ޔަމަނުގައި ސަރުކާރު ސިފައިންނާއި، އިދިކޮޅު ޙޫޘީ ޖަމާއަތުގެ ހަނގުރާމަވެރިންގެ މެދުގައި ކުރިއަށްދާ ހަނގުރާމައިގެ ތެރެއަށް ސަރަހައްދީ ބާރުތައް ކަމުގައިވާ ސައޫދީ އަރަބިއްޔާއާއި ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަދެ ހަނގުރާމަ ފުޅާވެގެން ގޮސްފައިވާއިރު އެ ގައުމުގެ އިންސާނީ ހާލަތު ވަނީ ދުވަހުން ދުވަހަށް ދަށަށް ގޮސްފައެވެ.
އދ. އިން ބުނާ ގޮތުގައި ޔަމަނުގެ ހަނގުރާމައިގެ އެންމެ ބޮޑު އަސަރެއް ކުރާ ބަޔަކީ މައިންނާއި ތުއްތު ކުދިންނެވެ. އެކަން އެ އިދާރާއިން ދޭތެރެ ދޭތެރެއިން ނެރޭ ރިޕޯޓުތަކުން ހާމަވެއެވެ.
އދ. ގެ ކުޑަކުދިންނާ ބެހޭ އިދާރާ، ޔުސެފުން ހޯމަދުވަހު ނެރުނު ރިޕޯޓެއްގައި ވާގޮތުން "ބަލިވެ އިނުމާއި، ވިހެއުމުގައި ދިމާވާ މަސްލަތަކުގެ ސަބަބުން ޔަމަނުގައި ކޮންމެ ދެ ގަޑިއަކުން މަޔަކާއި، އަލަށް ވިހާ ތުއްތު 6 ކުދިން މަރުވެއެވެ."
"ޔަމަނުގައި އެތައް އަހަރަކަށް ދެމިގެން ގޮސްފައިވާ ހަނގުރާމައިގެ ސަބަބުން މާބަނޑު އަންހެނުންނާއި، އަލަށް ވިހާ ކުދިންގެ ހާލަތު ވަނީ ގޯހުން ގޯހަށް ގޮސްފައެވެ. 2015 ވަނަ އަހަރު ހަނގުރާމަ ފެށުމުގެ ކުރިންވެސް ޔަމަނަކީ މެދުއިރުމަތީގައި އޮތް އެންމެ ފަގީރު ގައުމެވެ. އަދި ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ގައުމެކެވެ." ޔުނިސެފްގެ ރިޕޯޓުގައި ވެއެވެ.
މެދުނުކެނޑި ފަސްވަނަ އަހަރަށް ދެމިގެން ގޮސްފައިވާ ހަނގުރާމައިގެ ސަބަބުން އިންސާނީ ކާރިސާއެއް ކުރިމަތިވެފައިވާ ޔަމަނުގައި، މާބަނޑު ދުވަސްވަރު ނުވަތަ ވިހެއުމުގެ ތެރޭގައި ކޮންމެ 260 އަންހެނެއްގެ ތެރެއިން އެކަކު މަރުވެއެވެ. އަދި އަލަށް އުފަންވާ ކޮންމެ 37 ކުއްޖެއްގެ ތެރެއިން އެއް ކުއްޖަކު ފުރަތަމަ ފަހުގެ ތެރޭގައި މަރުވެއެވެ.
ޔުނިސެފްގެ ރިޕޯޓުގައި ވާގޮތުން ޔަމަނުގައި ހުރި ސިއްހީ ޚިދުމަތް ދޭ ތަންތަނުގެ ތެރެއިން މިހާރު މަސައްކަތްކުރަނީ ދެބައިކުޅަ އެއްބައެވެ. އެތަންތަނުގެ ހާލަތުވެސް ދަނީ އެއް ދުވަހުން އަނެއް ދުވަހަށް ދަށްވަމުންނެވެ.
