ތަޖްރިބާ ކޮށްލައްވާށެވެ! ، ބައިވެރިވެ ވަޑައިގެން އަގުހުރި އިނާމުތައް ހޯއްދަވާށެވެ ! މި މުބާރާތްތަކުގައި ވަގުތުން އިނާމު ލިބިވަޑައިގަންނަވާ މުބާރާތްތަކަކާއި ފަހަށް ރައްކައުކުރެވޭ އިނާމުތަކެއް ލިބިވަޑައިގަންނަވާ މުބާރާތްތަކެއް ވެއެވެ.
މިއީ ލާމަސީލު މުބާރާތްތަކެކެވެ. މި މުބާރާތްތައް ބޭއްވެނީ ވަރަށް އަޖައިބުވަނިވި ޖައްވެއްގެ ތެރޭގައެވެ. އާދަޔާ ޚިލާފު މާޙައުލެއްގައެވެ.ބިރުވެރިކަމެއް ، ނުތަނަވަސްކަމެއް، ނުނިޔަތްލުމެއް، މަކަރުހެދުމެއް ނެތް ވެށްޓެއްގައެވެ.
މުބާރާތުގައި ބައިވެރިވުމުގެ ޝަރްޠުތައް
- ބުއްދި ސަލާމަތުން ހުރި ، ބާލިޣު މުސްލިމަކަށް ނުވަތަ މުސްލިމާއަކަށް ވުން
- މިއީ ބައިނަލް އަޤްވާމީ މުބާރާތްތަކެކެވެ. ވަކި ޖިންސަކަށް، ވަކި މިންތިއަކަށް،ވަކި ކުލައަކަށް ވަކި ޤައުމަކަށް ބެލުމެއްނެތި ބޭއްވޭ މުބާރާތްތަކެކެވެ.
- ޝަރްޠު ފުރިހަމަވާ ކޮންމެ މީހަކަށް އެއް މުބާރާތަށް ވުރެ ގިނަ މުބާރާތުގައި ، އަދި ކީއްތޯ! ހުރިހާ މުބާރާތްތަކެއްގައި ވެސް ބައިވެރިވެވިދާނެއެވެ.
- މި މުބަރާތްތަކުގައި ބައިވެރި ވުމަށްޓަކައި އޭނާގެ އަތުން މާލީ މާ ބޮޑު ހޭދަތަކެއް ކުރާކަށް ނުޖެހޭނެއެވެ.ފަޤީރެއް މުއްސަންޖެއްގެ ތަފާތެއް ނެތެވެ.
ޚާއްޞަ އިމްތިޔާޒު
- މި މުބާރާތްތަކުގައި ބައިވެރިވެ ރަނގަޅ ކުރާ ކޮންމެ ޖަވާބަކަށް އިނާމު ލިބޭނެއެވެ. ކިތަންމެ ގިނަ ބަޔަކު މޮޅުވިޔަސް ގުރުއަތުލާކަށް ނުޖެހޭނެއެވެ.
- މުބާރާތެއްގައި ބައިވެރި ވުމަށްޓަކައި ފީއެއް ދައްކާކަށް ނުޖެހޭނެއެވެ. އެސް އެމް އެސް ކުރާކަށް ވެސް ނުޖެހޭނެއެވެ. އަދި ހިތްވަރުދީ ސަޕޯޓް ކުރާ ބަޔަކަށް ވެސް ބޭނުމެއް ނުވާނެއެވެ.
- މުބާރާތުގައި ބައިވެރިވާ މީހަކަށް އެތައް އިނާމެއް ވެސް ލިބިދާނެއެވެ.
- ކާމިޔާބުކަމާއެކު ކަޑަތުކުރާ ކޮންމެ ފިޔަވައްސަކަށް އިނާމު ކަނޑައެޅިފައި ވެއެވެ.
- އިނާމުތަކަކީ ކޮންމެ ދުވަހަކު ވަގުތުން ލިބޭ ތަފާތު އިނަމުތަކެކެވެ.
މުބާރާތްތައް ބޭއްވޭ ވަގުތާއި ތަން
- ރަމަޟާން މަހުގެ ފުރަތަމަ ރެއިން ފެށިގެން މުބާރާތްތައް ކުރިއަށް ދާނެއެވެ.
- ބައެއް މުބާރާތްތައް ރަމަޟާނާ ވިދިގެން ވެސް ކުރިއަށް ގެންދެވޭނެއެވެ.
- ކޮންމެ މީހަކަށް އެމީހަކު އެ ވަގުތަކު ހުރި ތަނެއްގައި ހުރެގެން މުބާރާތުގައި ބައިވެރިވެވިދާނެއެވެ.
- މުބާރާތްތައް ބޭއްވޭނީ ޚާއްޞަ ރޫޙާނީ ޖައްވެއްގެ ތެރޭގައެވެ. ސުވަރުގޭގެ ދޮރުކޮޅުތައް ހުޅުވި، ނަރަކައިގެ ދޮރުތައް ބަންދުކުރެވި ، ޝައިޠާނުން ކަސްތޮޅު އެޅުވިގެންވާ އުފާވެރި ، އަމާން މާޙައުލެއްގައެވެ.
ފުރަތަމަ މުބާރާތް
- ބައިވެރިވުން: ދުވާލު ރޯދަ ހިފުމާއި، ރޭގަނޑު ޤިޔާމުކުރުމާއި، ދުޢާކުރުން އިތުރު ކޮށްގެން.
- މުބާރާތް ބޭއްވޭ ވަގުތު: ރަމަޟާން މަހުގެ ދުވަސްތައް
- ލިބޭ އިނާމު: ނަރަކައިން މުއްތި ވުން. މިއީ މުޅި ޢުމުރަށް ލިބޭ މެޑެއްޔެކެވެ.
- އިނާމުދެވޭ ވަގުތު: ރަމަޟާން މަހުގެ ކޮންމެ ރެއަކު
ދެވަނަ މުބާރާތް
- ބައިވެރިވުން: ހެޔޮ ޢަމަލުތަކުގެ ތެރެއިން ޢަމަލަކުން
- މުބާރާތް ބޭއްވޭ ވަގުތު: ރަމަޟާން މަހުގެ ދުވަސްތައް
- ލިބޭ އިނާމު: ރަމަޟާން މަހުގައި ކުރާ ކޮންމެ ފަރްޟު ކަމަކަށް އެހެން މަސްމަހުގައި ކުރާ 70 ފަރްޟުގެ ސަވާބު . ރަމަޟާން މަހުގައި ކުރާ ކޮންމެ ސުންނަތް ކަމަކަށް އެހެނިހެން މައްސަރުތަކުގައި ކުރާ ފަރްޟު ކަމަކާ އެއްވަރު ސަވާބު
- އިނާމުދެވޭ ވަގުތު: ރަމަޟާން މަހުގެ ކޮންމެ ދުވަހަކު
ތިންވަނަ މުބާރާތް
- ބައިވެރިވުން: މާތްﷲއަށް އީމާންވެ އެކަލާނގެ ވަޖްހުފުޅު އަދައިގެން ރަމަޟާން މަހު ރޯދަ ހިފުމާއި ރަމަޟާން މަހުގެ ރޭތައް އިޙްޔާކޮށް ދިރުވުން
- މުބާރާތް ބޭއްވޭ ވަގުތު: މުޅި ރަމަޟާން މަސް
- ލިބޭ އިނާމު: ފާއިތުވެ ގޮސްފައިވާ ފާފަތައް ފުހެވިގެން ދިޔުން.
- އިނާމު ލިބޭ ވަގުތު: ރަމަޟާން މަސް ހަމަ ނިމުމާއެކު.
