ސައޫދީ އަރަބިއްޔާގެ ދެކުނުގައި، ޔަމަނުގެ ސަރަހައްދީ ރޮނގާ އިންވެގެން އޮންނަ ނަޖްރާން ސަރަހައްދަށް ދިން ވަރުގަދަ ހަމަލާއެއްގައި ސައޫދީ ސިފައިންގެ އެތައް ސަތޭކަ ބަޔަކު، އެމީހުންގެ ކޮމާންޑަރުންނާ، ހަތިޔާރާއެކު ހައްޔަރުކޮށްފި ކަމުގައި ޔަމުނުގެ ޙޫޘީ ޖަމާއަތުން ބުނެފިއެވެ.
ޔަމަނުގައި އޮތް ބައިނަލްއަގްވާމީ ގޮތުން ގަބޫލުކުރާ ސަރުކާރު ވައްޓާލައި، ޔަމަނުގެ ވެރިކަން ހޯދުމަށް ހަނގުރާމަކުރާ ޝީޢާއިންގެ ޙޫޘީ ޖަމާއަތުގެ ތަރުޖަމާނު ބުނި ގޮތުގައި "ދުޝްމަނުންގެ ސިފައިންގެ ތެރެއިން ތިން ބްރިގޭޑް، އޭގެ ހުރިހާ ހަތިޔާރަކާއި، އޭގައި ހިމޭނޭ އާދައިގެ ސިފައިންނާއި، އޮފިސްނާއެކު" ވަނީ ހައްޔަރުކުރެވިފައެވެ.
ޙޫޘީން ބުނި ގޮތުގައި ނަޖްރާންގެ ކައިރީގައިވާ ސަރަހައްދުގައި 72 ގަޑިއިރަށް ދެމިގެން ދިޔަ އަސްކަރީ އޮޕަރޭޝަން ހިންގާފައި ވަނީ ޑްރޯންތަކާއި، މިސައިލްތަކުގެ އެހީއާވެސް އެކުގައެވެ.
ޙޫޘީންގެ ޓީވީ އަލްމަސީރާގައި ވާހަކަދައްކަމުން އެ ޖަމާއަތުގެ ތަރުޖަމާނު ކާނަލް ޔަޙްޔާ ސަރީޢު ބުނީ "އަސީރުންނާ މެދު އަމަލުކުރާނީ އިސްލާމީ އުސޫލުތަކާއި، ޔަމަނުގެ ޒަމާންވީ އާދަކާދައާއި އެއްގޮތަށް" ކަމުގައެވެ. އޭނާ އިތުރަށް ބުނި ގޮތުގައި ހައްޔަރުކުރެވެނު ގައިދީން ވަނީ ސިއްރުކުރެވިފައިވާ ތަނަކަށް ގެންގޮސްފައެވެ.
ފާއިތުވި ތިން ދުވަހުގެ ތެރޭގައި ހިންގި އަސްކަރީ އޮޕަރޭޝަނަކީ ޔަމަނުގެ ހަނގުރާމަ ފެށުނު ފަހުން ހިންގި އެންމެ ބޮޑު އޮޕަރޭޝަން ކަން ފާހަގަކުރަމުން ކާނަލް ޔަޙްޔާ ބުނީ އެ އޮޕަރޭޝަނު ސޫއޫދީ ސިފައިންގެ ތެރެއިން ގިނަ އަދަދެއްގެ ބަޔަކު މަރުވެ ގިނަ އަދަދެއްގެ ހަތިޔާރު ހަލާކުވެފައިވާ ކަމުގައެވެ. އަދި އޭނާ ހާމަކުރި ގޮތުގައި ހަނގުރާމައިގެ އަސީރުންގެ ގޮތުގައި ހައްޔަރުކުރެވުނު ސައޫދީ ސިފައިން މިއަދުގެ ވަގުތެއްގައި އަލްމަސީރާ ޓީވީން ދައްކާނެ ކަމުގައެވެ.
ޙޫޘީ ޖަމާއަތުން ދެއްކި މިވާހަކަތަކަށް ސައޫދީ އަރަބިއްޔާއިން އަދި އެއްވެސް ރައްދެއް ދީފައި ނުވެއެވެ. އެހެންނަމަވެސް ސައޫދީ ޚަބަރުފަތުރާ ވަސީލަތްތަކުން ހާމަކުރި ގޮތުގައި ފާއިތުވި ދެ ދުވަހު ޙޫޘީންނާ ބަދަލުކުރެވުނު ހަމަލާތަކުގައި ސައޫދީ ސިފައިންގެ 13 މީހުން މަރުވެފައި ވެއެވެ. އަދި އިއްޔެ ސިފައިންގެ ހަތް މީހެއްގެ ޖަނާޒާ ބާއްވާފައިވާކަންވެސް ސައޫދީ ރަސްމީ ޚަބަރުފަތުރާ އެޖެންސީ އެސްޕީއޭ އިން ވަނީ ހާމަކޮށްފައެވެ.
ޔަމަނުގެ ދާޚިލީ ހަނގުރާމައަށް ފަސް އަހަރު ވެފައިވާއިރު، އެގައުމުގެ އުތުރުގެ ބޮޑު ބައި ވަނީ ޙޫޘީ ޖަމާއަތުގެ އަތްދަށުގައެވެ.
