މި ޑިސެންބަރު މަހުގެ 12 ވަނަ ދުވަހު އިނގިރޭސިވިލާތުގައި ބޭއްވުނު އާއްމު އިންތިޚާބުގައި އެ ގައުމުގެ ގާނޫނުހަދާ މަޖިލީހުގެ ތިރީ ގެ، ހައުސް އޮފް ކޮމަންސްއަށް ރިކޯޑު އަދަދަކަށް މުސްލިމް މެންބަރުން ހޮވިވަޑައިގެންފިއެވެ.
މި ފަހަރުގެ އިންތިޚާބަށް ކުރިމަތިލެއްވި މުސްލިމް ކެންޑިޑޭޓުންގެ ތެރެއިން 19 ބޭފުޅަކު ވަނީ ގޮނޑި ކާމިޔާބުކުރައްވާފެއެވެ. 2017 ވަނަ އަހަރުގެ އާއްމު އިންތިޚާބުގައި ހައުސް އޮފް ކޮމަންސްއަށް ހޮވި ވަޑައިގަތީ މުސްލިމް 15 މެންބަރުންނެވެ.
ގޮނޑި ކާމިޔާބުކުރެއްވި މުސްލިމް މެންބަރުންގެ ތެރެއިން 15 ބޭފުޅުންނަކީ ލޭބާ ޕާޓީގެ ބޭފުޅުންނެވެ. އަނެއް 4 ބޭފުޅުން ނިސްބަތްވެވަޑައިގަންނަވަނީ ކޮންޒާވެޓިވް ޕާޓީއަށެވެ. މި ބޭފުޅުންގެ ތެރޭގައި ޗާންސެލާ އޮފް ދި އެކްސްޗެކާ (މާލީ ވަޒީރު) ސާޖިދު ޖާވީދުވެސް ހިމެނިވަޑައިގަންނަވައެވެ.
މުސްލިމް މެންބަރުންގެ އަދަދު ގާނޫނުހަދާ މަޖިލީހުގައި އިތުރުވި ނަމަވެސް، ބޮޑުވަޒީރު ބޮރިސް ޖޮންސަން އިތުރު ބާރާއެކު މަގާމު ދިފާއުކުރެއްވުމުން އިސްލާމްދީނާމެދު ނަފްރަތު އިތުރުވުމުގެ ފުރުސަތުވަނީ ބޮޑުވެގެން ގޮސްފައި ކަމަށް މުސްލިމް ކައުންސިލް އޮފް ބްރިޓަން (އެމްސީބީ) އިން ދެކެއެވެ.
"އަހަރުމެން އިންތިޚާބުގެ ކެންޕޭނުގެ ދުވަސްވަރާ ކުރިމަތިލީ ޒަމާނުއްސުރެ އަހަރުމެންގެ ސިޔާސީ ދާއިރާއާއި، އަހަރުމެންގެ ވެރިކަންކުރާ ޕާޓިގެ ތެރޭގައި އޮތް، ތަފާތު ޚިޔާލުގެ މީހުންނާއެކު ނޫޅެވުމުގެ ސަގާފަތާ މެދު ކަންބޮޑުވެ ތިބެ. ޖޮންސަންއަށް މިވަނީ ބޮޑު ބާރުވެރިކަމެއް ލިބިވަޑައިގެންފައި. އަހަރުމެންގެ ދުއާއަކީ ހުރިހާ އިނގިރޭސިންނަށް ހަމަހަމަ ގޮތެއްގައި އެ ބާރުގެ ބޭނުންކުރެއްވުން." އެމްސީބީގެ ސެކްރެޓަރީ ޖެނެރަލް ހާރޫން ޚާން ވިދާޅުވިއެވެ.
ރެކޯޑު އަދަދަކަށް މުސްލިމް މެންބަރުން ހޮވިވަޑައިގެންނެވިއިރު، މިފަހަރުގެ ގާނޫނު ހަދާ މަޖިލީހަކީ އެންމެ ގިނަ އަންހުން މެންބަރުންވެސް ތިއްބެވި މަޖިލީހެއެވެ. މިފަހަރު 220 އަންހެން މެންބަރުން ހޮވިވަޑައިގެނެވި އިރު، އޭގެ ތެރެއިން 10 މެންބަރުންނަކީ މުސްލިމުންނެވެ.
