މެލޭޝިޔާގެ ބޮޑުވަޒީރު މަހާތީރު ބިން މުޙައްމަދު މަގާމުން އިސްތިއުފާ ދެއްވަން ނިންމަވައި، އެގައުމުގެ ރަސްގެފާނު ޢަބްދުﷲއަށް މިއަދު އިސްތިއުފާ ހުށަހަޅުއްވައިފިއެވެ. އޭނާ ބޮޑުވަޒީރުކަމުން އިސްތިއުފާ ދެއްވިތާ ދަ ގަޑިއިރު ފަހުން އޭނާ ވަނީ އޭނާގެ ޕާޓީ، ޕާޓީ ޕްރިބޫމީ ބެރްސަތޫ މެލޭޝީޔާ (ޕީޕީބީއެމް) ގެ ލީޑަރުކަމުންވެސް އިސްތިއުފާދެއްވާފައެވެ.
ޑރ. މަހާތީރު އިސްތިއިފާދެއްވުމާއެކު ވެރިކަން ކުރާ ކޯލިޝަން ޕަކަޓާން ހަރަޕާން (ޕީއެ×ޗް) ގިނަ މެންބަރުންތަކެއް ވަނީ ކޯލިޝަން ދޫކޮށްފައެވެ. އެހެންކަމުން، ޕީއެޗް ކޯލިޝަނަށް މިހާރު ވަނީ ގާނޫނުހަދާ މަޖިލީހުގެ އަޣުލަބިއްޔަތު ގެއްލިފައެވެ. މަހާތީރުގެ ޕާޓީ، ޕީޕީބީއެމް، އެޕާޓީގެ 26 މެންބަރުންނާއެކު ކޯލިޝަނުން ވަކިވެފައި ވާއިރު، އަންވަރު އިބްރާހީމްގެ ޕާޓީ، ޕާޓީ ކެއަޑިލާ ރަކްޔަތު (ޕީކޭއާރް) ގެ 11 މެންބަރުން ވަނީ އެ ޕާޓީން ވަކިވެ، ވަކި ބްލޮކެއް އުފައްދާފައެވެ.
ބައެއް ނޫސްތަކުން ޚަބަރުދީފައިވާ ގޮތުގައި މަހާތީރު، ޕީޕީބީއެމްގެ ލީޑަރު ކަމުން އިސްތިއުފާދެއްވީ، އެ ޕާޓީގެ ރައީސު މުޙްޔިއްދީން ޔާސީން، އެ ޕާޓީ ޕީއެޗް ކޯލިޝަނުން ވަކިވެ އިދިކޮޅު އުމްނޯއާ ގުޅެން ނިންމެވުމާ ގުޅިގެން، އެކަމާ ކޯފާވެގެންނެވެ.
އިސްތިއުފާ ދެއްވުމުގެ ކުރިން ޑރ. މަހާތީރު ވަނީ އިއްޔެ އޭނާގެ އޮފީހުގައި އަންވަރު އިބްރާހީމްއާ ބައްދަލުކުރައްވާފައެވެ. އަދި މިއަދުގެ ވަގުތެއްގައި އަންވަރު އިބްރާހީމް ވަނީ ރަސްގެފާނާ ބައްދަލުކުރައްވާފައެވެ.
ރަސްގެފާނުގެ އަރިހަށް ކުރެއްވި ޒިޔާރަތަށް ފަހު ނޫސްވެރިންނާ ވާހަކަފުޅުދައްކަވަމުން އަންވަރު ވިދާޅުވީ، ކުރިން ވެރިކަން ކުރި ކޯލިޝަނުގެ އެއްވެސް ބަޔަކާ ގުޅިގެން ވެރިކަން ހޯއްދަވަން މަހާތީރު މަސައްކަތްޕުޅު ނުކުރައްވާ ކަމުގައެވެ. މިހާރު އުފެދިގެން އުޅޭ ސިޔާސީ ހަލަބޮލިކަމުގެ ފަހަތުގައި ހުންނެވީ މަހާތީރުތޯ ނޫސްވެރިއަކު ސުވާލުދެންނެވުމުން އަންވަރު އިބްރާހީ ވިދާޅުވީ އެކަމުގެ ފަހަތުގައި ވަނީ "އަހަރެންގެ ޕާޓީގެ ބައެއް މީހުންނާއި، ބޭރުގެ ބައެއް މީހުންގެ ތެރެއިން އޭނާގެ (މަހާތީރުގެ) ނަންފުޅު ބޭނުންކުރާ މީހުން"ނެވެ.
އަދި އަންވަރު ވިދާޅުވި ގޮތުގައި، ކުރީގެ ސަރުކާރުގެ އެއްވެސް ބަޔަކާ ގުޅިގެން ވެރިކަން ހޯއްދަވަން މަސައްކަތްޕުޅު ނުކުރައްވާނޭ ކަމުގެ ޔަގީންކަން މަހަތީރު ވަނީ އޭނާއަށް ދެއްވާފައެވެ.
ޕީއެޗް ކޯލިޝަނުގައި ހިމެނޭ ޑިމޮކްރެޓިކް އެކްޝަން ޕާޓީ (ޑީއޭޕީ) އިން މިއަދު ބުނެފައި ވަނީ ޑރ. މަހާތީރު އަލުން ބޮޑުވަޒީރުކަމާ ހަވާލުވެވަޑައިގަތުމަށް އެޕާޓީން އެދޭނެކަމުގައެވެ. އެޕާޓީގެ ތަރުޖަމާނު ލިމް ގުއާންގ އެންގް ވަނީ މިކަން ކަށަވަރުކޮށްދެވާފައެވެ. އޭނާ ވިދާޅުވީ އިދިކޮޅު އުމްނޯ ޕާޓީއާކު މަސައްކަތްޕުޅު ނުކުރެއްވައި އުސޫލުތައް ހިފަހައްޓަވަން މަހާތީރު ނިންމެވީތީ އެކަމާ އުފާކުރައްވާ ކަމުގައެވެ.
އެހެން ޕާޓީތަކުގެ ތާއީދާއެކު ޑރ. މަހާތީރު އަލުން ބޮޑުވަޒީރުކަމާ ހަވާލުވެވަޑައިގެންފިނަމަ، ދައުރުގެ މެދުތެރޭން އަންވަރު އިބްރާހީމްއާ ބޮޑުވަޒީރުކަން ހަވާލުކުރެއްވުމަށް ވެފައިވާ އެއްބަސްވުމަށް އަމަލުކުރައްވަން ޖެހިވަޑައިނުގަންނަވާނެއެވެ. އޭރުން މަހާތީރަށް 2023 ވަނަ އަހަރާ ހަމައަށް ބޮޑުވަޒީރުކަމުގައި ހުންނެވުމުގެ ފުރުސަތު ލިބިވަޑައިގަންނަވާނެއެވެ.
