ސައޫދީ އަންހެނުން ބޭރަށް ދަތުރުކުރުމަށް ނުވަތަ ޕާސްޕޯޓެއް ހޯދުމަށް ފިރިހެން ބެލެނިވެރިއެއްގެ ހޯދަހޯދަން ޖެހޭ ގޮތަށް އޮތް އޮތުން އެގައުމުގެ ރަސްގެފާނު އުވާލައްވައިފިއެވެ.
ސަލްމާން ރަސްގެފާނު ނެރުއްވި ޝާހީ އަމުރުފުޅެއްގައި ވާގޮތުން، ޕާސްޕޯޓު ހެއްދުމަށް ބެލެނިވެރިއެއްގެ ހުއްދަ ދެން ބޭނުންވާނީ ހަމައެކަނި ކުޑަކުދިންނަށެވެ. ކުރިން ސައޫދީ އަރަބިއްޔާގައި އަމަލުކުރަމުން އައި އުސޫލުގައި ވާގޮތުން އަންހެނަކު ބޭރަށް ދަތުރުކުރަން ބޭނުންނަމަ އޭނާއަށް ޕާސްޕޯޓު ހެއްދޭނީ އޭނާގެ ފިރިމީހާ، ނުވަތަ (ފިރިއަކު ނެތް ހާލަތުގައި) އެންމެ ގާތް ވާރުތަވެރިޔާގެ ހުއްދަ ލިބިގެންނެވެ.
ރަސްގެފާނުގެ އަމުރުފުޅުގައި އަންހެނުންނަށް ބެލެނިވެރިޔާގެ ހުއްދަ ނެތި ދަތުރުކުރަން ހުއްދަދެއްވި ވާހަކަ ކަނޑައެޅިގެން ބަޔާންކޮށްފައި ނެތަސް، އެ އަމުރުފުޅުގައި ވަކި ޖިންސެއް ބަޔާންނުކޮށް، ކުޑަކުދިން ފިޔަވައި އެންމެންނަށް މިނިވަންކަމާއެކު ދަތުރުކުރުމުގެ ހުއްދަ ދެއްވާފައި އޮތުމުން، ސައޫދީ ނޫސްތަކުން ބުނެފައި ވަނީ އެއީ އަންހެނުންނަށް ބެލެނިވެރިޔާގެ ހުއްދަ ނެތި ދަތުރުކުރުމުގެ ހުއްދަދެއްވުން ކަމުގައެވެ.
ސައޫދީ ވަލީއަހުދު މުޙައްމަދު ބިން ސަލްމާނުގެ 'ވިޝަން 2030' ގެ މަޝްރޫއުގެ ދަށުން، ސައޫދީ ނިޒާމުގައި އަންހެނުންނަށް ހުރި ހުރަސްތައް ދަނީ ނައްތާލަމުންނެވެ. މިގޮތުން، އަންހެނުންނަށް އެއްގަމު އުޅަނދު ދުއްވުމުގެ ލައިސަންސްވެސް މިހާރު ވަނީ ދޫކުރަން ފަށާފައެވެ.
އެމެރިކާގައި ހުންނަވާ ސައޫދީ އަރަބިއްޔާގެ ސަފީރު އަމީރާ ރީމާ ބިންތި ބަންދަރް ބިން ޢަބްދުލްޢަޒީޒު ވަނީ ގާނޫނަށް ގެނެވުނު ބަދަލުތަކާމެދު އުފާކުރައްވާކަން ހާމަކުރައްވާފައެވެ.
"މި ގަވާއިދުތަކުން މިދަނީ ތާރީޚު ބަދަލުވަމުން. އެއިން ގޮވާލަނީ އަހަރުމެންގެ މުޖުތަމައުގައި އަންހެނުންނާއި ފިރިހެނުން ހަމަހަމަ ގޮތެއްގައި ބައިވެރިވުމަށް." އެކަމަނާ ވިދާޅުވިއެވެ.
އަންހެނުންނަށް ދަތުރުކުރުމުގެ މައްސަލައާމެދު ސައޫދީ ޝޫރާ މަޖިލީހުގައި ބަހުސްކުރެވެމުންދާތާ ދުވަސްތަކެއް ވެއްޖެއެވެ. އެ މަޖިލީހުގެ ގިނަ މެންބަރުން ވަނީ އެކަމަށް ތާއީދުކުރައްވައި ވާހަކަފުޅު ދައްކަވާފައެވެ.
