ރާއްޖޭގައި ޞިއްޙީ ޚިދުމަތްދޭ، %70 ތަންތަނަކީ އެކަށީގެންވާ ޚިދުމަތް ފޯރުކޮށްދެވޭ ހާލަތުގައި ހުރި ތަންތަނެއް ނޫންކަމަށް ހެލްތް މިނިސްޓަރ ޢަބްދުﷲ ޢަމީން ވިދާޅުވެއްޖެއެވެ. އަމީން މިހެން ވިދާޅުވެފައިވަނީ ރައްޔިތުންގެ މަޖިލީހަށް ވަޑައިގެން މެމްބަރުން ކުރެއްވި ސުވާލު ތަކަށް ޖަވާބު ދެއްވަމުންނެވެ.
ރާއްޖޭގައި 187 ޞިއްޙީ ޚިދުމަތްދޭ ތަންތަން ހުރިއިރުގައި އޭގެތެރެއިން %70 ތަންތަނަކީ އިމާރާތުގެ ގޮތުންނާއި، ވަސީލަތުގެ ގޮތުންނާއި، އަދި އެނޫން ގޮތްގޮތުން ވެސް އެތަންތަނުން ފޯރުކޮށްދޭންޖެހޭ އެންމެ އެކަށީގެންވާ ޚިދުމަތް ފޯރުކޮށްދެވޭ ހާލަތުގައި ހުރި ތަންތަން ނޫންކަން މިނިސްޓަރ ފާހަގަ ކުރެއްވިއެވެ.
މި އަހަރަށް ޞިއްޙީ ދާއިރާގެމަޝްރޫޢުތައް ރޭވިފައިވާ ގޮތް ހާމަ ކުރައްވަމުން މިނިސްޓަރ އަމީން ވިދާޅުވީ ފުރަތަމަ ކަމަކީ، މި އަހަރަށް ކަނޑައެޅުނު ބަޖެޓުގައި ފާހަގަކޮށްފައ ހުރި ކަންކަން ބަޖެޓުގައި ހުރި ތަރުތީބުން ކުރުމެވެ. ދެވަނަ ކަމަކީ، ރައީސުލްޖުމްހޫރިއްޔާގެ ވަޢުދުފުޅުތަކުގެ ތެރޭގައި ހިމެނޭ ކަންކަން މި އަހަރުގެ ބަޖެޓުން ތަންދޭ މިންވަރަކަށް، އެކަންކަން ކުރެވެން އޮތް ގޮތަކަށް ކުރުމެވެ. ތިންވަނަ ކަމެއްގެ ގޮތުގައި އޮތީ ވަރަށް ބޮޑަށް ދަތިކަން ހުރި ތަންތަނުގެ ދަތިކަން ފިލުވައި ދިނުމުގެ މަސައްކަތްތައް ކަމަށް އަމީން ފާހަގަ ކުރެއްވިއެވެ. އަވަހަށް ޚިދުމަތްދޭންޖެހޭ ހާލަތުގައި ޞިއްޙީ ޚިދުމަތްދޭ ފަންސަވީހަކަށް ތަން އެބަހުރި ކަމަށް މިނިސްޓަރ އަމީން ފާހަގަ ކުރެއްވިއެވެ.
ރާއްޖޭގެ ޞިއްޙީ ދާއިރާ އަށް މި ވަގުތު ދިމާވެފައި އޮތް އެންމެ ބޮޑު މައްސަލައަކީ، ވޭތުވެދިޔަ 5 އަހަރު ޞިއްޙީ ދާއިރާއަށް އަޅައިނުލާ ދޫކޮށްލި، ދޫކޮށްލުން ކަމަށް މަޖިލީހުގައި ހެލްތް މިނިސްޓަރ އަމީން ވިދާޅުވިއެވެ. ރިޔާސީ އިންތިޚާބާ ދިމާކޮށް ރާއްޖޭގެ ޞިއްހީ ޚިދުމަތްދޭ 28 ތަން 24 ގަޑިއިރަށް ބަދަލުކޮށްފައި ވަނީ ހަމައެކަނި ނަންބޯޑު ބަދަލުކޮށްގެން ކަމަށް ހެލްތް މިނިސްޓަރ ފާހަގަ ކުރެއްވިއެވެ.
"ކޮންމެ ތަނެއް ބަދަލުކުރީ 24 ގަޑި އިރަށް،16 ގަޑިއިރަށް. މިއިން އެއްވެސް ތަނަކަށް ބޭނުންވާ މުވައްޒަފުން ފޯރުކޮށްދީފައެއް ނެތް. އެ މީހުންނަށް ބަޖެޓު ފޯރުކޮށްދީފައެއް ނެތް. ލެބޯޓްރީތަކަށް ވަސީލަތް ފޯރުކޮށްދީފައެއް ނެތް.އަށް ގަޑިއިރުގެ، ތަން 24 ގަޑިއިރަށް ބަދަލުކުރީމަ 4 ނަރުހުންނާ އެކީގައި ކިހިނަކުންތޯ އެ ބޭފުޅުން ޚިދުމަތްދޭނީ؟ ކޮންތަނަކުންތޯ އަޅުގަނޑުމެން ފައިސާ ހޯދާނީ؟ ކޮބައިތޯ އެ ފައިސާ؟ އެގޮތަށް ޞިއްޙީ ދާއިރާއަށް އިހުމާލުވުމުގެ ސަބަބުން މިއަދު ޞިއްޙީ ދާއިރާއަށް ދިމާވެފައިހުރި ގޮންޖެހުންތައް ކުރިމަތިވެގެން މި އުޅެނީ." ހެލްތް މިނިސްޓަރ ވިދާޅުވިއެވެ.
ހޮސްޕިޓަލްތަކާއި އަދި ޞިއްޙީ ޚިދުމަތްދޭ ތަންތަން އަޕްގްރޭޑުކުރުމާއި އެތަންތަނަށް ބޭނުންވާ އެހެން ޚިދުމަތްތަކުގެ ތަޞައްވަރު ކުރިއަށް އޮތް އަހަރަށް ހުށަހަޅާ ބަޖެޓުގެ ތެރެއިން، ވަރަށް ބޮޑަށް ފެނިގެންދާނެކަމަށް ހެލްތް މިނިސްޓަރ ފާހަގަ ކުރެއްވި އެވެ.
