ރިޔާސީ ބަޔާނަށް ޖަވާބު ދެއްވަމުން، ފަސް އަހަރުގެ ޖަލު ޙުމެއްތަންފީޒުކުރަމުންދާ ކުރީގެ ރައީސް ޢަބްﷲ ޔާމީން ވަގުތުން މިނިވަން ކުރުމަށް ރައްޔިތުންގެ މަޖިލީހުގެ އިދިކޮޅު ލީޑަރ އޭދަފުށީ ދާއިރާގެ މެމްބަރ އަޙުމަދު ސަލީމް ގޮވާލައްވައިފިއެވެ.
ސަލީމް ވިދާޅުވީ އިދިކޮޅު ލީޑަރު ޖަލަށް ލުމަކީ ޑިމޮކްރަސީގައި ފަހަތަށް އެޅި ފިޔަވަޅެއްކަމަށެވެ. ރައީސްޔާމީނަކީ ރާއްޖެއަށް ޒަމާނީ ޑިމޮކްރަސީ ތަޢާރަފުވިފަހުން ފަސް އަހަރުގެ ވެރިކަމެއް ފުރިހަމަ ކުރެއްވި ފުރަތަމަ ރައީސްކަން ސަލީމް ފާހަގަ ކުރެއްވިއެވެ. މިދިޔަ އަހަރު ނުހައްޤުންން ދެފަހަރަށް ރައީސް ޔާމީން ޖަލަށް ލައިފައިވާކަމަށާއި އަދި މިހާރު ފަސްއަހަރުގެ ޖަލު ޙުކުމެއް ތަންފީޒުކުރަމުން ދާކަން ފާހަގަ ކުރެއްވިއެވެ.
މަލްޓިޕާޓީ ޑިމޮކްރަސީއެއްގެ އެންމެވަރުގަދަ އުންސުރަކީ ވާދާވެރި ސިޔާސީ ޕާޓީތަކުން ސިޔާސީ ދަނޑުގައި ޙަރަކާތްތެރިވުންކަމަށް ސަލީމް ފާހަގަ ކުރެއްވިއެވެ. އަދި ވާދަވެރި ސިޔާސީ ޕާޓީތަކުން ސަރުކާރު ޒިންމާދާރު ކުރުވުން ކަމަށް ވެސް ވިދާޅުވިއެވެ. މި މަފްޙޫމްގައި އިދިކޮޅު ސިޔާސީ ލީޑަރަކީ ހުރިހާ ގޮތަކުން ވެސް ރައްޔިތުންނާ އޭކީގައި ސަރުކާރު ޖަވާބުދާރީ ކުރުމަށް އިސްވެ މަސައްކަތްކުރަންޖެހޭ އެންމެ ނުފޫޒުގަދަ ފަރާތްކަން ވެސް ސަލީމް ފާހަގަ ކުރެއްވިއެވެ.
"އިދިކޮޅު ސިޔާސީ ލީޑަރ ޖަލަށް ލުމަކީ ޑިމޮކްރަސީ ޙަޔާތުހައި ފަހަތަށް އެޅި ފިޔަވަޅެއް. ވާދަވެރި ސިޔަސީ ޕާޓީތަކަށް ކުރިމަތިކުރުވި ވަރަށް ބޮޑު ގޮންޖެހުމެއް. ވީމާ ޖަލަށް ލައިފައިވާ އިދިކޮޅު ސިޔާސީ ލީޑަރ ވަގުތުން މިނިވަން ކުރުމަށް ސަރުކާރަށް ގޮވާލަން" ސަލީމް ވިދާޅުވިއެވެ.
ރިޔާސީ ބާޔާނަށް ދެއްވި ޖަވާބުގައި ސަލީމް ވަނީ މިސަރުކާރުގެ ހިންގުން ލަސްކަން ފާހަގަ ކުރައްވައި ރައްޔިތުން އުއްމީދު ކުރި ނަތީޖާއެއް ނުފެންނަކަން ވެސް ފާހަގަ ކުރައްވައިފައެވެ. ހަމައެއާއެކު ރައީސް ޔާމީންގެ ސަރުކާރުގައި ހިންގި ބޮޑެތި މަޝަރޫޢުތަކުގެ ތަފާސް ހިސާބުތައް ހާމަކުރައްވައި އެސަރުކާރުގެ މަޝްރޫޢުތަކުގެ ކާމިޔާބީ ވަނީ ފާހަގަ ކުރައްވައިފައެވެ.
ރައީސް އިބްރާހީމް މުޙައްމަދު ޞާލިޙް ރައްޔިތުންގެ މަޖިލީހުގައި ރިޔާސީ ބަޔާން އިއްވީ މިމަހު ތިންވަނަ ދުވަހުއެވެ. ރައީސުލް ޖުމްހޫރިއްޔާގެ ރިޔާސީ ބަޔާނަށް ޖަވާބު ދިނުން މަޖިލީހުގައި ކުރިއަށް ދަނީ ނުވަ އަހަރަށް ފަހުކަމަށް ރިޔާސީ ބަޔާނަށް ޖަވާބު ދެއްވަމުން އޭދަފުށީ ދާއިރާގެ މެމްބަރ ސަލީމް ފާހަގަކުރެއްވިއެވެ. އެންމެ ފަހުން ރިޔާސީ ބަޔާނަށް ޖަވާބު ދެއްވައިފައިވަނީ 2011 ވަނަ އަހަރު އޭރުގެ މަޖިލީހުގެ އިދިކޮޅު ލީޑަރ ގޮތުގައި ހުންނެވީ ޑީއާރުޕީގެ މެމްބަރ އަޙްމަދު ތަސްމީނު ޢަލީއެވެ.
