ރާއްޖޭގައި ޤާނޫނުއަސާސީއެއްނެތް ޒަމާނެއްގައި ވެސް ދިވެހި އަންހެނުންވަނީ ރާއްޖޭގައި ރަނިކަން ނުވަތަ ވެރިކަން ކުރައްވާފައި ކަމަށާއި އެންހެނުން ނުކުމެ މަސައްކަތް ކުރަން ފެށުމުން ނަތީޖާ ފެންނާނެ ކަމަށް ޖުމްހޫރީޕާޓީގެ ލީޑަރު ޤާސިމް އިބްރާހީމް ރޭ ވިދާޅުވެއްޖެއެވެ.
ޤާސިމް މިހެން ވިދާޅުވީ ޖުމްހޫރީ ޕާޓީގެ "ރަތްފިޔަ" އިފްތިތާހް ކުރުމަށް މ.ކުނޫޒުގައި ބޭއްވިޖަލްސާގައި ވާހަކަ ދައްކަވަމުންނެވެ. އޭނާ ވިދާޅުވީ ކަންކަން ކާމިޔާބު ކުރެވޭނީ އިސްލާމީ ރިވެތި އުސޫލުން ހިތްވަރާއެކު ކަންކަން ކުރެއްވިގެން ކަމަށެވެ.
ލާމަރުކަޒީ ޤާނޫނަށް އިސްލާޙު ގެނެސް އަންހެނުންނަށް ކައުންސިލްތަކުން ގޮނޑިތައް ރިޒާވްވާ ގޮތަށް ޤާނޫނަށް އިސްލާހު ގެންނެވުމަކީ ޤާނޫނު އަސާސީއާ ކަނޑައެޅިގެން ޚިލާފު ކަމެއްކަމަށް ކުރީގެ ޖަލްސާއެއްގައި ޤާސިމް ވިދާޅުވުމުން ވަނީ ވަރަށްބޮޑެތި ފާޑުކިޔުންތައް އަމާޒުވެފައެވެ. އެއަށް ރައްދު ދެއްވަމުން ޤާސިމް ވިދާޅުވީ އޭނާ އަންހެނުންނަށް ކުޑައިމީސްބަހެއް ވިދާޅުނުވާ ކަމަށެވެ. އެހެންނަމަވެސް އެމަނިކުފާނު ދެއްކެވީ ޤާނޫނުގައި ލިޔެވިފައިވާ ވާހަކަތަކެއް ކަމަށް ވެސް ވިދާޅުވިއެވެ. ޤާސިމް ވިދާޅުވީ ލާމަރުކަޒީ ޤާނޫނަށް ބަދަލު ގެނެސް އަންހެނުންނަށް 33 އިންސައްތަ ރިޒާވް ކުރި ފަދައިން ރައްޔިތުންގެ މަޖިލީހަށް ވެސް އަންހެނުންނަށް ގޮންޑިތައް ރިޒްކުރަންޖެހޭ ކަމަށް ދެކެވަޑައިގަންވާ ކަމަށް ވިދާޅުވިއެވެ. އޭނާ ވިދާޅުވީ އަންހެނުންނަށް ވެސް ކުރިއެރުމާއި ކާމިޔާބު އޮތީ މަސައްކަތް ކުރެއްވި މިންވަރަކުން ކަމަށެވެ. އެމީހަކު ސިއްހަތު ސަލާމަތުން ހުރިކަމަށްވާނަމަ މަސައްކަތް ނުކުރާ ދުވަހެއް އައިސްގެން ނުވާނެ ކަމަށް އޭނާ ވިދާޅުވިއެވެ.
ޤާސިމް ވިދާޅުވީ މަޤާމްތަކަށް އަންހެނުން އިންތިޚާބުވުމަކީ އެމަނިކުފާނު ވަރަށްބޮޑަށް އެދިވަޑައިގަންނަވާ ކަމެއަމަށެވެ. ރައްޔިތުންގެ މަޖިލީހުގައިވެސް އަންހެނުން އިތުރުވުމަށް އެމަނިކުފާނު އެދިވަޑައިގަންނަވާ ކަމަށް ވިދާޅުވިއެވެ. އެހެންނަމަވެސް މަޖިލީހުގައި އެންހެނުންގެ ޢަދަދު މަދުކަމުން އެކަމާ ހިތާމަކުރައްވާ ކަމަށް ވެސް ވިދާޅުވިއެވެ. އެމަނުކުފާނު ބޭނުންފުޅުވަނީ ވީހާވެސް ގިނަ އަންހެނުން ނުކުމެ އިންތިޚާބީ މަޤާމްތަކަށް ވާދަކޮށް ހިތްވަރާއެކު މަސައްކަތްކޮށް ކާމިޔާބު ކުރުން ކަމަށް ވިދާޅުވިއެވެ.
ގާސިމް އިބްރާހިމްގެ ވާހަކަފުޅުގައި، ސަރުކާރުން އަންހެން ބޭފުޅުންނަށް އިސްކަން ދެއްވާކަން ފާހަގަކުރައްވައި ރައީސް އިބްރާހިމް މުހަންމަދު ސާލިހަށް ތައުރީފް ކުރެއްވިއެވެ. ކެބިނެޓުން ފެށިގެން ސަރުކާރާއި ދައުލަތުގެ އިސް މަގާމުތަކަށް ބަލައްވާލެއްވީމާ އެކަން ފެނިގެންދާ ކަމަށްވެސް ވިދާޅުވިއެވެ.
