މިހާރު ކުރިޔަށްދާ 33 ވަނަ ޤައުމީ ޤުރުއާން މުބާރާތުގައި ކިޔެވި ކުޑަ ކުއްޖަކު، މުބާރާތުގެ ކިޔެވުމުގެ ތެރެއިން ފަނޑިޔާރުން ސުވާލު ކުރުމުން ކުއްބަހެއް ބުނެވިފައިވާ ވީޑިޔޯ އެކުއްޖާގެ ހައްގަށް އުނިކަން އަންނަ ގޮތަށް ސޯޝަލް މީޑިޔާގައި ދައުރު ކުރަމުންދާތީ އެކަން އެގޮތަށް ނުކުރުމަށް އިސްލާމިކް މިނިސްޓްރީން އެދިއްޖެއެވެ.
އިސްލާމިކް މިނިސްޓްރީން ކުރި ޓްވީޓެއްގައި ބުނީ މުބާރާތުގައި ޤުރުއާން ކިޔެވި އެދަރިވަރުގެ ވީޑިޔޯކޮޅު އެކުއްޖާގެ ހައްގަށް އުނިކަން އަންނަ ގޮތަށް ދައުރު ކުރަމުންދާކަން މިނިސްޓްރީގެ ސަމާލު ކަމަށް އައިސްފައިވާ ކަމަށެވެ.
"ވީމާ އެކަން އެހެން ނުކުރުމަށް އެންމެހާ ފަރާތްތަކަށް ނަސޭހަތްތެރި ވަމެވެ." މިނިސްޓްރީން ބުނެފައިވެއެވެ.
އިސްލާމިކް މިނިސްޓްރީން މިގޮތަށް އެދިފައިވާއިރު، ޤައުމީ ޤުރުއާން މުބާރާތުގައި ކުޑަކުއްޖަކު ކިޔަމުންގޮސް، ފަނޑިޔާރުންގެ ސުވާލެއްގެ ތެރެއިން އެ ކުއްޖާއަށް ބުނެވުނު ކުށްބަސްކޮޅު ހިމެނޭ ވީޑިޔޯކޮޅު ސޯޝަލް މީޑިޔާގައި ދައުރުކޮށް ބަޔެއް ފަރާތްތަކުން ދަނީ އެކަން މަޖަލަކަށް ހަދައި ޖޯކު ޖަހަމުންނެވެ.
ތިން ދަންފަޅިއަކަށް ބަހާލައިގެން އިސްލާމީ މަރުކަޒުގައި މިހާރު ކުރިޔަށްދާ 33 ވަނަ ޤައުމީ ޤުރުއާން މުބާރާތަކީ މިހާތަނަށް އެންމެގިނަ ދަރިވަރުންނާއެކު ރާއްޖޭގައި ކުރިޔަށްދާ ޤުރުއާން މުބާރާތެވެ. މުބާރާތުގައި ޖުމްލަ 1273 ދަރިވަރުން ވަނީ ބައިވެރި ވެފައެވެ.
