ރ.ކިނޮޅަހަކީ ކުށްމަދު އަމާން މުޖުތަމަޢަކަށް ހެދުމަށް ކުރަމުންދާ މަސައްކަތްތަކުގެ ތެރެއިން ކިނޮޅަސް ސުކޫލުގެ ދަރިވަރުންނާއި ބެލެނިވެރިން އަދި ޓީޗަރުން ހޭލުންތެރި ކުރުމުގެ ގޮތުން ޕްރޮގްރާމެއް ހިންގައިފިއެވެ.
މި ހިނގާ ސެޕްޓެމްބަރު މަހުގެ 1 ން 3 އަށް ހިންގި މި ޕްރޮގްރާމަކީ ” އަމާން ކިނޮޅަސް ” މިނަމުގައި ރ.ކިނޮޅަސް ސުކޫލުގެ ދަރިވަރުންނާއި ބެލެނިވެރިންގެ އިތުރުން ޓީޗަރުން ހޭލުންތެރިކުރުމުގެ ގޮތުން ކުރިއަށް ގެންދިޔަ ޕްރޮގްރާމެކެވެ.
މި ޕްރޮގްރާމުގައި ކުޑަކުދިން ކުރާ ކުށްތަކާއި އެކުށްތަކުން ކުޑަކުދިން ދުރުކުރެވޭނެ ގޮތްތަކާއިި އެއްގަމު ދަތުރުފަތުރުގެ ޤާނޫނާއި ޤަވައިދުތަކާއި ހަނގާ ކުރުމަކީ ކޮބައިކަމާއި ހަނގާ ކުރުމުގެ ސަބަބުން ލިބޭ ގެއްލުންތަކާ ބެހޭގޮތުން މައުލޫމާތު ދީފައިވެއެވެ. އަދި ކުޑަކުދިންގެ ހައްޤުތައް ރައްކާތެރިކުރުމާއި އާއިލީ މަސްލަހަތު ދެމެހެއްޓުމާއި އާންމު ޢިޖުތިމާއީ މީންގަނޑުތަކާ ޙިލާފު އަމަލުތަކާ އަދި އާންމު ދިރިއުޅުމުގެ ގެންގުޅެންޖެހޭ ރީތި އާދަތަކާ ބެހޭގޮތުންވެސް މި ޕްރޮގްރާމުގައި މައުލޫމާތު ދީފައިވެއެވެ.
މިޕްރޮގްރާމުގައި ކިނޮޅަސް ސުކޫލުގެ ގްރޭޑް 9،8،7،6،5،4 އަދި 10 ގެ ޖުމްލަ 70 ދަރިވަރުންނާއި 25 ޓީޗަރުން އަދި 68 ބެލެނިވެރިން ބައިވެރިވެފައިވެއެވެ.
މި ޕްރޮގްރާމުގައި މައުލޫމާތުދީފައިވަނީ ރ.އުނގޫފާރު ޕޮލިސް ސްޓޭޝަނާއި ވާދޫ ޕޮލިސް ސްޓޭޝަނުގައި މަސައްކަތްކުރާ ފުލުހުންނެވެ. މި ޕޮރޮގްރާމް ކުރިއަށް ގެންދިއުމުގައި ރ.ކިނޮޅަސް ސުކޫލު މެނޭޖްމަންޓުގެ ފަރާތުން ފުލުހުންނަށް ވަރަށް ބޮޑު އެއްބާރުލުމެއް ލިބިފައިވެއެވެ.
