މިއަދަކީ ސްޓޭޓް ޓްރޭޑް އޮގަނައިޒޭޝަން (އެސްޓީއޯ) ގެ 55 ވަނަ އަހަރީދުވަހެވެ. ދިގުމާޒީގައި އެކުންފުނިން ރައްޔިތުންނަށް ފޯރުކޮށްދެއްވާފައިވާ ފަސޭހަތައް ފާހަގަކޮށް އެހާރާއި މިހާރުގެ މުވައްޒަފުންނަށް ޝުކުރު ދަންނަވަމެވެ.
އެސްޓީއޯއަކީ ސަރުކާރުގެ 82 ޕަސެންޓް ޙިއްސާ އޮންނަ ބޮޑު ކުންފުންޏެކެވެ. އެކުންފުނި ވުޖޫދުވީ އަތިރީ މާފަންނު ޓްރޭޑިން އެޖެންސީ ގެނަމުގައެވެ. ފަހުން އެކުންފުނީގެ ވިޔަފާރި ފުޅާވެ އެސްޓީއޯގެ ނަމަށް ބަދަލުވީއެވެ.
ކުންފުނީގެ 55 ވަނަ އަހަރީ ދުވަސް ފާހަގަ ކުރާއިރު އެކުންފުނިވަނީ އަޑިގުޑަންތަކާ ވެސް ކުރިމަތިލައިފައެވެ.
ފަހަކައަށް އައިސް ކުންފުންޏަށް ލިބޭ ފައިދާ ވަނީ ދަށްވެފައެވެ. އެހެންނަމަވެސް ކުންފުނި ހިންގެވުމާ މިއަދު ޙަވާލުވެ ހުންނެވި ޙުސައިން ޢަމްރުގެ މާލިމީ ކަމުގައި ގެންދަވަނީ ކުންފުންޏަށް ލިބޭ އާމްދަނީ އިތުރުކޮށް ލިބޭފައިދާ ބޮޑުކުރުމަށް މަސައްކަތް ކުރައްވަމުންނެވެ.
އެސްޓީއޯއަކީ ރައްޔިތުންނަށް ބޭނުންވާ އަސާސީ މުދަލާއި ކާބޯތަކެތި ހެޔޮއަގުގައި ފޯރުކޮށް ދިނުމަށް މަސައްކަތްކުރާ ކުންފުންޏެވެ. އެކުންފުނީގެ ގޮފިތައް ވަނީ އަތޮޅުތަކުގައި ވެސް ހުޅުވައިފައެވެ. ރައްޔިތުންނަށް ބޭނުންވާ ބައެއް ސާމާނުގެ އަގުތައް އަތްނުފޯރާ ހިސާބަށް ބާޒާރުގައި ބޮޑުވުމުން އެ އެއްޗެއް ހުރިތާކުން ގެނެސް ހެޔޮއަގުގައި ވިއްކުމަކީ އެސްޓީއޯއިން އާންމުކޮށް ކުރާ ކަމެކެވެ. ޚާއްސަކޮށް ފިޔާ، އަލުވި، ބިހެވެ. އެހެން ކަމުން އެސްޓީއޯގެ 55 ވަނަ އަހަރީ ދުވަސް ފާހަގަކުރާއިރު ރައްޔިތުން ވަނީ އެސްޓީއޯގެ ޚިދުމަތަށް ސަތޭކައިން ސަތޭކަ ދީފައެވެ.
އެސްޓޯގެ ތަޖުރިބާއަށް ބަލާފައި އެކުންފުނިން މިހާރު މަސައްކަތް ކުރަމުން ގެންދަވަނީ ކުންފުނިން ކުރަމުންދާ ރީޓެއިލް ވިޔަފާރިތަކުގެ ތެރެއިން ބައެއް ވިޔަފާރި ހުއްޓާލުމަށެވެ. އެގޮތަށް އެސްޓީއޯއިން ނިންމެވީ އަމިއްލަ ވިޔަފާރިވެރިންނަށް ފުރުސަތު ބޮޑުކުރުމުގެ ވިސްނުމުގައެވެ. އަދި އެފަދަ ވިޔަފާރިވެރިންނަށް އެހީތެރިކަން ފޯރުކޮށްދިނުމަކީ ވެސް އެސްޓީއޯގެ އަމާޒެކެވެ. އެކުންފުނިން މިހާރުވަނީ އިލެކްޓްރޯނިކް ބައެއް އައިޓަމްތަކާއި ހޯމް އިމްޕްރޫވްމެންޓްގެ ބައެއް ސާމާނާއި ފޯނުފަދަ އެއްޗެހި ވިއްކުން ހުއްޓާލަން ނިންމައިފިއެވެ. އޭގެ ބަދަލުގައި އެސްޓީއޯއިން އިސްކަން ދެއްވާނީ އާންމު ވިޔަފާރިއަށް އުދަގޫނުވާނެ ފަދަ ސާމާނު ގެނެސްގެން އޭގެ ވިޔަފާރި ކުރުމަށެވެ.
އެސްޓީއޯގެ މައިގަނޑު ވިޔަފާރިއަކީ ކާޑުގެ ބާވަތްތަކާއި ތެޔޮ އެތެރެކޮށް ވިއްކުމެވެ. އެހެންނަމަވެސް އެއީވެސް ގެއްލުމުގައި ކުރަމުން ގެންދާ ދެ ވިޔަފާރިއެވެ.
އެސްޓީއޯ މިހިސާބަށް އައިއިރު އެކުންފުންޏަށް ދިމާވެފައިވާ އެންމެބޮޑު އެއް މައްސަލައަކީ ސަރުކާރު ވެސް ހިމެނޭ ގޮތަށް ކުންފުންޏަށް ދޭންޖެހޭ ފައިސާ ނުލިބި މާބޮޑަށް ލަސްވުމެވެ. އޭގެ ސަބަބުން ކުންފުނީގެ ހިންގުމަށް ވަރަށް ބޮޑަށް ތާށިކަން ކުރިމަތިވެއެވެ. އެ ތާށިކަމުން އަރައިގަންނަން ލޯނުގަންޖެހެއެވެ. ލޯނު އަނބުރާ ދައްކާއިރު ހައެއްކަ ޕަސެންޓު އިންޓަރެސް ވެސް ދައްކަންޖެހެއެވެ.
އެސްޓީއޯއަކީ ސަރުކާރުގެ ކުންފުންޏެއް އަޑިއަޅައިފި ކަމަށްވާނަމަ އެކުންފުނީގެ ވެސް ބަލަދުވެރިކަން ބޮލުގައި އަޅަންޖެހޭ ކުންފުންޏެވެ. މިހާރު މިފްކޯ ބަލަހައްޓަމުން ގެންދަނީ އެސްޓީއޯއިންނެވެ.
އެސްޓީއޯއިން ރާއްޖޭގެ 186 ރަށެއްގައި ބޭސްފިހާރަ ހިންގައެވެ. އެއީ ވެސް ބޮޑު ގެއްލުމެއްގައި ހިންގާ ތަންތަނެވެ. އެއީ އެސްޓީއޯއަކަށް އެތަންތަން އެންމެ ރަނގަޅަށް ނުބެލެހެއްޓޭ ކަމަށް އެކުންފުނިން ވަނީ ބުނެފައެވެ.
އެސްޓީއޯގެ ޚިދުމަތަށް ރައްޔިތުން ސަތޭކައިން ސަތޭކަ ދިނަސް ގިނަކަންކަން ރަނގަޅުވެ ޚިދުމަތް ވަރުގަދަވުމަކީ ރައްޔިތުން ބޭނުންވާ ގޮތެވެ. ކުންފުނީގެ ވިސްނުމަކީ ވެސް އެއީއެވެ.
