ރޭ ނުރައްކާތެރި އަލިފާނުގެ ޙާދިސާއެއް ހިނގި، ގ.އެސްބަރިގޭގައި ރޯވާން ދިމާވީ ކީއްވެގެންކަމެއް އަދި ނޭނގޭކަމަށް ފުލުހުން ހާމަކޮށްފިއެވެ.
ރޭ ގ.އެސްބަރި ގޭގައި ރޯވި އަލިފާން އެމްއެންޑީއެފް ފަޔަރ އެންޑް ރެސްކިޔު ސަރވިސް އިން ވަނީ ނިއްވާލަފައެވެ. މި ހާދިސާގައި، ފުރަތަމަ ރޯވެފައިވަނީ ގ.އެސްބަރިގޭގައެވެ. އަދި އެގެއާ އިންވެގެންހުރި ގ.އަސޭނާ ގެއަށްވެސް ވަނީ އަލިފާނުގެ އަސަރު ކޮށްފައެވެ.
މި ހާދިސާ ހިނގިކަމުގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ކޮންޓްރޯލް ރޫމަށް ލިބުނީ ރޭ 21:40 ހާއިރު ކަމަށް އެބޭފުޅުން ހާމަކުރައްވައެވެ. އެއާ ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރމަނުން ވަނީ ވަގުތުން ހަރަކާތްތެރިވެފައިކަމަށާ، އަދި ހާދިސާ ހިނގައިގެން އުޅޭ ސަރަޙައްދަށް އެފްއާރުއެސްގެ ފަޔަރމަނުން ގޮސް، ރޯވެފައިވާ އަލިފާންގަނޑު ނިއްވާލުމުގެ މަސައްކަތާއި، އެސަރަޙައްދުގެ ގޭގެއިން މީހުން ނެރެ ރައްކާތެރި ސަރަޙައްދުތަކަށް ގެންގޮސްދިނުމުގެ މަސައްކަތް ކޮށްފައިވާކަމަށްވެސް އެބޭފުޅުން ހާމަކުރައްވައެވެ.
ގ.އެސްބަރި ގޭގައާއި ގ.އަސޭނާ ގޭގައި ރޯވެފައިވާ އަލިފާންގަނޑު ކޮންޓްރޯލްކޮށް، އެއްކޮށް ނިއްވާލެވިފައިވަނީ ރޭ 23:00 ހާއިރު ކަމަށާ، މި ހާދިސާގެ ސަބަބުން އެ ދެ ގެއަށްވެސް އެކިވަރުގެ ގެއްލުންތައް ވެފައި ވާހަކަމަށް ފަޔަރ އެންޑް ރެސްކިޔު ސަރވިސް އިން ހާމަކުރައްވައެވެ.
މިޙާދިސާގައި އެއްވެސް މީހަކަށް ހާނީއްކައެއް ނުވާކަމަށް މަޢުލޫމާތުލިބެއެވެ.
