އިންޓަރނެޓް އަގު ހެޔޮކުރުމުގެ ގޮތުން ގެންނަ ބަދަލުތައް ފެށެނީ އޭޕްރީލް ފުރަތަމަ ދުވަހުން ފެށިގެންކަމަށް ކޯވިޑް 19 އާ ބެހޭގޮތުން މަޢުލޫމާތު ދެއްވުމަށް ސަރުކާރުން ކަނޑައަޅައިފައިވާ ތަރުޖަމާނު މަބްރޫކް ޢަޒީޒު ވިދާޅުވެއްޖެއެވެ.
ނެޝެނަލް އިމަރޖެންސީ އޮޕަރޭޝަން ސެންޓަރގައި މިރޭ ބޭއްވި ނޫސްވެރިންގެ ބައްދަލުވުމުގައި މަބަރޫކް ވިދާޅުވީ އިންޓަރނެޓްގެ އަގު ހެޔޮކުރުމާ ގުޅޭގޮތުން މުޢާސަލާތީ ޚިދުމަތްދޭ ކުންފުނިތަކާއެކު ސަރުކާރުން ކުރައްވާ މަޝްވާރާތައް މިހާރު ވަނީ ނިމިފައި ކަމަށެވެ. ގެންނަ ބަދަލުތަކަކީ ކޮބައިކަން ދެދުވަހެގެ ތެރޭގައި މުޢާސަލާތީ ޚިދުމަތްދޭ ކުންފުނިތަކުން ހާމަކޮށްދޭނެކަމަށް ވެސް މަބްރޫކް ވިދާޅުވިއެވެ. އެކަން ހާމަކުރައްވާނީ މުޢާސަލާތީ ޚިދުމަތްދޭ ކުންފުނިތައް ގުޅިގެން ބާއްވާ ޕްރެސް ކޮންފަރެންސެއްގައި ކަމަށް ވެސް އޭނާ ވިދާޅުވިއެވެ.
ކޮވިޑް 19 އާ ގުޅިގެން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ނޫސްވެރިނާ ބައްދަލު ކުރައްވައި ވިދާޅުވެފައި ވަނީ މިދުވަސްވަރު އިންޓަރނެޓް ބޭނުންކުރާ މިންވަރު ވަރަށް ބޮޑަށް އިތުރުވެފައިވާކަން އެމަނިކުފާނަށް ވެސް ފާހަގަކުރެއްވޭ ކަމަށެވެ. އަދި އެކަމަށް ރަނގަޅު ލުޔެއް ހޯދައިދޭންޖެހޭ ކަމަށް އެމަނިކުފާނު ވެސް ޤަބޫލުފުޅުކުރައްވާ ކަމަށެވެ. އަދި ކުރިއަށް އޮތް ދެތިން ދުވަހުގެ ތެރޭގައި، އެކަމުގައި ސަރުކާރުގެ ނިންމެވުން ރައްޔިތުންނާ ޙިއްޞާކުރައްވާނެކަމަށެވެ.
އިންޓަރނެޓް އަގާމެދު ސަރުކާރުން ވަކި ގޮތެއް ނިންމަވާނެ ކަމަށް ރައީސުލް ޖުމްހޫރިއްޔާ ހާމަކުރެއްވީ އިންޓަރނެޓްގެ އަގާމެދު ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅުކުރައްވަމުން ދަނިކޮށެވެ. އިންޓަރނެޓްގެ އަގުގެ މައްސަލައިގައި ކަމާބެހޭ ފަރާތްތައް މަޖިލީހަށް ޙާޒިރުކޮށް ދެއްވުމަށް އެދި ރައްޔިތުންގެ މަޖިލީހުގެ ރައީސަށް ގަލޮޅު ދެކުނު ދާއިރާގެ މެމްބަރ މީކާއީލް ނަސީމް ވަނީ ސިޓީއެއްވެސް ފޮނުއްވައިފައެވެ.
