ޔަހޫދީން ހިފާފައިވާ ހުޅަނގު އައްސޭރީގެ އަލްޚަލީލު (ހެބްރޯން) ގެ މެދުތެރޭގައި، އިބްރާހީ މިސްކިތާ ދާދީ ކައިރީގައި ހުރެގެން އިސްރާއީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ ވަނީ އަލްޚަލީލު އަބަދަށްޓަކައި އޮންނާނީ ޔަހޫދީންގެ ދަށުގައި ކަމަށް ވައުދުވެފައެވެ. އަލްޚަލީލަކީ 2 ލައްކަ 50 ހާސް ފަލަސްޠީނު މީހުންގެ މެދުގައި ހައްދުފަހަނައަޅާފައިވާ 800 ޔަހޫދީން ދިރިއުޅޭ ރަށެކެވެ.
ފަލަސްޠީނު މީހުން ރުޅިވެރިކަމާއެކު އިހުތިޖާޖުކުރަމުން ދަނިކޮށް، ވަރުގަދަ ސަލާމަތީ ފިޔަވަޅުތަކާއެކު އަލްޚަލީލަށް ވަދެ އަބްރާހީމީ މިސްކިތުގެ ހަރިންމަ ތެރޭގައި ހުރެ ބޮޑުވަޒީރު ނަތަންޔާހޫ ދެއްކި ވާހަކައަކީ ހަރުކަށި، ކަނާތުފިޔައިގެ ޔަހޫދީންގެ ތާއީދު ހޯދުމަށް ކުރި ކަމެއް ކަމަށް ގިނަ ބަޔަކު ދެކެއެވެ. އިސްރާއީލުގައި ބާއްވާ އާއްމު އިންތިޚާށް މިހާރު ވަނީ ދެ ހަފުތާއެއްހާ ދުވަހަށް ވެފައެވެ.
އަލްޚަލީލުގައި ހުރެ ވާހަކަދައްކަމުން ނަތަންޔާހޫ ބުނީ އަލްޚަލީލު އަކީ ޔަހޫދީން ދިރިނުއުޅޭ ރަށަކަށް ދުވަހަކުވެސް ނުވާނެކަމުގައެވެ.
"އެއްވެސް ބައެއްގެ ތަރިކައިން އެމީހުން މަރުހޫމުކުރާކަށް އަހަރުމެން ނޫޅެން. އަދި އެއްބަސް ބަޔަކަށް އަހަރުމެންގެ ތަރިކައިން އަހަރުމެން މަހުރޫމު ނުކުރެވޭނެ. އަހަރުމެންނަކީ އަލްޚަލީލުގައި ބީރައްޓެހިންނެއް ނޫން. އަހަރުމެން އަބަދަށް މިތާ ތިބޭނަން." ނަތަންޔާހޫ ބުންޏެވެ.
މާތް ﷲގެ ރަސޫލާ، ސަލާމްލެއްވި އިބްރާހީމްގެފާނަށް ނިސްބަތްވާ އިބްރާހީމީ މިސްކިތަކީ އިބްރާހީމްގެފާނާއި، އެކަލޭގެފާނުގެ އަނބިކަނބަލުން ސާރާއާއި، ދަރިކަލުން އިސްޙާޤުގެފާނާއި، ކާފަދަރިކަލުން ޔަޢުޤޫބުގެފާނާއި، އެ ދެ ބޭކަލުން ދެ އަނބިކަނބަލުން ފަސްދާނުލެވިފައިވާ ތަނާ ޖެހިގެން އިމާރާތްކޮށްފައިވާ ތަނެކެވެ. ޔަހޫދީން ބަލަނީ އެއީ އެމީހުންގެ މުޤައްދަސް ތަނެއްގެ ގޮތުގައެވެ.
ހައްދު ފަހަނައަޅާފައިވާ ޔަހޫދީ ވަޒަންވެރިއެއް ކަމުގައިވާ ބާރޫޚް ގޯލްޑްސްޓޭން 1994 ވަނަ އަހަރު އިބްރާހީމީ މިސްކަތަށް ވަދެ އެ މިސްކިތުގައި އަޅުކަން ކުރަން ތިބި ފަލަސްޠީނު މީހުންގެ 29 މީހުން މަރާލި ހާދިސާއަކީ އިސްރާއީލުން އަލްޚަލީލު ހިފިފަހުން އެރަށުގައި ހިނގާފައިވާ އެންމެ ހިތާމަވެރި ހާދިސާއެވެ. އެހަމަލާއަށްފަހު ފަލަސްޠީނު މީހުންގެ ތެރެއިން ބަޔަކު ވަނީ އޭނާގެ ގައިގައި ތަޅައި މަރާލާފައެވެ.
