މޯލްޑިވްސް ގާރލް ގައިޑްސް އެސޯސިއޭޝަނުން ބާއްވަމުންދާ 21 ވަނަ ނޭޝަނަލް ޕެޓްރޯލް ލީޑަރސް ޓްރެއިނިންގ ކޭމްޕް 2019 ގައި ދިރާގާއި ގުޅިގެން ދަނީ މިފަހަރުގެ ކޭމްޕްގެ ތީމް ކަމުގައިވާ 'ސާރފް ސްމާޓް' ރާއްޖޭގެ އެކި ކަންކޮޅުތަކުގައި ފުޅާ ދާއިރާއެއްގައި ހިންގުމަށް ފެސިލިޓޭޓަރުން ތަމްރީންކުރަމުންނެވެ. ސެޕްޓެމްބަރ 3 އިން 6 އަށް ކ.މާފުށީގައި ކުރިއަށްދާ މިކޭމްޕުގައި މާލޭގެ އިތުރުން 14 އަތޮޅަކުން 36 ސްކޫލުން އުމުރުން 13 - 17 އަހަރާއި ދެމެދުގެ 290 ގައިޑް ކުދިން އަދި 59 ގައިޑް ލީޑަރުން ވަނީ ބައިވެރިވެފައިއެވެ.
ކޮންމެ އަހަރަކުވެސް ކޭމްޕް ކުރިއަށްދަނީ މުޖްތަމައުގެ ތަފާތުގެ ކަންކަމަށް ކުދިން ހޭލުންތެރިކުރުމުގެ ގޮތުން ތަފާތު ތީމްތަކަކަށް އަލިއަޅުވާލައިގެންނެވެ. މިގޮތުން މިއަހަރުގެ ކޭމްޕްގެ ޝިއާރަކީ 'ސާރފް ސްމާރޓް'އެވެ. މި ޝިއާރަކީ 10 މިލިއަން މެންބަރުން ހިމެނޭ 'ވޯރލްޑް އެސޯސިއޭޝަން ފޮރ ގާރލް ގައިޑްސް އެންޑް ގާރލް ސްކައުޓްސް' (WAGGGS) އިން އިންޓަރނެޓް ބޭނުންކުރާ ގޮތްތަކާއިމެދު ހޭލުންތެރިކުރުމަށް ބޭނުންކުރާ ބެޖް ކަރިއުލަމްއެކެވެ. ދިވެހިރާއްޖޭގެ ގަރލްގައިޑް އެސޯސިއޭޝަނަކީވެސް ވެގްސްގެ މެންބަރަކަށްވާއިރު ތަރައްގީވެ ކުރިއަރަމުންމިދާ ޓެކްނޮލޮޖީގެ މި ޒަމާނުގައި މިކަމަށް ދިވެހި އަންހެންކުދީންނާއި އަންހެނުން ހޭލުންތެރިކުރުން އިހުނަށްވުރެ މުހިންމުވެފައިވާއިރު، މިއީ މި ދަނޑިވަޅަށް އެންމެ ބޭނުންތެރި އެއް ޝިއާރުކަމަށް ގާރލް ގައިޑް އެސޯސިއޭޝަނުން އަދި ދިރާގަށްވެސް ޤަބޫލުކުރެވެއެވެ. ނޮން-ފޯރމަލް އެޑިޔުކޭޝަންގެ ޒަރީޢާއިން ވީހާވެސް ގިނަ ކުދިންނަށް، ޚާއްސަކޮށް އަންހެންކުދިން އިންޓަރނެޓް ބޭނުންކުރާނެ ރަނގަޅު ގޮތް އޮޅުންފިލުވައިދެވުމަކީ، އެކުދިން ބާރުވެރިކޮށް، ޒިންމާދާރުވެ ހަރުދަނާވާނެކަމެކެވެ.
ދިރާގުން އެހީތެރިކަން ފޯރުކޮށްދޭ ފެސިލިޓޭޓަރސް ޓްރެއިނިންގ ޕްރޮގުރާމުގައި 34 ފެސިލިޓޭޓަރުންނަށް ރަނގަޅު ގޮތުގައި އިންޓަނެޓް ބޭނުން ކުރާނެ ގޮތްތަކަށް ތަމްރީނު ފޯރުކޮށްދޭނެއެވެ. އަދި މި ޕްރޮގްރާމު ނިންމުމަށްފަހު ކޮންމެ ފެސިލިޓޭޓަރެއް ވެސް ޕޮރޮގްރާމުގައި ދަސްވި ކަންތައްތަކުގެ މައުލޫމާތު އިތުރު 100 ކުދިންނަށް ހިއްސާ ކުރާނެއެވެ. އިންޓަރނެޓަކީ މަޢުލޫމާތު ހޯދާ ލިބިގަތުމާއި އަދި އެކިފަރާތްތަކައި ގުޅުން ބަދަހިކޮށް ހުސްވަގުތުތައް ފުރާލަދިނުމަށް މިއަދު ކޮންމެ މީހެއްވެސް ބޭނުންކުރާ ވަސީލަތަކަށް ވީހިނދު، ރައްކާތެރިކަމާއެކު ކޮންމެ ކުއްޖަކަށްވެސް އިންޓަރނެޓް ބޭނުންކުރަން އެނގުމަކީ މުހިއްމުކަމަކަށް ވީހިނދު، މިގޮތުން މައިގަނޑު ތިން ބަޔަކަށް މި ބެޖް ކަރިކިޔުލަމްގައި އަލިއަޅުވާލާނެއެވެ. އެއީ
1. އިންޓަރނެޓްގެ މަންސާ ތަކާއި ހެޔޮ ގުޅުން
2. އިންޓަނެޓްގެ މަންސާ ތަކުގައި ދިމާވާ ނޭދެވޭ ކަންކަމުން ރައްކާތެރިވުން
3. އަމިއްލަ އަބުރާއި ކަރާމާތް އިންޓަރނެޓްގެ މަންސާ ތަކުގައި ހިމާޔަތް ކުރުން
މޯލްޑިވްސް ގާރލް ގައިޑްސް އެސޯސިއޭޝަނަކީ ދިވެހިރާއްޖޭގައި އޮތް އަންހެންކުދިންނާއި އަންހެނުން ބާރުވެރިކުރުވުމަށް ހިލޭސާބަހަށް މަސައްކަތްކުރާ އެންމެ ބޮޑު ޖަމްޢިއްޔާއަށް ވާހިނދު، ދިރާގުން ދެކޭ ގޮތުގައި ރާއްޖޭގެ އެކި ސަރަހައްދުތައް ހިމެނޭގޮތަށް 34 ގައިޑް ލީޑަރުންނަށް 'ސާރފް ސްމާރޓް' ބެޖް ކަރިކިޔުލަމްގެ ފެސިލިޓޭޓަރުންގެ ގޮތުގައި ޓްރެއިންކުރެވުމަކީ މުޖްތަމަޢު އިން އެކަމުގެ ސަބަބުން ހެޔޮ ބަދަލެއް ފެނިގެންދާނެކަމެއްގެ ގޮތުގައިއެވެ. އެގޮތުން ދިރާގު ޑިރެކްޓަރ ޑިޖިޓަލް ޓްރާންސްފޮމޭޝަން މުހައްމަދު މުއްސަފު ވަނީ ޚައްސަ ސެޝަނެއް ބައިވެރިންނަށް ނަގައިދެއްވާފައިއެވެ.
ކޮންމެ އަހަރަކު ބާއްވަމުން އަންނަ ޕެޓްރޯލް ލީޑަރސް ކޭމްޕްގެ އަމާޒަކީ ގާރލްގައިޑް ކުދިންނަށް މިހަރަކާތުގެ މުހިންމު ކޮމްޕޯނަންޓެއް ކަމަށްވާ އައުޓްޑޯރ ކޭމްޕިންގެ ޢަމަލީ ތަޖުރިބާ ހޯދައިދިނުމާއި، އަމިއްލައަށް އިސްނަގައިގެން އެހެންމީހުންނާއި ގުޅިގެން މަސައްކަތްކުރުމާއި އަދި ދިރިއުޅުމަށް ބޭނުންވާނެ ގިނަ ހުނަރުތައް ދަސްކޮށްދީ އަމިއްލަ ނަފްސަށް އިތުބާރުކުރަން ދަސްކޮށްދިނުމެވެ.
