ރޭ މާލޭގައި ހިނގި އަލިފާނުގެ ޙާދިސާގެ އަސަރުކޮށްފައިވާ ޢާއިލާތަކަށް އެހީތެރިވެދިނުމުގެ ގޮތުން މިއަދު އުރީދޫގެ ނަންބަރުތަކަށް ކުރާ ހުރިހާ ކޯލެއް އެއްވެސް އިތުރު ޗާޖަކާނުލާ ކުރެވޭނެ ކަމަށް އުރީދޫ އިން ވިދާޅުވެއްޖެއެވެ. އޭގެ އިތުރަށް އިތުރުން ރާއްޖެއާއި ރާއްޖެއިން ބޭރުގައި ތިއްބެވި ބޭފުޅުންނާ މުވާޞަލާތު ކުރުމަށް މަގުފަހިކޮށްދިނުމުގެ ގޮތުން ވައިބަރ މެދުވެރިކޮށް ކޯލު އަދި މެސެޖު ކުރުމުގެ ޚިދުމަތްވެސް އެއްވެސް އިތުރު ޗާޖަކާނުލާ މިއަދު ލިބިވަޑައިގަންނަވާނެ ކަމަށް އުރީދޫން ވިދާޅުވިއެވެ.
އޭގެ އިތުރަށް މީސްމީޑިއާ މެދުވެރިކޮށް އުރީދޫ ކަސްޓަމަރުންނަށް ފަސޭހަކަމާއެކު ޢާއްމު މަޢުލޫމާތު ލިބޭނޭގޮތް ފަހިކޮށްދިނުމުގެ ގޮތުން ޓްވިޓަރގެ ޚިދުމަތްވެސް މިއަދު މުޅިން ހިލޭ ލިބޭނެ ކަމަށް ވެސް އެކުންފުނީން ވިދާޅުވިއެވެ. އޭގެ އިތުރަށް ޙާލަތާގުޅޭ ކަށަވަރު މަޢުލޫމާތު ހޯދުމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ)، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)، އަދި މޯލްޑިވިއަން ރެޑް ކްރެސެންޓް (އެމްއާރސީ)ގެ މީސްމީޑިއާ އެކައުންޓްތަކަށް ފޮލޯ ކުރުމަށް އެކުންފުނިން ވަނީ އެދިވަޑައިގެންފައެވެ.
އުރީދޫން ވިދާޅުވީ ރޭގެ އަލިފާނުގެ ޙާދިސާގައި ގެއްލުން ލިބުނު ފަރާތްތަކަށް އެހީތެރިވުމުގައި ކަމާބެހޭ ފަރާތްތަކާ އެކު އެކުންފުނި ދެމިއޮންނާނެ ކަމަށެވެ.
ރޭ ހިނގި އަލިފާނުގެ ޙާދިސާގައި އެކަކުވަނީ ނިޔާވެފައެވެ. 6 ގެއަކަށްވަނީ ގެއްލުންވެފައެވެ.
