އެސްޓީއޯ ތެޔޮ ބޯޓެއް ކަމަށްވާ "މާތޮޅި" ތެލާއެކު ކާށިދޫ ފަރަށް އަރައިފިއެވެ. އެ ބޯޓުގައިހުރި މީހަކު އާފަތިހަށް މަޢުލޫމާތު ދެމުން ބުނީ ބޯޓު ފަރަށް އެރީ އިރު އޮއްސި 6:20 އެހައިކަންހާއިރު ކަމަށެވެ. "އަޅުގަނޑުމެން މިތިބެނީ އެމްއެންޑީއެފަށް ވެސް ގުޅައިގެން އެހެންނަމަވެސް އަދިވެސް ޚަބަރެއް ނުވޭ. ބޯޓު ވަނީ ވަރަށް ބޮޑަށް ފަރަށް އަރައިފައި. ދިޔަވަރު ބޮޑުވަމުންދާ ވަރަކަށް އަދިވެސް އެތެރެއަށް ބޯޓު ދަނީ ވަންނަމުން. މިއީ އެސްޓީއޯއަށް އަލަށް ގެނައި މީގެ ދެ ބޯޓުގެ ތެރެއިން ބޯޓެއް" އެމީހާ ބުންޏެވެ.
އޭނާ ބުނީ ބޯޓަށް އެހީވުމަށްޓަކައި އެސްޓީއޯގެ މެކުނު ބޯޓާއި، ކޯމަސް ބޯޓާއި، އެމްޕީއެލްގެ ޓަގެއް މިހާރު ވަނީ ފުރައިފައި ކަމަށެވެ. ކަނޑު ގަދަ ނޫން ކަމަށްވާނަމަ މާދަމާ ހެނދުނު 6 ނުވަތަ 7 ޖަހަންވާއިރަށް އެ އުޅަނދު ފަހަރަށް ބޯޓާ ހަމައަށް އާދެވޭނެ ކަމަށް ލަފާކުރެވޭ ކަމަށްވެސް އެމީހާ ބުންޏެވެ.
ބޯޓުގައިހުރި ތެޔޮ ހުސްނުކޮށް ފުންކުރުމަކީ ވަރަށް ނާދިރު ކަމެއް ކަމަށް ވެސް އޭނާ ބުންޏެވެ.
އޭނާ ބުނީ އެ ބޯޓަކީ ނައިފަރު ކައިރީގައި އޮތް ބޮޑު ބޯޓަކުން ތެޔޮ ބަރުކޮށްގެން އައި އެއްޗެއް ކަމަށެވެ. އޭގައި ހުރީ ފެނަކައިން ކާށިދޫގައި ހިންގާ އިންޖީނުއަށް ގެނައި އެއްލައްކަ އަށްޑިހާސް ލިޓަރުގެ ތެލާއި ފަސްދޮޅަސް ހާސް ލިޓަރުގެ ޕެޓްރޯލް ކަމަށެވެ.
"މިހާތަނަށް އެސްޓީއޯ ފިޔަވައި އަޅުގަނޑުމެންގެ ޙާލު ބަލާފައިވަނީ ކާށީދޫ ކައުންސިލުން. އެމީހުން ބޯޓަށް އަރަން ވެސް އައި. އެކަމަކު ރާޅު ބޮޑު ކަމުން ކައިރިއެއް ނުކުރެވުނު. އެމީހުން އެހި ކޮންކަމެއްހޭ ބޭނުންވަނީ. ކަމެއް ބޭނުމެއް ނޫނޭ ބުނުމުން އެމީހުން ދިޔައީ" ބޯޓުން ވާހަކަ ދެއްކި މީހާ ބުންޏެވެ.
