ރާއްޖޭގެ ދަރިވަރިންނަށް އާމާޒުކޮށްގެން 39 ސްކޮލާޝިޕް ފުރުސަތު ހުޅުވާލައިފިއެވެ.
އިންޑިއަން ކައުންސިލް ފޯ ކަލްޗަރަލް ރިލޭޝަން (އައިސީސީއާރު)ގެ ދަށުން ހުޅުވާލާފައިވާ މި ސްކޮލާޝިޕްތަކުގެ ތެރޭގައި 3 ގިންތި އެއްގެ ސްކޮލާޝިޕް ހިމެނެއެވެ. އެގޮތުން އެއިޑް ޓު މޯލްޑިވްސް ސްކޮލާޝިޕްގެ ދަށުން 20 ސްކޮލާޝިޕާއި، ކޮމަންވެލްތު ސްކޮލާޝިޕްގެ ދަށުން 4 ސްކޮލާޝިޕް އަދި ޖެނެރަލް ސްކޮލާޝިޕްގެ ދަށުން 15 ސްކޮލާޝިޕަށް ކުރިމަތިލުމަށް ވަނީ ހުޅުވާލެވިފައެވެ. މިއީ 2020 އަދި 2021 ވަނަ އަހަރަށް ހުޅުވާލި ފުރުސަތުތަކެވެ.
އެއިޑް ޓު މޯލްޑިވްސް ސްކޮލާޝިޕްގެ ދަށުން ހުޅުވާލި 20 ފުރުސަތުގައި، ފުރަތަމަ ޑިގްރީއާއި ހަމައަށް ކިޔެވޭނެއެވެ. މީގެ ދަށުން އިންޖިނިއަރިންގް ފަދަ އެކި ދާއިރާތަކުގެ ކޯސްތައް ހިމެނޭ ކަމަށް އިންޑިއަން އެމްބަސީން ވިދާޅުވެފައިވެއެވެ. މީގެ އިތުރުންވެސް ސްކޮލާޝިޕްގެ އެކި ފުރުސަތުގެ ދަށުން ޕީއެޗްޑީ ފެންވަރަށް ވެސް ކިޔެވުމުގެ ފުރަސަތު އެބައޮތް ކަމަށް އެމްބަސީން ވަނީ ވިދާޅުވެފައެވެ.
ސްކޮލާޝިޕް ބޭނުންވާ ފަރާތްތަކުން އެޕްލައި ކުރަންވާނީ އައިސީސީއާރު ރަސްމީ ވެބްސައިޓު މެދުވެރިކޮށެވެ. އަދި ހުށަހަޅާ ހުރިހާ ލިޔެކިއުންތަކުގެ ހާޑް ކޮޕީ މާލޭގައި ހުންނަ އިންޑިއަން ކަލްޗަރަލް ސެންޓަރަށް ހުށަހަޅަން ޖެހެއެވެ.
އައިސީސީއާރު ސްކޮލާޝިޕްގެ ދަށުން އިންޑިއާގެ މަޝްހޫރު ޔުނިވަރސިޓީ ތަކުގައި ތަޢުލީމު ހާސިލު ކުރުމުގެ ފުރުސަތު ލިބިގެންދާނެއެވެ. މި ސްކޮލާޝިޕްގެ ދަށުން ކިޔެވުމާއި ހުރުމުގެ ހުރިހާ ޚަރަދެއްވެސް ހަމަޖައްސާނީ އެފަރާތުންނެވެ. މިއީ އިންޑިއާއިން ރާއްޖޭގެ ދަރިވަރުންނަށް ކޮންމެ އަހަރަކުވެސް ހުޅުވާލާ ފުރުސަތެކެވެ. މި ފުރުސަތުގެ ދަށުން ރާއްޖެގެ އެކި ކަންކޮޅުތަކުން ދަރިވަރުން އެކި ދައިރާތަކުން އިންޑިއާގައި ތަޢުލީމު ހާސިލު ކުރަމުން ދެއެވެ.
