ޖަޕާނުގެ ބޮޑުވަޒީރު ޝިންޒޯ އާބޭ ރަސްމީ ދަތުރުފުޅެއްގައި އިއްޔެ އީރާނަށް ވަޑައިގެންފިއެވެ. އީރާނާ އެމެރިކާއާ ދެމެދު އިތުރުވަމުންދާ ނުތަނަވަސްކަން ކުޑަކުރެއްވުމަށް ކުރައްވާ މިދަތުރުފުޅުގައި އިއްޔެ އޭނާ ވަނީ އީރާނު ރައީސު ޙަސަން ރޫޙާނީއާ ބައްދަލުކުރައްވައިފައެވެ.
ޖަޕާނަކީ އެމެރިކާގެ ގާތް އެކުވެރިއެކެވެ. އަދި އީރާނާއެކުވެސް ގާތް ގުޅުމެއް އޮންނަ ގައުމެކެވެ. އެހެންކަމުން، ޖަޕާން ދެކެނީ މިހާރު އިތުރުވަމުންދާ ނުތަނަވަސްކަން ކުޑަކުރުމަށް ޖަޕާނަށް ބިނާކުރަނިވި ދައުރެއް އަދާކުރެވިދާނެކަމުގައެވެ.
އިއްޔެ ރޫޙާނީއާ ބައްދަލުކުރެއްވުމަށް ފަހު ވާހަކަފުޅުދައްކަވަމުން ބޮޑުވަޒީރު އާބޭ ވަނީ މެދުއިރުމަތީގައި ކުރިމަތިލުމެއް ފެށިއްޖެނަމަ އެކަމުގެ ނުރައްކާ ބޮޑުވާނެ ކަމުގެ އިންޒާރުދެއްވާފައެވެ.
"ކޮންމެ އަގެއްގައި ނަމަވެސް އަސްކަރީ ކުރިމަތިލުން ހުއްޓުވަންޖެހޭ. މެދުއިރުމަތީގެ ސުލްހައަކީ ކޮންމެހެން ބޭނުން ކަމެއް. އެ ސަރަހައްދަށް އެކަންޏެއް ނޫން. މުޅި ދުނިޔޭގެ ކުރިއެރުމަށް." އާބޭ ވިދާޅުވިއެވެ.
ބޮޑުވަޒީރު އާބޭ އަކީ 2015 ވަނަ އަހަރު ދުނިޔޭގެ ބޮޑެތި ބާރުތަކާއެކު އީރާނުން އެކުލަވާލި ނިއުކުލިޔާ އެއްބަސްވުމުން އެމެރިކާ ވަކިވުމާ ގުޅިގެން އިތުރުވެގެން ދިޔަ ނުތަނަވަސްކަން ކުޑަކުރުމުގެ މަސައްކަތުގައި އީރާނަށް ވަޑައިގެންނެވި އެންމެ މަތީ ފެންވަރުގެ ވެރިޔާއެވެ. އަދި އީރާނުގެ އިސްލާމީ އިންގިލާބަށް ފަހު ފާއިތުވި 40 އަހަރުގެ ތެރޭގައި އީރާނަށް ވަޑައިގެންނެވި ޖަޕާނުގެ ފުރަތަމަ ބޮޑުވަޒީރެވެ.
ނިއުކުލިޔާ އެއްބަސްވުމުން ފާއިތުވި އަހަރު ވަކިވުމަށް ފަހު އެމެރިކާއިން ވަނީ އީރާނާ ދެކޮޅަށް އިގްތިސާދީ ގޮތުން ދަތިކުރުމުގެ ފިޔަވަޅު އަޅާފައެވެ. އަދި މެދު އިރުމައްޗަށް އެމެރިކާގެ އަސްކަރީ އުޅަނދުތައް ޖަމާކޮށްފައެވެ. ރައްދުގައި އީރާނުން ވަނީ ނިޔުކުލިޔާ ހަކަތައިގެ ޕްރޮގްރާމް އަލުން ފަށައި، ޔުރޭނިއަމް މުއްސަނދިކުރުމުގެ މަސައްކަތް ފަށާފައެވެ.
"ނުތަނަވަސްކަން އިތުރުވުގެ އަސްލަކީ އީރާނާ ދެކޮޅަށް އެމެރިކާއިން ކުރާ އިގްތިސާދީ ހަނގުރާމަ. އެ ހަނގުރާމަ ހުއްޓާލައިފިއްޔާ މެދުއިރުމަތިންނާ މުޅި ދުނިޔެއިން އަހަރުމެންނަށް ވަރަށް އީޖާބީ (ޕޮޒިޓިވް) ބަދަލުތަކެއް ފެންނާނެ." ބޮޑުވަޒީރު އާބޭއާ ބައްދަލުކުރެއްވުމަށް ފަހު ވާހަކަފުޅުދައްކަވަމުން ރައީސު ރޫޙާނީ ވިދާޅުވިއެވެ.
"އަހަރުމެން މިސަރަހައްދުގައި ކުރިމަތިލުމެއް ނުފަށާނަން. އެއީ އެމެރިކައާއެކު ކަމަށް ވިޔަސް. އެކަމަކު އަހަރުމެންނާއެކު ހަނގުރާމަ ފަށައިފިއްޔާ، ދުޝްމަނުން ފުނޑުފުނޑުކޮށްލާފަދަ ރައްދެއް އަހަރުމެން ދޭނަން." ހަނގުރާމަ ނުފެށުމަށް އިންޒާރުދެއްވަމުން ރޫޙާނީ ވިދާޅުވިއެވެ.
މިއަދު ހެނދުނުގެ ވަގުތެއްގައި ބޮޑުވަޒީރު އާބޭ އީރާނުގެ ދީނީ ޒައީމު އާޔަތުﷲ ޢަލީ ޚާމަނައީއާ ބައްދަލުކުރައްވާނެއެވެ.
