ސީރިޔާގައި ކުރިއަށްދާ ދާޚިލީ ހަނގުރާމައިގައި، އިދިކޮޅު ހަނގުރާމަވެރިންގެ ބާރުގެ ދަށުގައި މިހާރު އޮތް ހަމައެކަނި ޕްރޮވިންސް އިދްލިބްގައި ހަރަކާތްތެރިވާ ހަނގުރާމަވެރިންނަށް އެމެރިކާންއިން ދިން މިސައިލް ހަމަލާއެއްގައި 40 މީހުން މަރުވެއްޖެއެވެ. އެމެރިކާ ސިފައިންގެ ސެންޓްރަލް ކޮމާންޑުން ބުނީ ހަމަލާދީފައި ވަނީ އަލްޤާއިދާއާ ގުޅުންއޮންނަ ޖަމާއަތެއްގެ އިސް މީހުންނަށް އަމާޒުކޮށް ކަމުގައެވެ.
އިދްލިބް ހިފުމަށް ރައީސު ބައްޝާރުލް އަސަދު ސިފައިން ދަނީ އެއްގަމު މަގުންނާއި ވައިގެ މަގުން ވަރުގަދަ ހަމަލާތަކެއް ދެމުންނެވެ. ރަޝިޔާގެ ވައިގެ ސިފައިންގެ އެހީތެރިކަމާއެކު ދެމުންދާ ހަމަލާތަކުގައި ގިނަ ބަޔަކު ދަނީ މަރުވެފައެވެ.
އިދްލިބް ޕްރޮވިންސު ގެ ބޮޑުބައި މިހާރު އޮތީ އިސްލާމީ ހަނގުރާމަވެރިންގެ ބާރުގެ ދަށުގައެވެ. އެމެރިކާއިން ހަމަލާދިނީ އެ ޖަމާއަތުގެ މަރުކަޒަކަށް ކަމަށް ބެލެވެއެވެ.ގިނަ ބަޔަކު ޤަބޫލުކުރާ ގޮތުގައި އެއީ އަލްޤާއިދާއާ ގުޅިގެން ހަރަކާތްތެރިވާ ބައެކެވެ.
"(އެމެރިކާއިން ހިންގި) އޮޕަރޭޝަން އަމާޒުކުރީ ސީރިޔާގެ އަލްޤާއިދާ ޖަމާއަތުގެ ވެރިންނަށް. އެ ޖަމާއަތަކީ އެމެރިކާގެ ރައްޔިތުންނަށާއި، އަހަރުމެންގެ ބައިވެރިންނަށާއި، ކުށެއްނެތް އާއްމުނަށް ހަމަލާދިނުމުގެ ޒިންމާ އުފުލަން ޖެހޭ ޖަމާއަތެއް." ސެންޓްރަލް ކޮމާންޑުގެ ތަރުޖަމާނު ލެފްޓިނެންޓް ކާނަލް އާލް ބްރައުން އީމޭލުން އާއްމުކުރި ބަޔާނެއްގައި ވެއެވެ.
"މިސައިލް ހަމަލާ އަމާޒުކޮށްފައިވަނީ ހުއްރާސުއްދީނާއި، އަންޞާރުއްތައުޙީދާއި އެހެން ބައެއް ޖަމާއަތްތަކުގެ އިސް ވެރިން ޓްރޭނިންގ ކޭންޕެއްގައި ބައްދަލުކުރަމުން ދަނިކޮށް އެތަނަށް." ސީރިޔަން އޮބްޒަވޭޓަރީ ފޯ ހިއުމަން ރައިޓްސްގެ ރައީސު ރާމީ ޢަބްދުއްރަޙްމާން ވިދާޅުވިއެވެ. އޭނާ ވިދާޅުވި ގޮތުގައި އެ ހަމަލާގެ ސަބަބުން މަދުވެގެން 40 މީހުން މަރުވެފައި ވެއެވެ.
އޮބްޒަވޭޓަރީން ބުނެފައި ވަނީ ހަމަލާދީފައި ވަނީ ދުރުރާސްތާގެ މިސައިލުން ކަން، ނުވަތަ އަސްކަރީ މަތިންދާބޯޓުން ފޮނުވާލި މިސައިލުން ކަން އެ ޖަމާއަތަށް ކަށަވަރުވެފައި ނުވާ ކަމުގައެވެ.
އެހެންނަމަވެސް ހަނގުރާމަވެރިންގެ ފަރާތުން ޔަގީންކޮށްދީފައިވާ ގޮތުގައި ހަމަލާދީފައި ވަނީ މަތިންދާބޯޓުންނެވެ.
"ބައިނަލްއަގްވާމީ ކޯލީޝަންގެ މަތިންދާބޯޓުތަކެއް ކަމަށް ބެލެވޭ އެފް-16 އިގެ މަތިންދާބޯޓުތަކަކުން ވަނީ މިއަދު (ހޮނިހިރު ދުވަހު) މެންދުރު ފަހުން ހަތް މިސައިލު ފޮނުވާފައި. އެ އަމާޒުކޮށްފައި ވަނީ އިދްލިބްގެ އިރު ދެކުނުގައި އޮންނަ ކަފަރް ޖާލިސްގައި ހުންނަ ޙުއްރާސުއްދީންގެ އަސްކަރީ މަރުކަޒަކަށް." އިބްދިބް ފްރީ އާމީގެ ފަރާތުން ވާހަކަދެއްކި މީހަކު ބުންޏެވެ.
އިދްލިބް ޕްރޮވިންސް ކޮންޓްރޯލްކުރަމުން ދަނީ ފްރީ ސީރިޔަން އާމީންނެވެ. އެ ލަޝްކަރުގައި ހައިއަތު ތަޙްރީރިއްޝާމް (ކުރީގެ ޖަބްހަތުއްނުޞްރާ)، ޙުއްރާސުއްދީން، އަންޞާރުއްތައުޙީދް ފަދަ އިސްލާމީ ހަނގުރާމަވެރި ޖަމާއަތްތައް ހިމެނެއެވެ.
