އައްޑޫ ސިޓީގައި ހުޅުވަން ތައްޔާރުވެފައިވާ އިކުއެޓޯރިއަލް ހޮސްޕިޓަލްގެ ޚިދުމަތް ފަށައިގަންނައިރު އެންމެން ވެސް ހެޔޮނިޔަތަކާއި އޯގާތެރިކަމާއެކު ފަށައިފި ނަމަ ކާމިޔާބުވާނެ ކަމަށް ނާއިބު ރައީސް ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އިކުއެޓޯރިއަލް ހޮސްޕިޓަލަށް މިއަދު ވަޑައިގެން އެތަނުގެ މުވައްޒަފުންނާ ބައްދަލުކުރައްވައި ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ އެތަނުން ފެންވަރު ރަނގަޅު ޚިދުމަތެއް ދިނުމަކީ މުޅި ސަރުކާރުގެ ވަރަށް ބޮޑު އުންމީދެއް ކަމަށެވެ. އައްޑޫ ސިޓީގެ ރައްޔިތުންނާއި ދެކުނުގެ ރައްޔިތުންނާއި މުޅި ދިވެހި ރައްޔިތުން ވެސް ބޭނުންވަނީ ފެންވަރު ރަނގަޅު ޚިދުމަތެއް އެ ހޮސްޕިޓަލުން ލިބުން ކަމަށް ނާއިބު ރައީސް ވިދާޅުވިއެވެ.
"ކަމެއްގެ ފެށުމަކީ އެކަމެއް ރަނގަޅަށް ނުވަތަ ނުރަނގަޅަށް ކުރަން ފުރުސަތުލިބޭ ކަމެއް. ފަށާއިރު ހުރިހާކަމެއް ރަނގަޅަށް ފެށުމުން ދެންދާނީ ރަނގަޅަށް. ފަށައިގަންނައިރު އެންމެވެސް ވަރަށް ރަނގަޅު، ހެޔޮނިޔަތަކާއެކު މަސައްކަތާގެން ކުރިއަށް ގޮސްފި ކަމަށްވާނަމަ އެއްވެސް ޝައްކެއްނެތް ގޮތުގައި ކާމިޔާބުވާނެ،" ފައިސަލް ވިދާޅުވިއެވެ.
އެމަނިކުފާނު ވިދާޅުވީ މި ހޮސްޕިޓަލުގެ ކަންކަން ރަނގަޅަށް ގެންދިޔުމަށް ރައީސް އިބްރާހީމް މުޙައްމަދު ޞާލިޙު ވަރަށް އިސްކަން ދެއްވާ ކަމަށެވެ. ހޮސްޕިޓަލުގައި އިތުރަށް ވެސް ފުރިހަމަ ކުރަންޖެހޭ ކަންކަން ހުރިތޯ ބަލައި އެކަންކަން ފާހަގަ ކުރެއްވުމަށްވެސް އެމަނިކުފާނު ވަނީ އިރުޝާދު ދެއްވާފައި ކަމަށް ނާއިބު ރައީސް ވިދާޅުވިއެވެ.
ބައެއް ކަހަލަ ބަލިތަކަށް ބޭސްކުރަން ވެއްޖެ ކަމަށްވާނަމަ ރަށުން ފުރައިގެން ދާންޖެހެނީ މާލެއާއި، އިންޑިއާއި ސިލޯނަށް ކަމަށް އެމަނިކުފާނު ވިދާޅުވިއެވެ. އެހެންނަމަވެސް މި ހޮސްޕިޓަލުގެ ޚިދުމަތް ފެށުމުން އެގޮތަށް ފުރައިދާންޖެހޭ ދިއުން އެއްކޮށްކަހަލަ ގޮތަކަށް ހުއްޓޭނެ ކަމަށް ވެސް ވިދާޅުވިއެވެ.
މިއީ ވަރަށްގިނަ ރައްޔިތުން އުންމީދު ކުރަމުންދާ ރައްޔިތުންގެ ވަރަށްބޮޑު ހައްގެއް ކަމަށް ވެސް ނާއިބު ރައީސް ވިދާޅުވިއެވެ. އެހެންކަމުން ހޮސްޕިޓަލަށް ޚިދުމަތް ހޯދަން އަންނަ ކޮންމެ މީހަކަށް ވެސް އެއްވެސް ތަފާތުކުރުމެއްނެތި ވަގުތުން އެމީހަކަށް ޚިދުމަތް ދިނުމަށް އެމަނިކުފާނު އެދިވަޑައިގެންނެވިއެވެ. ވޭނެއްގައި އުޅޭމީހަކަށް އެހީތެރިވުމަކީ މިދުނިޔެމަތީގައި ކުރެވޭނެ އެންމެ ރަނގަޅު އެއްކަންތައް ކަމަށާއި އެހެން ކަމުން ފަރުވާއެއް ހޯދަން ހޮސްޕިޓަލަށް އަނަން ކޮންމެމީހަކަށް ވެސް އެމީހާއަކީ ކޮންމަގާމެއްގައި ހުރި މީހެއްތޯ ބެލުމެންތި ހަމަހަމަ ކަމާއެކު ފަރުވާ ދިނުމަށް އެމަނިކުފާނު ނަސޭހަތްތެރިވެ ވަޑައިގެންނެވިއެވެ.
ޚިދުމަތެއް ދެމުންގެންދާއިރު އަބަދުވެސް މީހުންގެ ޝަކުވާއަންނާނެ ކަމަށާއި ކަންކަން ރަނގަޅު ކުރެވޭނީ ކެތްތެރިކާއި އޯގާތެރިކަމާއެކު އެ އަޑުތައް އަހައިގެން ކަމަށް ވެސް އެމަނިކުފާނު ވިދާޅުވިއެވެ. ޝަކުވާއަކީ ޚިދުމަތްދޭން ތިބޭ މީހުން ހުއްޓުވަން ބޭނުންވާ ކަމަށްވާނަމަ ހުއްޓުވޭނެ އެއްޗެއް ކަމަށް ވެސް ފައިސަލް ވިދާޅުވިއެވެ. "މީހުން ދައްކާ ވާހަކަ އަޑުއަހައިގެންނޫނީ ކަންކަން ރަނގަޅު ނުކުރެވޭނެ. ފަރުވާއަށް އެދި ހޮސްޕިޓަލަށް ވަނުމުން ކޮންމެ މީހަކަށް ވިޔަސް އެމީހާށް އޯގާތެރި ކަމާއެކު ފަރުވާދޭންޖެހޭނެ،" އެމަނިކުފާނު ވިދާޅުވިއެވެ.
ނާއިބު ރައީސް ފައިސަލް ވިދާޅުވީ ކުރިއަށްއޮތްތަނުގައި އިތުރު ޚިދުމަތްތަކެއް ހޮސްޕިޓަލަށް ތަޢާރަފްކޮށް ޚިދުމަތް ވަރުގަދަ ކުރައްވާނެ ކަމަށެވެ. އެގޮތުން އެތަނަށް ކެތުލެބެއްގެ ޚިދުމަތްވެސް އަދިލިބޭނެ ކަމަށް ވިދާޅުވިއެވެ.
ނާއިބުރައީސް ވިދާޅުވީ މިއީ ވަރަށްރަނގަޅަށް ޑިޒައިންކޮށްފައިވާ ވަރަށްރީތި ހޮސްޕިޓަލެއް ކަމަށެވެ. އަބަދުވެސް ޖެހޭނީ ކަންކަން ބަދަލުކުރަން ކަމަށާއި އެކަންކަން އަބަދުވެސް ބަދަލުވަމުން ދާނެ ކަމަށް އެމަނިކުފާނު ވިދާޅުވިއެވެ.
އެންމެ މުހިންމު ކަމަކީ ރަނގަޅުވަރުވާއެއް އޯގާތެރިކަމާއި ހިތްހެޔޮކަމާއެކު ފޯރުކޮށްދިނުން ކަމަށް ފައިސަލް ވިދާޅުވިއެވެ.
