ރ. އުނގޫފާރު ޕޮލިސް ސްޓޭޝަނާއި ބޮޑީ ބޯޑިންގ އެސޯސިއޭޝަން (ސާފިންގ) އަދި ރަސްމާދޫ ކައުންސިލް ގުޅިގެން ރަސްމާދޫގައި ހިންގި ފުއްޓަރު ޔޫތު ޕްރޮގްރާމް ނިންމާލައިފިއެވެ.
ސެޕްޓެމްބަރު މަހުގެ 7 ން 15 އަށް ރަސްމާދޫގައި ކުރިއަށް ގެންދިޔަ މި ޕްރޮގްރާމަކީ ރަސްމާދޫ ހުރިހާ ޢުމުރު ފުރާއަކަށް ހުޅުވާލައިގެން، ހާއްސަކޮށް ޒުވާނުންނަށް އަމާޒުކޮށްގެން ކުރިއަށް ގެންދިޔަ ޕްރޮގްރާމެކެވެ.
މި ޕްރޮގްރާމުގައި ދިމާވާ ހާދިސާތަކުގައި ފަސްޓްއެއިޑް އާއި ސީޕީއާރު ދޭނެ ގޮތް ދަސްކޮށްދިނުމާއި ރާޅާ އަޅަން ފަށާފައިވާ ކުދިންނަށް އިތުރަށް އެ ހުނަރުތައް ދަސްކޮށްދިނުމާއި ރާޅާ އަޅާ ސީނިއަރ ކުދިންނަށް ރާޅާ އެޅުމުގެ މުބާރާތަކާއި ޒުވާނުންގެ ދުޅަހެޔޮ ސިއްޙަތެއްގައި ހުރުމަށް ބާރުއެޅުމަށް ކަސްރަތު ޕްރޮގްރާމެއް ކުރިއަށް ގެންގޮސްފައިވެއެވެ.
4 ބަޔަކަށް ބަހާލައިގެން ކުރިއަށް ގެންދިޔަ މި ޕްރޮގްރާމްގެ ތެރެއިން ކުރިއަށް ގެންދިޔަ ކަސްރަތު ޕްރޮގްރާމުގައި 60 ބައިވެރިން ބައިވެރިވެފައިވެއެވެ. އަދި ފަސްޓް އެއިޑް ޕްރޮގްރާމުގައި 25 ބައިވެރިން ބައިވެރިވެފައިވާއިރު ރާޅާ އަޅަން ދަސްކޮދިނުމަށް ކުރިއަށް ގެންދިޔަ ޕްރޮގްރާމުގައި 32 ކުއްޖަކު ބައިވެރިވެފައިވެއެވެ. މީގެއިތުރުން ފުއްޓަރު ޔޫތު ޕްރޮގްރާމުގެ ތެރެއިން ރާޅާ އެޅުމުގެ މުބާރާތެއް ކުރިއަށް ގެންގޮސްފައިވާއިރު މި މުބާރާތް ކުރިއަށް ގެންގޮސްފައިވަނީ ދެ ބަޔަކަށް ބަހާލައިގެންނެވެ.
އެގޮތުން ބޮޑީ ބޯޑް މުބާރާތުގައި 16 އަހަރުން ދަށުގެ 15 ކުއްޖަކު ބައިވެރިވެފައިވާއިރު 16 އަހަރުން މަތީ އުމުރު ފުރައިން 8 ކުއްޖަކު ބައިވެރިވެފައިވެއެވެ. އަދި ޝޯޓް ބޯޑް ބައިގައި 16 އަހަރުން ދަށުގެ 6 ކުއްޖަކު ބައިވެރިވެފައިވާއިރު 16 އަހަރުން މަތީ އުމުރު ފުރައިން 11 ކުއްޖަކު ބައިވެރިވެފައިވެއެވެ.
