1440 ވަނަ އަހަރުގެ ޙައްޖުގެ މަތިވެރި އަޅުކަން އަދާކުރުމަށް މާތްވެގެންވާ މައްކާއަށް އެއްވެ ތިބި 2.5 މިލިއަނަށްވުރެ ގިނަ މުސްލިމުން މިއަހަރުގެ ޙައްޖުގެ ދަތުރު ފަށައިފިއެވެ. ޙައްޖުވެރިން ވަނީ މިއަދު، 'ތަރްވިޔާ' ގެ ދުވަހު (ތަރްވިޔާ ދުވަހަކީ ޙައްޖު މަހުގެ 8 ވަނަ ދުވަސް) މިނާގެ ބިމަށް އެއްވެފައެވެ. މިނާގައި މިއަދާއި މިރޭ ހޭދަކުރުމަށް ފަހު ޙައްޖުވެރިން މާދަމާ، ޙައްޖު މަހުގެ 9 ވަނަ ދުވަހު ދަތުރުކުރާނީ ޢަރަފާތް ބިމަށެވެ.
ޙައްޖުގެ އަޅުކަމުގެ ތެރޭގައި ޙައްޖުވެރިން އެންމެ ގިނަ ދުވަސް ހޭދަކުރާ ބިން ކަމުގައިވާ މިނާގައި 3 ލައްކަ 50 ހާސް ފޭލިގެ ގާއިމުކޮށްފައި ވެއެވެ. މިއީ ފައިބަގްލާސް ފުޅާލު ލާފައި، އޭސީ ކޮށްފައި ހުންނަ ފޭލިގެތަކެކެވެ.
ޙައްޖާއި ގުޅޭ ގޮތުން ސަޢުދީ ސަރުކާރުން ހާމަކުރި ތަފާސް ހިސާބުތަކުން ދައްކާ ގޮތުގައި މިއަހަރު ޙައްޖުގެ އަޅުކަން އަދާކުރުށް ބޭރު ގައުމުތަކުން 1.8 މިލިއަން މީހުން ސަޢުދީ އަރަބިއްޔާއަށް އެތެރެވެފައި ވެއެވެ. ޙައްޖުވުމަށް ސަޢޫދީ އަރަބިއްޔާއަށް މިއަހަރު އެތެރެވެވޭނެ ފަހު ދުވަސް މިހާރު ފާއިތުވެފައިވާއިރު، ޖެނެރަލް ޑިރެކްޓަރެޓް އޮފް ޕާސްޕޯސްޓްސް އިން ހާމަކުރި ގޮތުގައި، ވައިގެ މަގުން އެތެރެ ވެފައި ވަނީ 1.72 މިލިއަން މީހުންނެވެ. 95 ހާސް މީހުން އެއްގަމު މަގުން އެތެރެވެފައި ވާއިރު 17 ހާސް މީހުން އެތެރެވެފައި ވަނީ ކަނޑު މަގުންނެވެ.
ސައުދީ ޚަބަރު ފަތުރާ ވަސީލަތްތަކުން ލަފާކުރާ ގޮތުގައި މިއަހަރު ޙައްޖުގެ އަޅުކަން އަދާކުރުމަށް ސައޫދީ ޢަރަބިއްޔާގެ އެތެރެއިން 7 ލައްކައާ ގާތްކުރާ އަދަދަކަށް މީހުން ދާނެއެވެ.
މާތް ﷲ، އެކަލާނގެ ޚަލީލު އިބްރާހީމް އަށް އަންގަވައިގެން އެކަލޭގެފާނު ގޮވައިލެއްވި ގޮވައިލެއްވުމަށް އިޖާބަދިނުމުގެ ގޮތުން މާތްވެގެންވާ މައްކާގެ ބިމަށް އެއްވެ ތިބި ޙައްޖުވެރިން ޢަރަފާތް ބިމަށް އެއްވާނީ މި އަހަރުގެ ޙައްޖު ދުވަސްކަމުގައި ވާ ހޮނިހިރު ދުވަހު (މާދަމާ) އެވެ. ސިއްހަތުގެ ގޮތުންނާއި ފުދުންތެރިކަމުގެ ގޮތުން ކުޅަދާނަވެގެންވާ ކޮންމެ މުސްލިމެއްގެ މައްޗަށް އުމުރުން އެއްފަހަރު އަދާކުރުން މާތް ﷲ ފަރުޟުކުރައްވާފައި ޙައްޖަކީ އިސްލާމް ކަމުގެ 5 ވަނަ ރުކުނެވެ.
ޙައްޖު ދުވަހުގެ މެންދުރު ނަމާދާއި އަސްރު ނަމާދު ޤަޞްރުކޮށް ޖަމުޢުކޮށް މަސްޖިދު ނަމިރާގައި ކުރުމުގެ ކުރިން ޙައްޖު ދުވަހުގެ ޚުޠުބާ ދިނުން އޮންނާނެއެވެ. މި ފަހަރު ޙައްޖު ދުވަހުގެ ޚުޠުބާ ދިނުމަށް ސައޫދީ ސަރުކާރުން ހަވާލުކޮށްފައި ވަނީ އައްޝައިޚް މުޙައްމަދު ބިން ޙަސަން އާލުއްޝައިޚް އާއެވެ. އޭނާއަކީ ސައޫދީ ޢިލްމުވެރިންގެ މަޖިލީހުގެ މެންބަރެކެވެ.
ގަލްފުގެ މަސްރަހު ހޫނުވެ އީރާނާ ސައޫދީ އަރަބިއްޔާއާ ދެމެދު ގުޅުން ކެނޑިފައިވީ ނަމަވެސް ގިނަ އަދަދެއްގެ އީރާނު މީހުން މިއަހަރުވެސް ހައްޖަށް ދިޔައެވެ. އީރާނު ހައްޖުވެރިންގެ އަދަދު 88 ހާހަށްވުރެ ގިނަ ކަމަށް ވެއެވެ.
