ކުރީގެ ރައީސް މުހައްމަދު ނަޝީދާއި އެމަނިކުފާނުގެ ސަރުކާރުގެ ބައެއް ވެރިން ދައުލަތަށް ދައްކަންޖެހޭ ކަމަށް އެންގި ފައިސާ ނުދައްކ ބޭފުޅުންނާމެދު ފިޔަވަޅު އެޅުމުގެ މަސައްކަތް ކުރަމުންދާކަމަށް ފިނޭންސް މިނިސްޓްރީން ހާމަކުރައްވައިފިއެވެ.
ނަޝީދުވެސް ހިމެނިވަޑައިގަންނަވާގޮތަށް އެމަނިކުފާނުގެ ސަރުކާރުގެ އިސް ހަތް ބޭފުޅަކަށް ފައިސާ ދެއްކުމަށް އެންގި މުއްދަތު މިދިޔަ ބުރާސްފަތި ދުވަހަށް ވަނީ ހަމަވެފައެވެ. މުއްދަތުހަމަވިއިރު، ފައިސާ ދެއްކެވީ ކުރީގެ ފޮރިން މިނިސްޓަރު ޑރ. އަހުމަދު ޝަހީދު އެކަންޏެވެ.
އެބޭފުޅުން ދައުލަތަށް ދައްކަވަންޖެހޭ ފައިސާއަކީ ސަރުކާރުގެ އެކިއެކި މަޤާމުތަކުގައި ތިއްބެވިއިރު، އެބޭފުޅުން ހިންގެވި ވުޒާރާތަކައި އެހެންވެސް މުއައްސަސާތަކުން މާލިއްޔަތުގެ ޤާނޫނާޚިލާފަށް ގެއްލިފައިވާ ނުވަތަ ދައުލަތަށް ލިބެންޖެހޭ ފައިސާގެ ތެރެއިން އެބޭފުޅުންގެ ޒިންމާވާންޖެހޭ ފައިސާއެވެ.
ފިނޭންސް މިނިސްޓްރީން ނެރުއްވާފައިވާ ޢިއުލާނެއްގައިވަނީ ދައުލަތަށް ފައިސާތަކެއް ދައްކަންޖެހޭ ކަމަށް އޮޑިޓް ރިޕޯޓްތަކުގައި ފާހަގަކޮށްފައިވާ، ނަޝީދުގެ ސަރުކާގެ އިސްވެރީން އެފައިސާ ދައުލަތަށް ދެއްކެވުމަށް އަންގަވާފައެވެ. އަދި އެ ފައިސާ ދެއްކުމަށް ރައީސް ނަޝީދު ވެސް ހިމެނިވަޑައިގަންނަވާ ގޮތަށް ހަތް ބޭފުޅަކަށް ވަނީ އަންގަވާފައެވެ. އެ ފައިސާ ހަތް ދުވަހުގެ ތެރޭގައި ދެއްކުމަށް އަންގަވާކަމަށާ، އެ މުއްދަތުގެ ތެރޭގައި ފައިސާ ނުދައްކަވައިފިނަމަ އެޓާނީ ޖެނެރަލް މެދުވެރިކޮށް ދައުވާ ކުރާނެ ކަމަށް ވެސް ފިނޭންސް މިނިސްޓްރީގެ ޢިއުލާނުގައިވަނީ އަންގަވާފައެވެ.
ދައުލަތަށް ފައިސާދައްކަވަން ޖެހޭ ބޭފުޅުން.
- ކުރީގެ ފޮރިން މިނިސްޓަރު ޑރ. އަހުމަދު ޝަހީދު
- ކުރީގެ ހޯމް މިނިސްޓަރު މުހައްމަދު ޝިހާބު
- ކުރީގެ ފޮރިން މިނިސްޓަރު އަހުމަދު ނަސީމް
- ކުރީގެ ހައުސިން މިނިސްޓަރު މުހައްމަދު އަސްލަމް
- ކުރީގެ ކޮމިޝަނަރ ޖެނެރަލް އޮފް ކަސްޓަމްސް މުހައްމަދު އަސްވާން
- ކުރީގެ ސްޓޭޓް މިނިސްޓަރު ޝައިޚް ހުސައިން ރަޝީދު އަހުމަދު
ނަޝީދުގެ ސަރުކާރުގެ އިސްވެރިންގެ ތެރެއިން މިބޭފުޅުންގެ އިތުރުން ވެސް ދައުލަތަށް ގިނަޢަދަދެއްގެ ފައިސާ ދައްކަންޖެހޭ ބޭފުޅުންތަކެއް އޮޑިޓް ރިޕޯޓުތަކުގައި ފާހަގަކުރައްވާފައިވެއެވެ.
ނަޝީދުގެ ސަރުކާރުގެ ވެރިކަމުގެ ދުވަސްވަރު ސަރުކާރުގެ އެކި އިދާރާތަކުން ގެއްލިފައިވާކަމަށް އޮޑިޓްރިޕޯޓުތަކުގައި ފާހަގަކުރައްވާފައިވާ ފައިސާގެ ޢަދަދު 4.7 ބިލިއަން ރުފިޔާއަށް އަރައެވެ.
