އަޟްޙާ ޢީދު ފާހަގަކުރުމަށް ރާއްޖޭގެ އަތޮޅުތެރޭގައި ހިންގާ އެކިއެކި ޙަރަކާތްތަކުގެ ތެރެއިން އަޅުގަނޑު މިބަލާލަނީ އއ.މަތިވެރިއަށެވެ.
އާބާދީގައި 900 އެއްހައި މީހުން ރަޖިސްޓްރީވެފައިވާ މި ކުޑަކުޑަ ހިތްގައިމު ރަށުގައި ޢާއްމުގޮތެއްގައި ދިރިއުޅެނީ 400 އާއި 500 އާ ދެމެދުގެ ޢަދަދެއްގެ މީހުންނެވެ.
އެހެންނަމަވެސް މިފަހަރުގެ ޢީދު ވެގެންދިޔައީ ރަށުގެ ގެތަކާއި ގެސްޓްހައުސްތައް ފުރި ބަންޑުންވި ޢީދަކަށެވެ. މާލޭގައި ދިރިއުޅޭ މިރަށުގެ ރައްޔިތުންނާއި އެހެންރައްރަށުން މިރަށަށް ޒިޔާރަތްކުރި މީހުންނާއެކު މުޅިރަށް އޮތީ ފުރި ބާރުވެފައެވެ. މާލެއިން ރަށަށް އައި މިރަށުގެ ބައެއްމީހުން އެމީހުންގެ ރަށުގެ، ގެ ފުރިގެން ގެސްޓްހައުސްތަކުގައިވެސް އުޅެންޖެހުނެވެ.
ސާފު ތާހިރުކަމުގެ މިސާލެއް!
އަޅުގަނޑު މިރަށް މިއައީ މުޅިން އަލަށެވެ. އެހެންނަމަވެސް މިއަތޮޅުގެ ބައެއް އެހެން ރަށްރަށަށް ވެސް އަދި ރާއްޖޭގެ ވަރަށް ގިނަ ރަށްރަށަށް މީގެކުރިން ޒިޔާރަތްކުރީމެވެ. މިހާ ސާފުތާހިރު، ރަށެއް އަޅުގަނޑު ރާއްޖެއިން ނުދެކެވެ. ރަށުގެ ގޮނޑު ދޮށުންފެށިގެން މީހުން ދިރިއުޅޭ ހިސާބާއި، އެކަހެރި ތަންތަނުންވެސް ފެންނަނީ ސާފުކަމާއި، ހިތްގައިމުކަމެވެ. ކުނިބުނިން ސަލާމަތްވެފައިވާ ތަނެއްނޫނީ މިރަށަކު ނެތެވެ.
ރަށުކައުންސިލުގެ އިސްބޭފުޅަކު ވިދާޅުވީ، މިއީ އަބަދުވެސް ސާފުތާހިރުކަމަށް އިސްކަންދޭ ރައްޔިތަކު ދިރިއުޅޭ ރަށެއްކަމަށެވެ. ރަށްރށް ސާފުކުރުމުގައި ރައްޔިތުން ކުރާ ބުރަ މަސައްކަތް ސަރުކާރުން ފާހަގަކުރި ދުވަސްވަރު މިރަށުން ވަނަ ވެސް ހޯދާފައިވާކަމަށް އޭނާ ވިދާޅުވިއެވެ.
ޢާއްމުކޮށް ރަށުގެ ސާފުކުރާ ކުރުމުގެ އިތުރުން ޚާއްސަ މުނާސަބަތްތަކަށް ރައްޔާރުވުމުގެގޮތުންވެސް މިރަށުގެ ރައްޔިތުން ރަށް ސާފުކުރާކަމަށް ކައުންސިލުގެ ބޭފުޅާ ވިދާޅުވިއެވެ. އެގޮތުން މި ޢީދަށް ރައްޔާރުވުމުގެގޮތުންވެސް ރަށުގެ ރައްޔިތުން ކުރި އެންމެ ބޮޑު މަސައްކަތަކީ ރަށް ސާފުކޮށް މިއީ މެހެމާނުންނަށް ހިތްފަސޭހަ ރަށަކަށް ހެދުމުގެ މަސައްކަތް ކަމަށް އޭނާ ވިދާޅުވިއެވެ.
ޢީދުގެ އުފަލުގައި އޮތީ ސަޤާފީކުޅިވަރާޢި، ފުޓްސަލް
ސަޤާފީ ކުޅިވަރަކީ މިރަށުގައި ޢީދުގެ މުނާސަބަތުގައި ޒަމާނުއްސުރެ އޮންނަ ކަމެއްކަމަށް ރަށުގެ އިސްބޭފުޅުން ވިދާޅުވެއެވެ. އެގޮތުން މިފަހަރުވެސް، މާލި ނެރުމާއި، ކޯޑި ކެނޑުން، ބޮޑުބެރާއި، ލަނގިރިޖެހުން ފަދަ ހިތްގައިމު ސަޤާފީ ކުޅިވަރުތައް މިރަށުގައި އޮތެވެ. އެންމެ ޚާއްސަ އެއްބަޔަކީ ދިއްގަރު ލަގިރި ގްރޫޕެވެ.
ދިއްގަރު ލަގިރި ގްރޫޕު ރަށަށް އަންނަވާހަކަ ރަށުގެ އަޑުގަދަކުރާއިން ގޮވާލުމާއެކު އަންހެނުންނާއި ފިރިހެނުން ރައްޔާރުވީ އެގްރޫޕަށް މަރުޙަބާ ކިޔުމަށް ތައްޔާރުވުމަށެވެ. ފޭލިގެޖަހައި، ކުރުނބާ ތައްޔާރުކޮށް، އަތިރިމަތީގައި ސަފުހަދާލިއެވެ. ހޫނު މަރުޙަބާއަކާއެކު ލަނގިރި ގްރޫޕު ރަށަށް ބޭލިއެވެ. މިއީ މިރަށުގެ ކުދިބޮޑު އެންމެން ވަރަށް ތަރުޙީބުދޭ ހަރަކާތެކެވެ.
ދިއްގަރު ލަގިރިގްރޫޕު މިދެނުކެނޑި މިރަށް، ގެންނަތާ މިހާރު އަށެއްކަ އަހަރުވެދާނެކަމަށް މިކަން އިންތިޒާމުކުރާ ބޭފުޅުން ވިދާޅުވިއެވެ.
ފުޓްސަލްގެ ފޯރި ވަރަށްގަދަ !
ސަރުކާރުން އަޅައިދީފައިވާ ހިތްގައިމު ފުޓްސަލް ދަނޑެއް މިރަށުގައު އޮވެއެވެ. ރޭގަނޑުވެސް ކުޅެވެއެވެ. ދަނޑާގުޅިގެން ކުރަންޖެހޭ ކުދިކުދި ބައެއްކަންކަން އަދި ފުރިހަމަކުރަން ޖެހިފައި ހުއްޓަސް އުނިކަމެއް ނުފެނެއެވެ. މިއީ މިރަށަށް ހައްޤު ދަނޑެއްކަން އެނގެނީ މިރަށުގައި އޮތް ފޯރި ފެނުމުންނެވެ. ބޮޑު ޢީދާގުޅިގެން ކޮންމެ އަހަރަކު ބާއްވަމުންދާ ފުޓްސަލް މުބާރާތަކީ އެއްކަމަކަށް މިރަށުން އެންމެބޮޑު ހޭދައެއްކުރާ ކަމޭ ދެންނެވުމަކީ ދޮގަކަށް ނުވާނެއެވެ. މުބާރް އިންތިޒާމުކުރުމާއި، ރެފްރީން ގެނައުމާއި އެމީހުންގެ ކަންކަމަށް މުބާރާތް އިންތިޒާމުކުރާ ފަރާތުން މިލިއަނުން ހޭދަކުރެއެވެ.
ރަށުން ބޭރުގެ ބައެއް ޓީމުތަކަށްވެސް ދަޢުވަތުދީގެން ރަށުގެ އެތައް ޓީމަކާއެކު ކުރިއަށްގެންދާ މިމުބާރާތަށް ޓީމުތަކުންވެސް މިލިއަނުން ހޭދަކުރެއެވެ. ރަށުގެ ކޮންޓީމަކަށް ރާއްޖޭގެ އެކިކަންކޮޅުތަކުން މޮޅެތި ކުޅުންތެރިން ގެނައެވެ. އޭގެ ތެރޭގައި ފްރޮފެޝަނަލް ފުޓްބޯޅަކުޅޭ މަޝްހޫރު ބައެއް ކުޅުންތެރިންވެސް ހިމެނެއެވެ. ކޮންމެ ޓީމެއްގައިވެސް ރަށުންބޭރު މިފަދަ ދެތިން ކުޅުންތެރިން ހިމެނޭއިރު، އެއިން މީހަކަށް ޅުމަށްދޭ އުޖޫރައެއްގެ ގޮތުގައި 10000 އާއި 20000 ދެމެދުގެ ޢަގެއް ދެއެވެ. ބައެއްމީހުންނަށް މިއަށްވުރެ ބޮޑު އަގެއްވެސް ދޭކަމަށްވެއެވެ.
އަދި އެމީހުންގެ ހުރުމާއި ކެއުމުގެ ކަންކަންވެސް މިކޮޅުން ހަމަޖައްސައިދެއެވެ.
އަޚުލާޤު ރަނގަޅު ތަރުތީބު ރައްޔިތެއް!
މިރަށުގެ ރައްޔިތުންގެ ފަރާތުން އަޅުގަނޑަށް ފެނުނީ ހޮތް ހެޔޮކަމާއި ރީތި އަޚުލާޤެވެ. ޢީދުގެ މުނާސަބަތުގައި އެހެން ބައެއް ރަށްރަށުން ފެންނަފަދަ ދެޖިންސުގެ މީހުން އެއްވެ މިއުޒިކްޝޯވ ބޭއްވުންފަދަ ކަމެއް މިރަށުން އަޅުގަނޑު ނުދެކެވެ. މިއުޒިކްޝޯވ އެއީ މިރަށުގައި އޮންނަ އެއްޗެއް ނޫންކަމަށް ރަށުގެ ރައްޔިތަކު ވިދާޅުވިއެވެ.
މިރަށުން ފާހަގަކޮށްލެވުނު އެންމެ ޚާއްސަ އެއްކަމަކީ، ހެނދުނާއި ހަވީރުގެ ދުޢާތައް އަޑުގަދަކޮށް މިސްކިތު ތާޅިފިލިން ގޮވާކަމެވެ. ކޮންމެދުވަހަކުވެސް ވަގުތު ޖެހުމާއެކު ދުޢާތަކާއި ޒިކުރުތަކުގެ މަތިވެރި އަޑުން މަތިވެރީގެ ޖައްވު ގުގުމާލައެވެ. މާލޭގެ އިސްލާމީ މަރުކަޒުން ގޮވާ މުނާޖާފަދައިންނެވެ.
ކުޅިވަރާއި އެނޫންކަންކަމުގައިވެސް އަޅުގަނޑަށް ފެނުނީ ތަރުތީބު ރީތި އުސޫލެއް ގާޢިމުވެފައި އޮތްތަނެވެ. ޢާއްމުން ކުޅިވަރުބަލަން ތިބެނީވެސް ދެޖިންސު ވަކިން ވަރަށް ތަރުތީބުންނެވެ. މިކަންކަން ބަލައި އިންތިޒާމުކޮށް ތަރުތީބުކުރާކަށް ބަޔަކު ނިތިބެއެވެ. އުޅެންވީ އުސޫލު މާކުރިން ކޮންމެމީހަކަށްވެސް އެނގިފައި އޮވެއެވެ.
ރަށުންބޭރުން އައި އުޅޭ މެހެމާނުންނަށް ކަމޭހިތުމާއި މެހެމާންދާރީ އަދާކުރުމުގައިވެސް މިއީ ނަމޫނާރަށެކެވެ. ގެސްޓްހައުސްގެ ވިޔަފަރި، ފުޅާވަމުންދާ މިރަށުގައި މިހާރުވެސް ހިތްގައިމު 7 ގެސްޓްހައުސް ހުރެއެވެ. އަދި ހުޅުވުމުގެ މަގުމަތީގައި އިތުރު 3 ތަނެއް އެބަހުއްޓެވެ.
ކޮންމެއަކަސް އަޅުގަނޑަށް ސިފަކުރެވުނު އއ.މަތިވެރިއަކީ މަތިވެރި ސިފަތަކެއް ލިބިގެންވާ ހިތްގައިމު ރީތި ކުޑަކުޑަ ރަށެކެވެ.
އާފަތިސް އޮންލައިނަށް ވަރަށްބޮޑަށް ޝުކުރިއްޔާ! މިރަށުގެ މަޢުލުމާތު ގެނެސްދިނީތީ އުފާކުރަން. ހަޤީގަތުގައި އަދިވެސް ރަށުގެ ރައްޔިތުން ބޭނުންވާ މިންވަރަށް ރަށް އިސްލާޙެއްނޫވޭ. އެކަން ނުވެގެން މިއުޅެނީ ސިޔާސީ ވާދަވެރިކަމާއި، ބައެއް މީހުންގެ އަމިއްލަ އެދުން އިސްކުރެވޭތީ. އެކަން ޙައްލުވަނިކޮށް މިއީ އެންމެންނަށް އުފާވެރި މިއަށްވުރެވެސް ހިތްގައިމު ރަށަކަށްވާނެ. އިންޝާ ﷲ