ޖުޑީޝަލް ސާވިސް ކޮމިޝަން (ޖޭއެސްސީ) ގައި ދަށު ކޯޓު ތަކުން ތަމްސީލު ކުރައްވާ ފަނޑިޔާރަކު ހޮވުމަށްޓަކައި މިއަދު ބޭއްވި އިންތިޚާބު ލ. ޖުޑީޝަލް ދާއިރާގގެ އިސްމެޖިސްޓްރޭޓް އަލީ ޝަރީފް ކާމިޔާބު ކުރައްވައިފިއެވެ.
ދަށު ކޯޓުތަކުގެ ފަނޑިޔާރުންގެ ތެރެއިން 93 ޕަސެންޓް ވޯޓުގައި ބައިވެރިވެވަޑައިގެންނެވިއިރު އިންތިޚާބުގައި އަލީ ޝަރީފްއާ އެންމެ ބޮޑަށް ވާދަކުރެއްވި ކްރިމިނަލް ކޯޓުގެ އިސްގާޒީ އަޙްމަދު ހައިލަމްއާ ދެބޭފުޅުންގެ މެދުގައިވެސް 90 ވޯޓުގެ ތަފާތެއް ހުއްޓެވެ. ހައިލަމްއަށްވުރެ 90 ވޯޓު ގިނައިން ހޯއްދަވައިގެން އަލީ ޝަރީފް އިންތިޚާބު ކާމިޔާބު ކުރެއްވިއިރު ދެން ވާދަކުރެއްވީ ގދ. ފިޔޯރީ ކޯޓުގެ އިސްމެޖިސްޓްރޭޓް އަބްދުއްރައްޒާގު މުޙަންމަދެވެ.
އަލީ ޝރީފް ދަށު ކޯޓުތަކުން ޖޭއެސްސީއަށް އިންތިޚާބުވެވަޑައިގަތީ 127 ވޯޓު ހޯއްދަވައިގެންނެވެ. ގާޒީ ހައިލަމްއަށް ލިބިވަޑައިގަތީ 37 ވޯޓެވެ. އަބްދުއްރައްޒާގަށް ލިބިވަޑައިގަތީ އެންމެ ވޯޓެކެވެ.
ޖޭއެސްސީއަށް ދެން އެންމެ އަވަހަށް ހަމަޖައްސަވާނީ އާންމުންގެ ތެރެއިން ބޭފުޅެކެވެ. އާންމުންގެ ތެރެއިން ޖޭއެސްސީއަށް ކުރިމަތި ލައްވަން ބޭނުންވާ ފަރާތްތަކުން ކުރިމަތި ލެއްވުމަށް ރައްޔިތުންގެ މަޖިލީހުން މީގެކުރިން ކުރެއްވި އިއުލާނާއި ގުޅިގެން ކުރިމަތި ލެއްވި ބޭފުޅުންގެ ތެތެރެއިން ޖޭއެސްސީއަށް ބޭފުޅަކު ހަމަޖެއްސުމުގެ މަސައްކަތް މިހާރު އޮތީ މަޖިލީހުގެ ޖުޑިޝަރީ ކޮމިޓީގައެވެ.
