ވަކި ޢުމުރެއްނެތި 18 އަހަރާ ހަމައަށް ލަންކާގައި ކިޔަވާ ކުދިންނާއި ބެލެނިވެރިންގެ އިތުރުން ކާފާ މާމައަށްވެސް ވިސާ ލިބޭގޮތަށް ހަމަޖައްސަވައިފައިވާ ކަމަށް އެޤައުމުގެ ބޮޑުވަޒީރު ރަނިލް ވިކްރަމް ސިންޙް މިއަދު އިޢްލާން ކުރައްވައިފިއެވެ. އެމަނިކުފާނު މިހެން ވިދާޅުވީ ރައްޔިތުންގެ މަޖިލީހުގައި މިއަދު ތަޤްރީރު ކުރައްވަމުން ނެވެ.
ބޮޑު ވަޒީރުގެ ވާހަކަ ފުޅުގައި އެމަނިކުފާނު ރާއްޖެއަށް ކުރައްވަމުން ގެންދަވާ ޒިޔާރަތުގައި ދެޤައުމުގެ ދެމެދުގައި ގިނަ އެއްބަސް ވުންތަކެއްގައި ސޮއިކުރެވިގެން ދިޔަކަން ފާހަގަ ކުރެއްވިއެވެ. އޭގެތެރެއިން ފަހާގަ ކުރެވޭ އެއް އެއްބަސް ވުމަކީ ވިސާގެ ލުއި ފަސޭހަތަކާ ގުޅޭގޮތުން ވެވުނު އެއްބަސްވުމެވެ. ތިންމަސް ދުވަހުގެ އޮން އެރައިވަލް ވިސާގެ އިތުރުން އެއް ޤައުމުން އަނެއް ޤައުމަށް މަލްޓްޕްލް އެންޓްރީ ވިސާވެސް ދޫކުރެވޭނެއެވެ. މީގެ އިތުރުން މިއަދު ބޮޑު ވަޒީރު އިޢުލާން ކުރެއްވި ވިސާގެ ކަންކަން ހަމަޖެހިގެންދާނެއެވެ.
ވިސާގެ ލުއިފަސޭހައިގެ އެއްބަސްވުމުގެ އިތުރުން މަތީތަޢުލީމާއި ޒުވާނުންގެ ތަރައްޤީއާއި އިޖްތިމާޢީ ރައްކާތެރިކަމާއި މަސައްކަތްތެރިކަން ދަސްކޮށްދިނުމުގެ ދާއިރާއިންވެސް އެއްބާރުލުން ދެއްވުމަށް އެމްއޯޔޫގައި ދެޤައުމުގެ ދެމެދުގައި ސޮއިކުރެވުނެވެ.
ސްރީލަންކާގެ ހޮސްޕިޓަލްތަކުން އޯގަންޓްރާސްޕްލާންޓް ކުރެވޭ ގޮތަށް ހަމަޖެހިފައިވާކަންވެސް ބޮޑުވަޒީރުގެ ވާހަކަފުޅުގައި ފާހަގަ ކުރެއްވިއެވެ. އެގޮތުން ކިޑްނީ އާއި ލިވަރ ޓްރާންސް ޕްލާންޓް ކުރެވޭނެކަމަށް ވިދާޅުވިއެވެ. މީގެ އިތުރުން އައްޑޫގައި ހުރިހާ ވަޞީލަތަކާއެކު ޑްރަޤް ރެހެބިލިޓޭޝަން ސެންޓަރެއް ޤާއިމު ކުރެއްވުމަށް ވެވިފައިވާ އެއް ބަސްވުންވެސް ފާހަގަ ކުރެއްވިއެވެ. އަދި ރައީސް އިބްރާހިމް މުޙައްމަދު ޞާލިހްގެ ދަތުރު ފުޅުގައި، ސްރީލަންކާގެ ސަރުކާރުން ރާއްޖޭގައި ދެ ސްކޫލު ޤާއިކމްކޮށް ދިނުމަށް އެއްބަސް ވެވިފައިވާކަން ފާހަގަ ކުރެއްވިއެވެ.
ރާއްޖެއާއި ސްރީލަންކާއާއި ދެމެދު ކުރިންވެސް ގިނަ އެއްބަސްވުންތަކެއް ވެވިފައިވާކަން ފާހަގަ ކުރެއްވި އެވެ. ޢިމާރާތްކުރުމުގެ ދާއިރާއިންނާއި ފަތުރުވެރިކަމާއި ތަޢުލީމީ ދާއިރާއިން ވެވިފައިވާ އެއްބަސްވުންތައް ބޮޑުވަޒީރު ފާހަގަކުރެއްވިއެވެ. އަދި ރާއްޖޭގެ ތަޢުލީމީ ދާއިރާއަށް އެމަނިކުފާނުގެ އެޑިއުކޭޝަން މިނިސްޓަރ ކަމުގައި އެއްބަސްވުންތަކެއްގައި ސޮއި ކުރެއްވުމަށްފަހު ބޮޑު ވަޒީރުކަމުގައި މަތީތަޢުލީމުގެ ދާއިރާއިން އެއްބަސްވުން ތަކެއް ވެވުން ފާހަގަ ކުރެއްވިއެވެ. ރާއްޖޭގައި ގިނަ ޢަދަކަށް ލަންކާގެ ފަންނީ މަސައްކަތްތެރިން މަސައްކަތް ކުރައްވަމުން ގެންދަވާކަމަށް ވެސް ބޮޑު ވަޒީރުގެ ވާހަކަފުޅުގައި ފާހަގަ ކުރެއްވިއެވެ.
ހައްދު ފަހަނަޅައި ދިއުމާއި ޓެރެރިޒާމާއި ދެކޮޅަށް ސަރަޙައްދީ ފެންވަރުގައާއި ދެޤައުމުގެ ދެމެދުގައި ގިނަ މަސައްކަތްތައް ކުރެވިގެންދާނެކަމަށް ދެކެޑައިގަންނަވައި އެކަންކަމުގައި ރާއްޖެއަށް ފުރިހަމަ އެއްބާރުލުން ދެއްވާނެކަމަށް ވިދާޅުވިއެވެ. އަދި 25 އަހަރު ލަންކާގައި ކުރިއަށް ދިޔަ ދާޚިލީ ހަނގުރާމައާއި ދާދި ފަހުން ހިނގާ ދިޔަ ޓެރެރިސްޓް ހަމަލާއަށް ވެސް ބޮޑު ވަޒީރުގެ ވާހަކަ ފުޅުގައި ފާހަގަ ކުރެއްވިއެވެ. އެޓެރެރިސްޓް ހަމަލާގައި ސްރީލަންކާއަށް ލިބުނު ބޮޑު ހިތާމައިގައި ރައްޔިތުންގެ މަޖިލީހުގެ ރައީސްގެ އިސް ނެންގެވުމަށް އިސްވަފުދެއް ލަންކާއަށް ވަޑައިގެން އެޤައުމަށް ދެއްވި ހިތްވަރާ އެއްބާރުލުން ބޮޑު ވަޒީރު ފާހަގަ ކުރެއްވިއެވެ.
މޫސުމަށް އަންނަ ބަދަލުތަކަކީ ދެ ގައުމަށް ވެސް އޮތް ގޮންޖެހުމެއް ކަމަށް ފަހާގަކުރައްވާ، އެ މައްސަލަ ހައްލުކުރުމަށް ދެޤައުމު އެކުގައި ބައިނަލް އަޤާވާމީ ފެންވަރުގައި މަސައްކަތްތަކެއް ކުރެވިދާނެކަމަށް ފާހަގަ ކުރެއްވިއެވެ.
ރައްޔިތުންގެ މަޖިލީހާއި ލަންކާގެ ޤާނޫނުހަދާ މަޖިލީހާ ދެމެދު އެއްބާރުލުން ދެއްވާ މަޢުލޫމާތި މަދަލު ކުރެއްވުމަށް މަސައްކަތް ކޮށްދެއްވާނެކަމަށް ވެސް ބޮޑު ވަޒީރު ވިދާޅުވިއެވެ. އަދި ރައްޔިތުންގެ މަޖިލީހުގައި ތަޤްރީރު ކުރެއްވުމަށް ފުރުޞަތު ލިބިވަޑައިގެންނެވުމަކީ ފަޚުރުވެރިވެވަޑައިގަންނަވާ ކަމެއްކަމަށް ފާހަގަ ކުރެއްވިއެވެ.
މިއަދު ރައްޔިތުންގެ މަޖިލީހުގައި ލަންކާގެ ބޮޑު ވަޒީރު ތަޤްރީރު ކުރެއްވުމަށް ފަހު ރައްޔިތުންގެ މަޖިލީހުގެ ރައީސްވަނީ، އެމަނިކުފާނަށް ހަދިޔާއެއްގެ ގޮތުގައި އިސްދޫ ލޯމާފާނެއް އަރުވާފައެވެ.
