ކުރީގެ ރައީސް ނަޝީދު އިސްކޮށް ހުންނަވައިގެން އުފައްދާފައިވާ އިދިކޮޅު އިއްތިޙާދުން ރާއްޖޭގެ މިހާރުގެ ސަރުކާރު ވައްޓާލައި ހަފްތާއެއްގެ ތެރޭގައި މިޤައުމުގައި އިންތިޤާލީ ސަރުކާރެއް ޤާއިމުކުރަން ރާވާފައިވާކަމަށް ބީބީސީން ރިޕޯޓުކުރީ މިދިޔަ އޮގަސްޓުމަހުގެ 25 ވަނަދުވަހުއެވެ.
ހަފްތާއެއްގެ ތެރޭގައި ޔައީސް ޔާމީން ވެރިކަމުން ދުރުކުރަން އިދިކޮޅު ސިޔާސީ ފަރާތްތަކުން ރާވާފައިވާކަމަށް ބީބީސީން ބުނީ ނަންހާމަނުކުރާ މަސްދަރަކާ ޙަވާލާދީއެވެ. ބީބީސީން ރިޕޯޓުކޮށްފައިވާގޮތުގައި ރައީސް އަބްދުﷲ ޔާމީން ވެރިކަމުން ދުރުކޮށް، ރާއްޖޭގައި އުފެދިފައިވާ ގާނޫނީ ސަރުކާރު ވައްޓާލުމަށް އިދިކޮޅު ފަރާތަކުން ވަނީ “ޕްލޮޓެއް” ރާވާފައެވެ.
އެހެންނަމަވެސް އެއީ ކިހިނެއްރާވާ ކޮންކަހަލަ ޕްލޮޓެއްކަމެއް އަދި އެރޭވުމުގެ މާބޮޑު ތަގްސީލެއްވެސް ބީބީސީން ހާމަކޮށްފައެއްނުވެއެވެ. އެހެންނަމަވެސް މިދިޔަ އޮގަސްޓުމަހުގެ 25 ވަނަ ދުވަހުންފެށިގެން ކުރިއަށް އޮތް ހަފްތާއެއްހައި ދުވަހުގެ ތެރޭގައި އިދިކޮޅު ފަރާތްތަކުގެ ރޭވުން ކާމިޔާބުކުރުމަށް އެފަރާތްތަކުން ބޮޑެތި މަސައްކަރތްތަކެއް ކުރާނެކަމަށް ބީބީސީން ބުނެފައިވެއެވެ.
ރައީސްއޮފީހުގެ އިންޓަނޭޝަނަލް ސްޕޯކްސްޕާސަން ބީބީސީއަށް މަޢުލޫމާތުދީފައިވާގޮތުގައި ރާއްޖެއިން ބޭރުގައި ތިބި އިދިކޮޅު ސިޔާސީ ފަރާތްތަކުން މި ސަރުކާރު ވައްޓާލަން ރޭވުންތަކެއް ރާވާފައިވާކަން، ސަރުކާރަށް އެނގެއެވެ. އެހެންނަމަވެސް ޤާނޫނީ އިމުގެތެރެއިން މިސަރުކާރު ވައްޓާލެވޭނެ އުސޫލެއް، ހަމައެއް އިދިކޮޅުފަރާތްތަކަށް ނެތްކަމަށް ސަރުކާރުންދަނީ ވިދާޅުވަމުންނެވެ. ޤާނޫނީ އިމުގެ ބޭރުން ޤާނޫނީ ސަރުކާރެއް ވައްޓާލުމަކީ ބައިނަލްއަގުވާމީ އުސޫލުތަކާއި ޑިމޮކްރަސީއާވެސް މުޅިން ހިލާފު ޣައިރު ގާނޫނީ އަމަލެއް ކަމަށް ސަރުކާރުން ވަނީ ވިދާޅުވެފައެވެ.
ޓެރަރިޒަމްގެ ކުށުގައި 13 އަހަރުގެ ޖަލުޙުކުމެއް އިއްވާފައިވާ ކުރީގެ ރައީސް ނަޝީދު އިނގިރޭސިވިލާތުގެ ޙިމާޔަތް ހޯއެއްދެވުމަށްފަހު އުފެއްދެވި އިދިކޮޅު އިއްތިޙާދުއުފެދުނުފަހުން ގެންދަނީ މިސަރުކާރު ވައްޓާލާނެކަމުގެވާހަކަ ދައްކަމުންނެވެ.
އެއިއްތިހާދުގެ މައިގަނޑު މަޤުސަދަކީ ދައުރު ހަމަވުމުގެކުރިން ރައީސް ޔާމީން ވެރިކަމުން ދުރުކުރުމަށްފަހު، އިންތިޤާލީ ސަރުކާރެއް ޤާއިމުކުރުންކަމަށާ، އެސަރުކާރުގެ ރައީސަކަށް ވެވަޑައިގަންނަވާނީ އިއްތިހާދުގެ ލީޑަރު ޑރ.ޖަމީލު ކަމަށް ނަޝީދުވަނީ ވިދާޅުވެފައެވެ.
އިދިކޮޅު ފަރާތްތަކުން ސަރުކާރުވައްޓާލަން ރާވާފައިވާކަމަށް ބީބީސީން ރިޕޯޓް ކުރި އިރު ނަޝީދާއި އެމަނިކުފާނާއެކު އިނގިރޭސިވިލާތުގައި ދިރިއުޅުއްވާ ސިޔާސީ އިސްބޭފުޅުން ތިއްބެވީ އަވަށްޓެރިސްރީލަންކާގައެވެ. އެދަތުރުފުޅުގެ މަޤުސަދަކީ ސަރުކާރާ ދެކޮޅަށް އެއިއްތިޙާދުން ކުރާ ބައެއްކަންކަމާގުޅޭގޮތުން ސިއްރު ބައްދަލުވުމެއް ބޭއްވުންކަމަށް އެފަރާތްތަކުން ވަނީ ހާމަކޮށްފައެވެ.
އިދިކޮޅު ފަރާތްތަން އެކި ގޮތްގޮތުން ހާމަކުރި މަޢުލޫމާތުތަކަށް ބުރަވެ ބީބީސީން ބުނި ހަފްތާ ފާއިތުވެދިޔައީއެވެ. އެއީ އޮގަސްޓު 25 އެވެ. މިއއަދަކީ އޮކްޓޫބަރު 10 އެވެ. ޖުމުލަ 6 ހަފްތާ ފާއިތުވެގެން ދިޔައީއެވެ. ސަރުކާރުދަނީ ކުރިއަށެވެ.
އެހެންކަމުން އިދިކޮޅުފަރާތްތަކުން ދައްކާ މިފަދަ ވާހަކަތަކުގެ އިތުބާރާމެދު އަނެއްކާވެސް އިތުރު ސުވާލުތަކެއް އުފެދުނީއެވެ. ކޮންމެ ރެއަކުހެން ހަރުގެ ޖަލްސާތައް ބާއްވައި ރައްތިޔުންނާ ބައްދަލުކުރާއިރު، މިކަމުގެ ވާހަކަވެސް ދައްކަން ޖެހެއެވެ. ޖަވާބުދާރީވާންޖެހެއެވެ.
