ކޮވިޑް 19 އަށްޝައްކުކުރެވޭ އަލާމާތްތައް ހުރެގެން އދ.ވިލަމަންދޫ ރިސޯޓު އައިލަންޑުން ސާމްޕަލް ނަގާ ޓެސްޓްކުރި މީހާ ވަނީ ކޮވިޑް 19 ނެގަޓިވް ވެފައި ކަމަށް ހެލްތު ޕްރޮޓެކްޝަން އެޖެންސީން ބުނެވިއެވެ.
އެ ޖެންސީން ކުރައްވާފައިވާ ޓުވީޓުގައި ވިދާޅުވެފައިވަނީ އެ ކޭސް ނެގެޓިވްވުމުން އެރަށަށް އަރައި ފޭބުމަށް މިވަގުތު އެއްވެސް ހުރަހެއް ނެތްކަމަށެވެ.
"ކޮވިޑް 19ޝައްކުކުރެވޭ އަލާމާތްތައް ހުރެގެން އދ.ވިލަމަންދޫ ރިސޯޓު އައިލަންޑުން ސާމްޕަލް ނަގާ ޓެސްޓްކުރި މީހާ ވަނީ ކޮވިޑް 19 އަށް ނެގަޓިވް ވެފާ. ޓެސްޓްގެ ނަތީޖާއާއި ވިދިގެން އަދި "ކޮންޓެކްޓް ޓްރޭސިންގ" ނިމުމާއި ގުޅިގެން މިރަށަށް އަރާ ފޭބުމުގެ އެއްވެސް ހުރަހެއް ނެތް،" އެޗުޕީއޭއިން ވިދާޅުވެފައިވެއެވެ.
ރާއްޖޭގެ މިވަގުތުގެ ހަލާތަކަށް ބަލާއިރު ކުރެއްދޫގައި 5 މީހަކު ވަނީ އައިސޮލޭޓު ކޮށްފައެވެ. މާގިރި ހޮޓަލުން ޝައްކު ކުރެވުނު މީހުންގެ ތެރެއިން 8 މީހަކު ވަނީ ވިލިވަރުގައި ކަރަންޓީނުކޮށްފައެވެ. އަދި ހޯމް އައިސޮލޭޝަންގައި ފަސް މީހަކު އެބަ ތިބިއެވެ. އައްޑޫ ސިޓީގައި އެކަކު ވަނީ ހޯމް އައިސޮލޭޝަންގައި ބަހައްޓައިފައެވެ. އެއީ ކުރެއްދޫ އައިލެންޑް ރިސޯޓު ކޮންޓެކްޓް ޓްރޭސިންގެ ތެރޭގައި ހިމެނޭ މީހެކެވެ.
