އައްޑޫ ސިޓީ ސައުތު ޕާމް ރިސޯޓުގައި މަސައްކަތްކުރާ މީހަކު ނިޔާވެފައި އޮއްވައި މިއަދު ފެނިފައިވާ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވެފައިވަނީ އޭނަ ނިޔާވެފައިވާކަން އެނގުނީ ހެނދު ޑިއުޓީއަށް ނުނިކުމެގެން ގޮސް އޭނާ އުޅޭ ކޮޓަރި ބެލުމުން ކަމަށެވެ. ކޮޓަރި ބެލިއިރު އޭނާ އޮތީ އެއްވެސް ހަރަކާތެއްނެތިފައި ކަމަށް ފުލުހުންނަށް މައުލޫމާތު ލިބިފައިވާ ކަމަށް ފުލުހުންގެ މީޑިއާއިން މައުލޫމާތު ދެއްވިއެވެ.
އޭނާ ވަނީ ހުޅުމީދޫ ސިއްހީ ކަރުކަޒަށް ގެންދެވިފައި ކަމަށާއި އެތަނަން ގެންދިޔައިރު ވެސް ނިޔާވެފައިވާ ކަމަށް ޑޮކްޓަރު ވިދާޅުވި ކަމަށް ފުލުހުންވަނީ މައުލޫމާތު ދެއްވައިފައެވެ. "އައްޑޫސިޓީގެ ސައުތު ޕާމް ރިސޯޓުގައި މަސައްކަތްކުރާ މީހަކު ޑިޔުޓީއަށް ނައިސްގެން ބެލިއިރު އޭނާގެ ކޮޓަރީގައި ހަރަކާތެއްނެތި އޮތުމުން އޭނާގެ ގޮވައިގެން ހުޅުމީދޫ ސިއްހީ މަރުކަޒަށް ގެންގޮސްފައިވާ ކަމުގެ މައުލޫމާތު މިއަދު ހެނދުނު 9:19 އެހައިކަންހާއިރު ފުލުހުންނަށް ލިބފައިވޭ. މިމީހާ ހުޅުމީދޫ ހެލްތު ސެންޓަރަށް ގެނައިރު ނިޔާވެފައިވާކަމަށް ޑޮކްޓަރު މައުލޫމާތު ދެއްވައިފައިވޭ. ނިޔާވެފައިވަނީ އުމުރުން 48 އަހަރުގެ ދިވެހި ފިރިހެނެއް،" ފުލުހުން ވިދާޅުވިއެވެ.
އޭނާއާ ބެހޭ އިތުރު އެއްވެސް މައުލޫމާތެއް ފުލުހުން ނުދެއްވައެވެ. އޭނާގެ ހަށިގަނޑުގެ ބޭރު ފުށުން އެއްވެސް އަނިޔާއެއް ފެންނާކަކަށް ނެތް ކަމަށް ވެސް ފުލުހުން ވިދާޅުވިއެވެ. މިމައްސަލަ ތަހުގީގު ކުރަމުންދާ ކަމަށް ވެސް ފުލުހުން ވިދާޅުވިއެވެ.
