އެމެރިކާގެ ވާޖީނިޔާ ސްޓޭޓުގެ ރަށެއްކަމުގައިވާ ވާޖީނިޔާ ބީޗް ގެ މުނިސިޕަލް ސެންޓަރުގައި މަސައްކަތްކުރާ މީހަކު ބަޑި ހިފައިގެން އެ އިމާރާތަށް ވަދެ 13 މީހަކު މަރާލައި، 4 މީހަކު ޒަޚަމްކޮށްލައިފިއެވެ.
ދިގު މުއްދަތަކަށް އެ ސެންޓަރުގެ ވަޒީފާގައި އުޅެފައިވާ، އަދި މިހާރުވެސް އެތަނުގެ ޕަބްލިކް ޔުޓިލިޓީސްގައި ވަޒީފާ އަދާކުރަމުންދާ އެމީހާގެ ނަން ފުލުހުން ހާމަކޮށްފައި ނުވެއެވެ. ވާޖީނިޔާ ބީޗް ޕޮލިސް ޗީފް ޖޭމްސް ކާވޭރާ ވިދާޅުވީ "ގިނަ އިރަށް ދެމިގެން ހަމަލާ ބަދަލުކުރުމަކަށް ފަހު" ފުލުހުން އޭނާގެ ގަޔަށް ބަޑިޖަހައި މަރާލާފައިވާ ކަމުގައެވެ. ޒަޚަމްވި 4 މީހުންގެ ތެރެއިން އެކަކީ އޭނާއާއި ހަމަލާ ބަދަލުކުރި ފުލުސް އޮފިސަރެކެވެ.
ބަޑިޖަހާފައި ވަނީ އިއްޔެ ހަވީރު 4 ޖެހިއިރު (ރާއްޖޭ ގަޑިން ރޭ ދަންވަރު 1 ޖެހިއިރު) މުނިސިޕަލް ސެންޓަރުގެ މުވައްޒަފުން މަސައްކަތް ނިންމާލާފައި ހަފުތާ ބަންދުގެ ޗުއްޓީއަށް ދާން ތައްޔާރުވަމުން ދިޔަ ވަގުތުގައި އެ ސެންޓަރުގެ 2 ނަންބަރު އިމާރާތުގައެވެ. ޕްލޭނިންގ، ޕަބްލިކް ޔުޓިލިޓީސް އަދި ޕަބްލިކް ވާކްސް ޑިޕާޓްމަންޓުތައް ހިނގާ އެއިމާރާތުގައި 400 މުވައްޒަފުން މަސައްކަތްކުރެއެވެ.
ޕޮލިސް ޗީފް ކާވޭރާ ވިދާޅުވި ގޮތުގައި މުނިސިޕަލް ސެންޓަރުގެ އިމާރާތު ތެރެއަށް އޭނާ ވަނީ ހަވީރު 4 ޖަހަން އުޅެނިކޮށެވެ. އަދ "ވަދެފައި މަޑުނުވެ ތަނެއް ދޮރެއް ނުބަލައި އެންމެންގެ ގަޔަށް ބަޑިޖަހަން ފެށީ"އެވެ.
ފުލުހުން އިމާރާތަށް ވަދެ އެތަން ހުސްކުރުމަށް ފަހު، 0.45 ގެ ހޭންޑް ގަން އެއް ހިފައިގެން ހުރި އެ މިހާއާއި ކުރިމަތިލައި އޭނާ މަރާލިއެވެ.
"މިއީ ވާޖީނިޔާ ބީޗް ގެ ހަޔާތުގައި އެންމެ ހިތާމަވެރި ދުވަސް." ރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މޭޔަރު ރޮބަޓް ޑަޔާ ވިދާޅުވިއެވެ.
އެމެރިކާގައި ބަޑި ގެންގުޅުމުގެ ލައިސަންސް އާއްމުންނަށް ދޫކުރާއިރު، މިފަދައިން ބަޑިޖަހައި ގިނަ ބަޔަކު އެއް ފަހަރާ މަރާލުމުގެ ހާދިސާތަކަކީ އެ ގައުމުގައި އާއްމު ކަމެކެވެ.
