ޙަސަދަވެރިކަމާއި، ބައިބައިވުންތަކާއި، އަރައިރުންތަކުން ދުރުހެލިވުމަށް ހުރިހާ މީހުންވެސް މިއަދު އަޒުމް ކަނޑައެޅުމަށް ފިތުރު އީދުގެ ޚުތުބާގައި ގޮވާލައިފިއެވެ.
މޫސުން ގޯސްވެ ވިއްސާރައިގެ ތެރޭގައި އެއްބަޔަކު އީދު ނަމާދު ކުރަމުންދިޔަ މިއަދުގެ އީދު ޚުތުބާގައި އީދު ދުވަހު އަރައިގެން އަންނަ އިރާއެކު ކޮންމެ މީހަކުވެސް އެމީހެއްގެ ތުންފަތުން ހިނިތުންވެލުން ފާޅު ކުރުމަށް ވަނީ ނަސޭހަތްތެރި ވެފައެވެ. އަދި މިބަރަކާތްތެރި ފިތުރު އީދު ދުވަހު ލޯތްބާއި، ކުލުނާއި އަޚުވަންތަކަމުގެ ޝުއޫރުތައް ފާޅުކޮށް، އަދި ގާތްތިމާގެ މީހުންގެ މެދުގައި ރަޙިމުގެ ގުޅުން އައުކޮށް، ރަޙްމަތެރިންގެ މެދުގައި އެކުވެރިކަން ބަދަހި ކުރުމަށްވެސް ވަނީ ނަސޭހަތްތެރި ވެފައެވެ.
ކޮންމެ މީހަކުވެސް ﷲގެ ޙައްގުތަކާއި، އަނެކާގެ ޙައްގުތައް އަދާކުރުމަށް ޚުތުބާގައި ގޮވާލަމުން އިތުރަށް ބުނެފައި ވަނީ ފިތުރު އީދު ދުވަހަކީ ރަމަޞާން މަހު ރޯދަ ހިފި މީހުންނަށް މާތް ﷲ އިނާމު ދެއްވާ ދުވަސް ކަމަށެވެ. އެގޮތުން ރަމަޞާން މަހު ރޯދައަށް ފަހު އަންނަ އީދަކަށް ފިތުރު އީދު ވެފައިވާއިރު ފިތުރު އީދަށް ނިކަމެތިންގެ މައްޗަށް ޒަކާތް ނެރެމުންދާކަންވެސް ވަނީ ފާހަގަ ކޮށްފައެވެ.
އީދު ޚުތުބާގައި ބުނީ އިސްލާމީ އީދު ތަކަކީ އީދުގެ އުފަލުގައި ހުރިހާ މީހުންވެސް ބައިވެރިކުރަން ޖެހޭނެ އިޙްތިފާލެއް ކަމަށާއި އީދު ދުވަހު އުފާފާޅު ކުރަންވީ ހަމައެކަނި މުއްސަނދިން އެކަނި ނޫން ކަމަށެވެ.
"ތަނަވަސްކަން ލިބިގެންވާ މީހުން، އެތަނަވަސްކަން ފަގީރުންނާއި މިސްކީނުންނަށް ފޯރުކޮށްދީ އީދުގެ އުފަލުގައި އެމީހުން ބައިވެރި ކުރަންވާނެއެވެ. ފިތުރު އީދު ދުވަހު އީދު ނަމާދުގެ ކުރިން ފިތުރު ޒަކާތް ނެރުމަށް އަންގަވާފައި ވަނީ މިހެންވެގެންނެވެ. މިކަމުގެ ސަބަބުން ފަގީރުންނަށް ސަލާން ނުޖަހައި ދިރިއުޅެވޭވަރުގެ ތަނަވަސްކަމެއް ލިބިގެންދާތީއެވެ." ރާއްޖޭގެ ކޮންމެ ރަށެއްގައިވެސް އެކިއުމުރުގެ ގިނަބަޔަކު މިއަދު ބައިވެރިވި އީދު ނަމާދުގެ ޚުތުބާގައި ބުނެފައިވެއެވެ.
އީދު ދުވަހު ކޮންމެ މީހަކުވެސް އެމީހެއްގެ އަތުގައި އޮތް އެންމެ ރީތި ހެދުމެއްލައި މީރު ވަސްދުވާ އެއްޗެހި ގައިގައި ލުމަށްވެސް ޚުތުބާގައި ވަނީ ހަނދާންކޮށްދީފައެވެ. އަދި އީދަކީ ހަމައެކަނި އުފާކޮށް މަޖާކުރަން އޮންނަ އީދެއް ނޫންކަންވެސް ހަނދާން ކޮށްދީފައިވެއެވެ.
"އެކަމަކު އެކަން ޝަރުއު ކުރައްވާފައި ވަނީ އިސްލާމީ މުޖުތަމައުގެ އަފުރާދުންގެ މެދުގައި އެކުވެރިކަން އާލާކުރުމަށްޓަކައެވެ. މުސްލިމުންގެ މެދުގައި ހެޔޮފޯރުވުމުގެ ރަނގަޅު އާދަ ފެތުރުމަށްޓަކައެވެ. އިސްލާމީ އުޚުވަންތަކަން ދެމެހެއްޓުމަށްޓަކައެވެ." ޚުތުބާގައި ބުނެފައިވެއެވެ.
މިއަދުގެ އީދު ޚުތުބާ ނިންމާލުމުގެ ކުރިން ވަނީ ފިތުރު އީދަށް ފަހު އަންނަ ޝައްވާލު މަހުގެ 6 ރޯދަ ހިފުމަށްވެސް މުސްލިމުންނަށް ހަނދާން ކޮށްދީފައެވެ. އަދި ޝައްވާލު މަހުގެ 6 ރޯދައަކީ އަޅުކަމަށް ފަހު އަނެއްކާވެސް އަޅުކަމަށް ވަނުންކަމަށާއި ޝައްވާލު މަހުގެ 6 ރޯދައަކީ މުޅި އަހަރު ދުވަހު ރޯދަ ހިފުމުންލިބޭ ސަވާބާއި ދަރުމަ ލިއްބައިދޭ ކަމެއްކަން ފާހަގަ ކޮށްފައެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް މިއަދު ފިތުރު އީދު ނަމާދު ކޮށްފައިވެއެވެ. އަދި އީދު ނަމާދު ކުރަމުންދިޔަ ވަގުތު ބަޔެއް ރަށްރަށަށް ބޯކޮއް ވާރޭ ވެހެމުން ދިޔަނަމަވެސް ފިރިހެނުންނާއި އަންހެނުން، ކުޑަކުދިންނާއި މުސްކުޅިން ބައިވެރިވެ އީދު ނަމާދު ފުރިހަމަ ކޮށްފައިވެއެވެ. އިސްލާމީ ކަންކަމާބެހޭ މިނިސްޓަރީން ކުރިން ތައްޔާރު ވަމުންދިޔައީ ރަށްރަށުގައި ބޮޑު ޖަމާއަތުގައި މިއަދު އީދު ނަމާދު ބާއްވާގޮތަށެވެ. ނަމަވެސް ރެއިން ފެށިގެން މޫސުން ގޯސްވެ، ވާރޭ ވެހެމުންދިޔުމާއި ގުޅިގެން ރޭގެވަގުތެއްގައި މިނިސްޓްރީން ވަނީ ބޮޑުޖަމާއަތުގައި އީދު ނަމާދު ކުރުން ކެންސަލް ކޮށްފައެވެ.
އީދު ނަމާދަށް ފަހު ބަޔެއް ރަށްރަށުގައި ވިއްސާރައިގައިވެސް ދަނީ އީދުގެ އުފާފާޅުކޮށް ތަފާތު ކުޅިވަރުތައް ބާއްވަމުންނެވެ.
