރަށްޓެހިންގެ ފަރާތުން ލަތީއަށް އެންމެ ގިނައިން ލިބިވަޑައިގަންނަވާ ހަދިޔާއަކީ ވެސް ތަފާތު ރަހަތަކުގެ ސައެވެ.
ލަތީގެ ފަރާތުން ފާހަގަ ކުރެވުނު އަނެއްކަމަކީ ކޮންމެ ކަމެއް ކުރުމުގައި ގެންގުޅުއްވާ ތަފާތު ކަމެވެ. ތަފާތު މޫސުމަށް ފެތޭ ގޮތަށް ގޭތެރޭގެ ޑެކަރޭޝަން ބަދަލު ކޮށްލުމެވެ. ދަރިންނަށާއި ގާތްތިމާގެ މީހުންނާއި އަދި ރައްޓެއްސަކަށް ހަދިޔާއެއް ދިނަސް ތަފާތު އުފެއްދުން ތެރި ގޮތަކަށް އެއެއްޗެއް ތައްޔާރުކޮށްފައި ދިނުމެވެ. އެހެންނޫނީ އެއްޗެއް ދެވުނު ކަމުގެ ހިތްހަމަ ޖެހުމެއް ލަތީއަކަށް ލިބިވަޑައެއް ނުގަންނަވައެވެ.
"ފިހާރަޔަކުން ގަނެފައި އެއްޗެއް ދިނުމަކުން، ހަދިޔާއެއް ދެވުނު ކަމުގެ ހިތްހަމަ ޖެހުމެއް ނުލިބޭ. ހިތްހަމަ ޖެހެނީ އެމިއްލަ ގޮތަކަށް ކޮންމެ އެއްޗެއް ވެސް ތައްޔާރުކޮށްލައިފައި ދެވުމުން." އުފެއްދުން ތެރިކަމުން ލަތީއަށް ލިބިވަޑައިގަންނަވާ ހިތްހަމަ ޖެހުން ހާމަކުރައްވަމުން ވިދާޅުވިއެވެ.
