އަދިވެސް މައިތިރިކުރެވޭނެ ގޮތެއް ނެތި، ހަލުވިކަމާއެކު ފެތުރެމުންދާ ކޮވިޑް- 19 (ކޮރޯނާ ވައިރަސް) ފާއިތުވި އަހަރުގެ ޑިސެންބަރު މަހު މެދުތެރޭގައި ޗައިނާގައި ފެތުރެން ފެށި ގޮތަށް އަދި މައިތިރިވެފައި ނުވެއެެވެ. އިއްޔެއާއި ހަމައަށް އެ ވައިރަސް މިވަނީ ދުނިޔޭގެ 195 ގައުމުގެ ތެރެއިން 136 ގައުމަށް ވަދެފައެވެ. ވައިރަސް ފެތުރުން ކޮންޓުރޯލުކުރުމަށް ދުނިޔޭގެ ގައުމުތަކުން ދަނީ އާދަޔާއި ޚިލާފަށް ވަރުގަަދަ ގިނަ ފިޔަވަޅުތަކެއް އަޅަމުންނެވެ. އިއްޔެ ބައެއް ގައުމުތަކުން މިވަނީ އިތުުރު ފިޔަވަޅުތަކެއް އަޅާފައެވެ.
ފިލިޕީންސް ސަރުކާރުން އިއްޔެ ވަނީ އެ ގައުމުގެ އެންމެ ބޮޑު ޖަޒީރާ އަދި އާބާދީގެ ތިންބައިކުޅަ އެއްބައި މީހުން އުޅޭ ސަރަހައްދު ކަމުގައިވާ ލުޒޯން ބަންދުކޮށްފައެވެ. ވެރިރަށް މެނީލާ ވެސް ހިމެނޭ އެ ޖަޒީރާގައި 55 މީހުން ދިރިއުޅެއެވެ. ރައީސު ރޮޑްރިގޯ ޑުޓެރްޓޭ ނެރެއްވި އަމުރެއްގައި ވާގޮތުން އަސާސީ ބޭނުންތަކަށް ތަކެތި ގަތުމަށް މެނުވީ އެއްވެސް މީހަކަށް ގެއިން ނުނުކުމެވޭނެއެވެ. އާއްމު ދަތުރުފަތުރުގެ ނިޒާމު އެކުގައި ހުއްޓުމަކަށް ގެނެސްފައި ވާއިރު، ކާބޯތަކެއްޗާއި، އަސާސީ ބޭނުންތަކަށް ބޭނުންވާ ތަކެތި ވިއްކާ ތަންތަނާއި، ބޭސް ފިހާރަތަކާއި، ބޭންކްތައް ފިޔަވައި އެހެން ވިޔަފާރިތަައް ވަނި ބަންދުކޮށްފައެވެ. ޕލިޕީންސްގައި 10 ދުވަސް ކުރިން ތިބީ ކޮވިޑް-19 ޖެހިފައި ތިބި ތިން މީހުންނެވެ. އިއްޔެއާއި ހަމައަށް އައިއިރު އެ އަދަދު 142 އަށް އަރައި 12 މީހުން ވަނީ މަރުވެފައެވެ.
ގަލްފުގެ ގައުމުތައް ކަމުގައިވާ ޔުނައިޓެޑް އަރަބް އެމިރޭޓްސް (ޔޫއޭއީ) އާއި ޤަޠަރުން އިއްޔެ ވަނީ މިސްކިތްތަކުގައި ޖަމާއަތުގައި ނަމާދުކުރުމާއި، ހުކުރު ނަމާދު ކުރުން ހުއްޓާލުމަށް ނިންމާފައެވެ. ޔޫއޭއީގައި ކޮވިޑް- 19 ޖެހިފައިވާ މީހުންްގެ އަދަދު 98 އަށް އަރާފައިވާ އިރު، ޤަޠަރުގައި މި ބަލީގެ 410 މީހުން އެބަތިއްބެވެ.
ލެބެނާން (ލުބްނާން) އިން ވަނީ އެއްގަމު މަގުން އެ ގައުމަށް އެތެރެވެވޭ ހުރިހާ ދޮރާށިތަަކެއް ބަންދުކޮށް، ވެރިރަށް ބޭރޫތުގެ އިންޓަނޭޝަނަލް އެއާޕޯޓު ބަންދުކޮށްފައެވެ.
މީގެ ހަފުތާއެއްހާ ދުވަސްކުރިން ފުރަތަމަ ކޮވިޑް- 19 ފެނުނު ތުރުކީގައި ރެއާއި ހަމައަށް އައިއިރު އެ އަދަދު ވަނީ 47 އަށް އަރާފައެވެ. އެހެންކަމުން ތުރުކީން ވެސް ރޭ ވަނީ ވަރުގަދަ ފިޔަވަޅުތަކެއް އިއުލާން ކޮށްފައެވެ. މިސްކިތްތަކުގައި ޖަމާއަތުގައި ނަމާދުކުރުމާއި، ހުކުރު ކުރުން ހުއްޓާލަން އަންގާފައި ވާއިރު، ކެފޭތަކާއި، ނައިޓް ކްލަބްތަކާއި، ޖިމްތަކާއި، ގޭމް ސެންޓަރުތައް ފަދަ މީހުން އެެއްވެ އުޅޭ ހުރިހާ ތަނެއް ރޭ މެންދަމު 12:00 އިން ފެށިގެން ބަންދުކުރަން ވަނީ ނިންމައިފައެވެ.
އިއްޔެ ޖަރުމަނުން ވެސް ވަނީ ފައްޅިތަކަށް އަޅުކަންކުރަން ދިއުން ހުއްޓާލުމާއި، ކޮންމެެހެން ހުޅުވަންޖެހޭ ފިހާރަތައް ނޫނީ ނުހުޅުން އެންގުމަށް ވިސްނަމުންދާ ކަމަށް ބުނެފައެެވެ. ޖަރުމަނުގައިވެސް މި ބަލި ޖެހުނު މީހުންގެ އަދަދު 7 ހާހަށްވުރެ މައްޗަށް ގޮސްފައި ވާއިރު، މި ބަލީގައި 17 މީހަކު ވަނީ މަރުވެފައެވެ.
ޔޫރަޕިއަން ޔުނިއަން (އީޔޫ) ގެ ވެރިޔާ ވެސް އިއްޔެ ވަނީ އީޔޫ 'ބަންދުކުރުމަށް' ގޮވައިލައްވާފައެވެ.
"ކޮންމެހެން ކުރަންޖެހޭ ދަތުރުތައެް މެނުވީ އީޔޫއަށް ނުކުރެވޭ ގޮތް ހުރިހާ ސަރުކާރު ތަކުން ހެދުމަށް އަހަރެން ހުށަހަޅަން." ޔޫރަޕިއަން ކޮމިޝަންގެ ރައީސާ އުރްސުލާ ވޮންޑަ ލެޔެން ވިދާޅުވެފައި ވެއެވެ.
ދުނިޔޭގެ ގައުމުތަކުން ކޮވިޑް- 19 އާއި ހަނގުރާމަކުރުމަށް ގިނަ ފިޔަވަޅުތަކެއް އަޅަމުން ދާއިރު ވެސް އެ ވައިރަސް 1 ލައްކަ 82 ހާހަށް ވުރެ ގިނަ މީހުންނަށް ޖެހި، 7 ހާހަށް ވުރެ ގިނަ މީހުން މިވަނީ މަރުވެފައެވެ.
