ކަޝްމީރުގެ ކަތުއާގައި 8 އަހަރުގެ އަންހެން ކުއްޖެއްގެ އިއްފަތް ފޭރިގަތުމަށް ފަހު މަލާލުމުގެ ކުށުގައި އޭނާގެ މައްޗަށް އުމުރަށް ޖަލަށް ލާން ހުކުމްކޮށްފައިވާ ސަންޖީ ރާމް ހިފުނީ ޖަނަވަރީ މަހުގެ ފިނިގަދަ ދުވަހެއްގެ ހެނދުނު އާދަޔާއި ޚިލާފަށް ދާހިއްލާފައި ހުރުމުން ކަމަށް އެ މައްސަލަ ތަހުގީގުކުރި ޓީމުގެ އިސް ވެރިކަށް ހުރި އާރް ކޭ ޖައްލާ ބުނެފިއެވެ.
ޕަޓާންކޯޓުގެ ކޯޓަކުން މި މައްސަލައިގައި ސަންޖީ ރާމްގެ އިތުރަށް ދެ މީހަކު އުމުރަށް ޖަލަށް ލާން ހުކުމްކޮށްފައި ވާއިރު، އިތުރު 3 މީހަކު 5 އަހަރަށް ޖަލަށްލާން ހުކުމްކޮށްފައި ވެއެވެ. އަދި މައްސަލަގައި ދައުވާކުރެވުނު ތިންވަނަ މީހާ، ސަންޖީ ރާމްގެ ވިޝާލްގެ މައްޗަށް ކުށް ސާބިތުނުވާ ކަމަށް ވަނީ ނިންމައިފައެވެ.
"ޖަރީމާ ހިނގި ތަން ތަހުގީގުކޮށް ބެލުމަށް ފަހު އަހަރުމެން ދިޔައީ ސަންޖީ ރާމްއާ (ފައްޅި ބަލަހައްޓަން ހުރި މީހާ) އާ ބައްދަލު ކުރަން. ދެން އަހަރެންގެ ޓީމާއި އަހަރެން އޭނާގެ އާއިލާގެ މެންބަރުން، ހައްޔަރުކުރެވިފައި ހުރި އޭނާގެ ބޭބެ ދަރިފުޅު އަދި އޭނާގެ ދަރިފުޅު ވިޝާލްއާ ބެހޭގޮތުން ސުވާލުކުރަން ފެށިން." ތަހުގީގުކުރި ގޮތް ޕްރެސް ޓްރަސްޓް އޮފް އިންޑިޔާ (ޕީޓީއައި) އަށް ކިޔައިދެމުން ޖައްލާ ބުންޏެވެ.
މީގެ ތިން މަސް ކުރިން ރިޓަޔާކޮށްފައިވާ ޖައްލާއާއި މި މައްސަލަ ތަހުގީގުރަން ހަވާލުކުރެވުނީ 27 ޖަނަވަރީ 2018 ގައެވެ.
"އަޑަށް ބާރުލާފައި ސަންޖީ ރާމް އަހަންނާ ދިމާއަށް ބުނީ ތިމަންނާގެ ދަރިފުޅު ހުންނަނީ މީރަޓްގައި ކިޔަވާށޭ. އަދި އަހަރެން ބޭނުމިއްޔާ ގޮސް ކޯލް ޑާޓާ ރެކޯޑް ޗެކްކުރަންވީއޭ. ދެ ކަމާމެދު އަހަރެންނަށް ސުވާލު އުފެދުނު. ވިޝާލްގެ ކޯލް ރިކޯޑްތައް ބަލަން ސަންޖީ ރާމް މިހާ ބާރުއަޅަނީ ކީއްވެގެންތޯ އާއި، ފިނިގަދަ ޖަނަވަރީ މަހެއްގެ ހެނދުނު އާދަޔާއި ޚިލާފަށް ދާ ހިއްލާފައި ހުރީ ކީއްވެގެންހޭ." ޖަނަވަރީ މަހަކީ އިންޑިޔާގެ އުތުރުގައި އެންމެ ފިނިގަދަ ދުވަސްވަރެވެ. އެ ދުވަސްވަރު ހެނދުނުގެ ވަގުތުގައި އާއްމުކޮށް 15 ޑިގްރީއަށް ވުރެ ފިނިހޫނުމިން ދަށްވާނެއެވެ.
ޖައްލާ ބުނި ގޮތުއި އޭނާ ދެރަވީ ކޯޓުން ސަންޖީ ރާމްގެ ދަރި ވިޝާލް ދޫކޮށްލުމުންނެވެ. "އަހަރެން އުއްމީދުކުރަނީ ތަހުގީގުކުރާ ޓީމުގެ ވަރަށް ބުރަ މަސައްކަތުން ހޯދި ހެކިތަކަށް ކޯޓުން ރިއާޔަތްކުރާނެކަމަށް." ޖައްލާ ބުންޏެވެ.
އިންސްޕެކްޓަރ ޖެނެރަލް (ކްރައިމް) އަހްފަދުލް މުޖްތަބާ ވިދާޅުވީ ވިޝާލް ދޫކޮށްލި މައްސަލަ އިސްތިއުނާފުކުރަން ނިންމާފައިވާ ކަމުގައެވެ.
ތަހުގީގު ކުރިއަށް ދުވަސްވަރު ބީޖޭޕީގެ ބައެއް އިސްފަރާތްތަކުން ސަންޖީ ރާމް ދޫކޮށްލަން ގޮވާލައި އަޑުއުފުލާފައި ވީނަމަވެސް، ޖައްލާ ބުނީ ދުވަހަކުވެސް ބީޖޭޕީގެ އެއްވެސް ފަރާތަކުން އޭނާއަށް ގުޅައި، ސަންޖީ ރާމް ސަލާމަތްކުރަން މަސައްކަތްކޮށްފައި ނުވާކަމަށެވެ.
"އަހަރެންގެ މައްޗަކަށްވެސް އަދި އަހަރެންގެ ޓީމުގެ މައްޗަކަށްވެސް އެއްވެސް ސިޔާސީ ފިއްތުމެއް ނާދޭ. އަހަރުމެން މަސައްކަތްކުރަމުން ދިޔައީ ކުރާހިތުން، އިޚްލާސްތެރިކަމާއެކު." ސީނިޔާ ސުޕްރިންޓެންޑެންޓް އޮފް ޕޮލިސް (ރިޓަޔާޑް) އާރް ކޭ ޖައްލާ ބުންޏެވެ.
