އއ. މަތިވެރީގައި ހުންނަ އެސްޓީއޯ ބޭސްފިހާރައިގެ ތިޖޫރި ވަގަށްނެގި މައްސަލާގައި ދެމީހަކު ބަންދުކޮށްފިއެވެ.
އެމައްސަލައިގެ ތުހުމަތުގައި ބަންދުކޮށްފައިވަނީ ޢުމުރުން 33 އަހަރުގެ މީހަކާއި 37 އަހަރުގެ މީހެއް ކަމަށް ފުލުހުން ވިދާޅުވިއެވެ. ދެމީހުން ވެސް ބަންދުކޮށްފައިވަނީ ކޯޓު އަމުރެއް ހޯދައިގެން ކަމަށް ފުލުހުން ވިދާޅުވިއެވެ.
ތިޖޫރި ނަގައިފައިވަނީ ރޭ ދަންވަރު 2:50 އެހައިކަންހާއިރުއެވެ. ތިޖޫރި ވަގަށް ނަގައިގެން ދަނިކޮށް ފެނިފައިވަނީ ރަށުތެރެ ބެލެހެއްޓުމުގެ ޙަރަކާތުގައި ރޭ އުޅުނު ފުލުހުންނަށެވެ.
ތިޖޫރި ހިފައިގެން ދެމީހަކު ދަނިކޮށް މަޑުކުރަން އެންގުމުން އެމީހުން ވަނީ ތިޖޫރި ދޫކޮށްލާފައި ފިލައިފައެވެ. އެއީ އެސްޓީއޯ ބޭސްފިހާރައިގެ ތިޖޫރިކަން ފުލުހުންނަށް ކަށަވަރުވީ ރަށުގެ ފިހާރަތައް ބަލަމުން ދަނިކޮށް އެސްޓީއޯ ބޭސްފިހާރަ ފަޅާލައިފައި ހުރިތަން ފެނިގެން ގޮސް ބެލިއިރު ތޖޫރި ނެތުމުންނެވެ.
ފުލުހުން މިހާރު ގެންދަނީ މި މައްސަލަ ބަލަމުންނެވެ.
